- 1
- I taua wa ano, e ai ta Ihowa, ka whakaputaina mai e ratou ki waho nga wheua o nga kingi o Hura, me nga wheua o ona rangatira, me nga wheua o nga tohunga, me nga wheua o nga poropiti, me nga wheua o nga tangata o Hiruharama i roto i o ratou tanumanga.
- 2
- Ka titaritaria atu ano hoki e ratou ki mua i te ra, i te marama, i te mano katoa o te rangi, i ā ratou i aroha ai, i mahi atu ai, i whai atu ai, i rapu ai, i koropiko atu ai: e kore e kohikohia, e kore e tanumia; ka waiho hei whakawairakau ki runga ki te mata o te oneone.
- 3
- A pai ake te mate i te ora ki ta nga morehu katoa, ki ta nga toenga o tenei hapu kino e toe ki nga wahi katoa e peia atu ai ratou e ahau, e ai ta Ihowa o nga mano.
- 4
- Mea atu ano ki a ratou, Ko te kupu tenei a Ihowa, Ka hinga ranei ratou, a kore ake e ara? ka tahuri atu ranei ia, a kore ake e tahuri mai?
- 5
- He aha tenei iwi o Hiruharama i tahuri ke ai, a mau tonu iho te tahuri ke? e hopukia atu ana e ratou te tinihanga, kahore e pai ki te hoki mai.
- 6
- I whakarongo atu ahau, i rongo ano, kihai i tika a ratou korero, kihai tetahi i ripeneta ki tana kino, kihai i mea, He aha taku i mea ai? anga ana te katoa ki tana oma, ki tana oma, pera ana me te hoiho e kokiri atu ana ki te tatauranga.
- 7
- Te tāka nei ano i te rangi, e mohio ana ia ki nga wa i whakaritea mona, te kukupa ano hoki, te kareni, me te warou, mahara tonu ratou ki te wa e haere mai ai ratou; taku iwi ia kahore ratou e mohio ki ta Ihowa i whakarite ai.
- 8
- He pehea ta koutou e ki ra, He hunga whakaaro nui tatou, kei a tatou ano te ture a Ihowa? Nana, maumau mahi noa ia; ta te pene a nga kai tuhituhi he maumau.
- 9
- Te hunga whakaaro nui, whakama ana ratou, wehi noa iho ratou, hopukia iho; nana, kua whakaparahako nei ratou ki te kupu a Ihowa, a he pehea te whakaaro nui i roto i a ratou?
- 10
- Mo reira ka hoatu e ahau a ratou wahine ma nga tangata ke, a ratou mara ki nga tangata mona te wahi; no te mea, te iti, te rahi, ratou katoa, kei te apo mea ma ratou; te poropiti, te tohunga, ratou katoa, kei te mahi teka.
- 11
- Ta ratou rongoatanga ano hoki i te pakaru o te tamahine a toku iwi he mea hangareka noa iho, e mea ana, Ka mau te rongo, ka mau te rongo; i te mea kahore he maunga rongo.
- 12
- I whakama ranei ratou i ta ratou mahinga i te mea whakarihariha? Hore rawa o ratou whakama; kahore hoki ratou e mohio ki te numinumi; mo reira ka hinga ratou i roto i te hunga e hinga ana; i te wa e whiua ai ratou, ka tūtuki o ratou waewae, e ai ta Ihowa.
- 13
- Ka moti rawa ratou i a au, e ai ta Ihowa: kahore he karepe mo te waina, kahore he piki mo te piki; ka memenge ano te rau; nga mea ano hoki e hoatu e ahau ki a ratou, ka pahemo atu.
- 14
- He aha tatou i noho tonu ai? huihui koutou, kia haere tatou ki nga pa kaha, ki reira whakamoroki kau ai: no te mea kua kore i a Ihowa i to tatou Atua he kupu ma tatou, whakainumia ana tatou e ia ki te wai kawa; no te mea kua hara tatou ki a Ihowa.
- 15
- Tatari noa tatou ki te rongo mau; heoi kahore he pai; ki te wa e ora ai nga mate, na ko te raruraru.
- 16
- I rangona atu i Rana te whenua o ona hoiho; ngateri ana te whenua katoa i te reo o ana mea kaha e hamama ana; to ratou haerenga mai, pau ake i a ratou te whenua me ona mea maha, te pa me nga tangata ano o roto.
- 17
- No te mea tenei au ka ngare atu nei i nga nakahi ki a koutou, i nga neke e kore nei e whakawaia; a ka ngau ratou i a koutou, e ai ta Ihowa.
- 18
- I taku meatanga ki te whakamarie i a au, i te mea ka pouri nei, kore noa iho toku ngakau i roto i a au.
- 19
- Nana, he reo tangi no te tamahine a toku iwi, he meatanga ki te hunga i te whenua tawhiti! He teka ianei kei roto a Ihowa i Hiona? he teka ianei kei roto tona kingi i a ia? He aha ratou i whakapataritari ai i a au ki ā ratou whakapakoko, ki nga horihori a te tangata he?
- 20
- Kua pahemo te kotinga witi, kua taka te raumati; ko tatou, kahore he whakaoranga mo tatou.
- 21
- He mamae atu ki te tamahine a toku iwi i mamae ai ahau, mangu iho ahau, mau pu ahau i te miharo.
- 22
- Kahore ianei he pāma i Kireara? Kahore ianei o reira rata? he aha ra te tamahine a toku iwi tē neke ake ai ki te ora?
Address: 
Phone: 
Email: