- 1
- Whakarongo ki te kupu kua korerotia nei e Ihowa mo koutou, e te whare o Iharaira:
- 2
- Ko te kupu tenei a Ihowa, Kaua e akona te ara o nga tauiwi, kaua ano hoki e wehi i nga tohu o te rangi; e wehi ana hoki nga tauiwi i aua mea.
- 3
- He mea teka noa hoki nga tikanga a nga iwi: e tapahia ana hoki e tetahi he rakau i roto i te ngahere, he mea mahi na nga ringa o te kai mahi, ki te titaha.
- 4
- Kei te whakapaipai ratou i taua mea ki te hiriwa, ki te koura, whakamau rawa ki nga titi, ki nga hama, tē taea te whakakorikori.
- 5
- Tika tonu aua mea, me he nikau, kahore ia he kupu; me amo, he kore no ratou e haere. Kaua e wehi i a ratou, no te mea e kore e taea e ratou te kino, kahore hoki he meatanga ma ratou i te pai.
- 6
- Kahore rawa he rite mou, e Ihowa; he nui koe, he nui ano to ingoa i runga i te kaha.
- 7
- Ko wai e kore e wehi i a koe, e te Kingi o nga iwi? he mea tika hoki tena ki a koe: no te mea i roto i nga tangata whakaaro nui katoa o nga iwi, i roto i o ratou kingitanga katoa, kahore he rite mou.
- 8
- Huihuia ratou, he poauau kau, he wairangi: te rakau, he whakaakoranga tera ki nga mea horihori.
- 9
- E maua mai ana he hiriwa kua oti te whakaparaharaha i Tarahihi, me te koura i Upata, he mahi na te kai mahi, na nga ringa ano o te kai whakarewa: he mangumangu, he papura o ratou kakahu; he mea mahi te katoa na te hunga whakaaro nui.
- 10
- Ko Ihowa ia te Atua pono, ko ia te Atua ora, te kingi e pumau tonu ana; ka riri ia, ka wiri te whenua, e kore ano nga iwi e kaha ake, ina aritarita ia.
- 11
- Kia penei ta koutou ki atu ki a ratou, Nga atua kihai nei i hanga i te rangi, i te whenua, ka ngaro ratou i runga i te whenua, i raro atu ano hoki i enei rangi.
- 12
- Nāna i hanga te whenua, na tona kaha hoki; te ao he mea whakapumau na ona whakaaro nui; nga rangi he mea hora na tona matauranga.
- 13
- Ka puaki tona reo, he haruru wai kei nga rangi, e meinga ana e ia nga kohu kia pūpū ake i te pito o te whenua; e hangā ana e ia nga uira me te ua, e whakaputaina mai ana te hau i roto i ona taonga.
- 14
- Poauau kau nga tangata katoa i ta ratou i mohio ai: nga kai whakarewa katoa whakama iho i te whakapakoko: he mea teka hoki tana i whakarewa ai, kahore hoki he wairua i roto i a ratou.
- 15
- He horihori kau ratou, he mahi pohehe; i te wa e pa atu ai ia ki a ratou, ka ngaro ratou.
- 16
- Kahore e rite ki era te wahi i a Hakopa: ko ia hoki te kai whakaahua o nga mea katoa, ko Iharaira ano hoki te iwi o tona kāinga tupu, ko Ihowa o nga mano tona ingoa.
- 17
- Kohikohia atu o mea i te whenua, e te wahine e noho ana i te pa kaha.
- 18
- Ko te kupu hoki tenei a Ihowa, Tenei ahau te piupiu atu nei i nga tangata o te whenua i tenei wa, te whakatupu kino nei hoki i a ratou, kia kitea ai e ratou.
- 19
- Aue te mate i a au, mamae rawa toku marutanga: otiia kua mea nei ahau, He pono ko toku mate tenei, a me whakamanawanui.
- 20
- Kua pahuatia toku teneti, aku aho motumotu katoa: kua riro atu aku tamariki i toku taha, kua kore: kahore ake he tangata hei whakamaro i taku teneti, hei whakaara i oku kakahu tauarai.
- 21
- Kua poauau nei hoki nga hepara; kihai a Ihowa i rapua e ratou; no reira e kore e tika ta ratou, ka whakamararatia ano hoki a ratou kahui katoa.
- 22
- Nana, te haere mai nei te reo o nga korero, nui atu te whakaohooho, he mea ahu mai i te whenua ki te nota, hei mea i nga pa o Hura hei ururua, hei nohoanga mo nga tarakona.
- 23
- E mohio ana ano ahau, e Ihowa, kahore o te tangata ara i a ia ake ano: te tangata e haereere nei, e kore ia e tau hei whakatikatika i ona hikoinga.
- 24
- Pakia ahau, e Ihowa, me te whakariterite ano ia; kauaka ina riri koe, kei kahore ahau i a koe.
- 25
- Ringitia atu to riri ki runga ki nga tauiwi kahore nei o ratou matauranga ki a koe, ki runga ano i nga hapu kahore nei e karanga ki to ingoa, mo Hakopa ka pau i a ratou, pau rawa, moti rawa, tona nohoanga ano hoki whakaururuatia ana e ratou.
Address: 
Phone: 
Email: