Jeremiah Chapter 9 - Paipera Tapu 1868 | Te Paipera Tapu 1868

Jeremiah Chapter 9 - Paipera Tapu 1868

1
Aue, me he wai toku mahunga! me he puna roimata oku kanohi, kia tangihia ai e ahau nga tupapaku o te tamahine a toku iwi i te ao, i te po!
2
Aue, me he tihokahoka na te tira haere toku i te koraha! kia whakarerea ai e ahau toku iwi, kia haere atu ai ahau i roto i a ratou; he hunga puremu katoa nei hoki ratou, he huihuinga no te hunga tinihanga.
3
Me te mea he kopere na ratou o ratou arero e whakapikoa ana e ratou hei mea mo te korero teka; kahore ia o ratou maia mo te pono i runga i te whenua; engari e koni atu ana i te kino ki te kino, kahore hoki o ratou mohiotanga ki a au, e ai ta Ihowa.
4
Kia tupato koutou i o koutou hoa, e tenei, e tenei, kaua hoki e whakawhirinaki ki tetahi tuakana, ki tetahi teina: no te mea he maminga rawa ta nga tuakana, ta nga teina katoa; kei runga ano hoki i te ngau-tuara te haere o nga hoa katoa.
5
Ka tinihangatia e ratou tona hoa, tona hoa, kahore hoki he pono o te korero; kua whakaakona e ratou o ratou arero ki te korero teka; mahi he ana ratou, a hoha noa.
6
Kei waenga tinihanga koe e noho ana: na te tinihanga ratou tē pai ai ki te mohio ki a au, e ai ta Ihowa.
7
Na ko te kupu tenei a Ihowa o nga mano, Nana, ka whakarewa ahau i a ratou, ka whakamatau i a ratou; me pehea hoki ahau, ko te tamahine nei ia a toku iwi?
8
Ano he pere kua koperea atu to ratou arero, he korero tinihanga tana: kei tona mangai te kupu pai ki tona hoa; to roto iho i a ia he whanga mona.
9
E kore ianei ahau e whiu i a ratou mo enei mea? e ai ta Ihowa; e kore ianei toku wairua e rapu utu i te iwi penei?
10
He whakaaro ki nga maunga i ara ai taku tangi, taku aue, he whakaaro ki nga puninga o te koraha taku uhunga; no te mea kua wera, kahore tetahi tangata e tika na reira, kahore e rangona te reo o nga kararehe; nga manu o te rangi, nga kararehe, putere atu ana ratou, kua riro.
11
Ka meinga ano e ahau a Hiruharama hei puranga, hei nohoanga mo nga tarakona, ka meinga ano e ahau nga pa o Hura kia ururuatia, tē ai he tangata hei noho.
12
Ko wai te tangata whakaaro nui e matau ana ki tenei? i korerotia ano hoki ki a wai e te mangai o Ihowa? mana e whakaatu mai, he aha ra te whenua i whakangaromia ai, i wera ai, ano ko te koraha, kahore he tangata e tika ana i reira?
13
Ano ra ko Ihowa, Mo ratou i whakarere i taku ture i hoatu e ahau ki to ratou aroaro, a kihai i whakarongo ki toku reo, kihai i haere i taua ara.
14
Na, haere ana ratou i nga tikanga maro o o ratou ngakau; kei te whai i a Paarimi i whakaakona nei e o ratou mātua ki a ratou.
15
Na, ko te kianga mai a Ihowa o nga mano a te Atua o Iharaira, Tenei au te whangai nei i a ratou, i tenei iwi, ki te womawori, te whakainu nei i a ratou ki te wai kawa.
16
Ka whakamararatia ano ratou e ahau ki roto ki nga iwi kihai nei i mohiotia e ratou, e o ratou mātua: ka ungā atu ano e ahau te hoari hei whai i a ratou, a poto noa ratou i a au.
17
Ko te kupu tenei a Ihowa o nga mano, Whakaaroa e koutou, karangatia hoki nga wahine tangi kia haere mai; unga tangata ano hoki ki nga wahine whakaaro nui kia haere mai.
18
Kia hohoro ano te ara o ta ratou tangi mo tatou, kia tarere ai nga roimata o o tatou kanohi, kia maturuturu iho ai nga wai o o tatou kamo.
19
No te mea e rangona ana te reo tangi i Hiona, Ano to tatou pahuatanga! Nui atu to tatou whakama, no te mea kua mahue i a tatou te whenua, no te mea kua akiritia mai tatou e o tatou nohoanga.
20
Whakarongo ra ia, e nga wahine, ki te kupu a Ihowa, kia riro atu ano te kupu a tona mangai i o koutou taringa; whakaakona ano hoki a koutou tamahine ki te tangi, nga hoa o tenei, o tenei, ki te uhunga.
21
No te mea kua tae ake te mate ki roto ki o tatou matapihi, kua tomo ki roto ki o tatou whare kingi, hautepe atu ai i nga kohungahunga i waho, i nga taitamariki ano hoki i nga huanui.
22
Korero, Ko te kupu tenei a Ihowa, Tera nga tinana o nga tangata e hinga, ano he whakawairakau ki runga ki te mata o te mara, ano he kutanga witi i muri i te kai tapahi, a, kahore he kai kohi.
23
Ko te kupu tenei a Ihowa, Kaua te tangata whakaaro nui e whakamanamana ki tana whakaaro nui, kaua hoki te marohirohi e whakamanamana ki tona marohirohi; kaua te tangata taonga e whakamanamana ki ona taonga.
24
Engari ko tenei hei whakamanamananga ma te tangata whakamanamana, ara, kua whai whakaaro ia, kua mohio ki a au ko Ihowa ahau, ko te kai mahi o te mahi tohu, o te whakarite whakawa, o te tika i runga i te whenua: ko aku hoki enei e whakaahuareka atu ai, e ai ta Ihowa.
25
Nana, kei te haere mai nga ra, e ai ta Ihowa, e whiua ai e ahau te hunga katoa i kotia, ratou ko te hunga kihai i kotia;
26
Ko Ihipa, ko Hura, ko Eroma, nga tamariki a Amono, ko Moapa, ko te hunga katoa i nga pito whakamutunga e noho ana i te koraha: he mea kokoti-kore hoki enei iwi katoa; te whare katoa ano hoki o Iharaira, he mea kokoti-kore te ngakau.