- 1
- Te kupu i puta mai ki a Heremaia, he mea na Ihowa, i te ngarenga mai a Kingi Terekia i a Pahuru tama a Merekia, ratou ko Tepania tama a Maaheia tohunga ki a ia, hei ki atu,
- 2
- Tena ra, rapua tetahi tikanga i a Ihowa ma tatou; kei te whawhai nei hoki a Nepukararetara kingi o Papurona ki a tatou. Tera pea ta Ihowa mahi ki a tatou e rite ki ana mea whakamiharo katoa, a ka haere atu ia i to tatou wahi.
- 3
- Na, ko te kianga atu a Heremaia ki a ratou, Ko ta koutou tenei e korero ai ki a Terekia:
- 4
- Ko te kupu tenei a Ihowa, Atua o Iharaira, Nana, ka whakahokia atu e ahau nga patu mo te whawhai i roto i o koutou ringaringa, a koutou mo te whawhai ki te kingi o Papurona, ki nga Karari, e whakapae mai nei i a koutou i waho o te taiepa, ka huihuia ano hoki ratou e ahau ki waenganui o tenei pa.
- 5
- Ko ahau nei ano hei whawhai ki a koutou, maro tonu te ringaringa, kaha tonu te tākakau, i runga i te riri, i te weriweri, i te aritarita nui.
- 6
- Ka patua ano e ahau nga tangata o tenei pa, te tangata, te kararehe: he nui te mate uruta e mate ai ratou.
- 7
- Muri iho, e ai ta Ihowa, ka hoatu e ahau a Terekia kingi o Hura ratou ko ana tangata, ko te iwi me te hunga ano i roto i tenei pa e toe i te mate uruta, i te hoari, i te hemo-kai, ki te ringaringa o Nepukararetara kingi o Papurona, ki te ringaringa o o ratou hoa whawhai, ki te ringaringa ano o te hunga e whai ana kia whakamatea ratou: a ka patua ratou e ia ki te mata o te hoari, e kore ratou e tohungia e ia, e kore e manawapatia, e kore e arohaina.
- 8
- Me ki atu ano e koe ki tenei iwi, Ko te kupu tenei a Ihowa, Tenei au te whakatakoto nei i te huarahi ki te ora ki to koutou aroaro, me te huarahi ano ki te mate.
- 9
- Te tangata e noho ana i tenei pa, ka mate i te hoari, i te hemo-kai, i te mate uruta; na, te tangata e haere atu ana, a ka riro i nga Karari e whakapae nei i a koutou, ka ora ia, a, tona oranga nei hei taonga parakete ki a ia.
- 10
- No te mea kua u atu nei toku mata ki tenei pa hei kino, kahore hoki he pai, e ai ta Ihowa: ka hoatu ki te ringaringa o te kingi o Papurona, a ka tahuna e ia ki te ahi.
- 11
- Na, te mea mo te whare o te kingi o Hura, whakarongo ki te kupu a Ihowa;
- 12
- E te whare o Rawiri, ko te kupu tenei a Ihowa, Whakaritea te whakawa i te ata; te tangata hoki e pahuatia ana whakaorangia ake ia i roto i te ringa o te kai tukino: kei puta atu taku riri ano he ahi, a, ka kā, tē taea te tinei, mo te kino hoki o a koutou mahi.
- 13
- Nana, hei hoa riri ahau mou, e te wahine e noho ra i te raorao, i te kamaka o te wahi papatairite, e ai ta Ihowa; na koutou hoki te kupu, Ko wai e haere mai ki a tatou? ko wai e tomo ki roto ki o tatou nohoanga?
- 14
- Otiia ka rite ki nga hua o a koutou mahi taku whiu i a koutou, e ai ta Ihowa, ka ngiha ano i a au he ahi i to kona ngahere, e pau ai nga mea katoa, a taka noa, taka noa.
Address: 
Phone: 
Email: