- 1
- Ko te kupu tenei a Ihowa, Haere ki raro ki te whare o te kingi o Hura, ka korero i tenei kupu ki reira,
- 2
- Mea atu, Whakarongo ki te kupu a Ihowa, e te kingi o Hura, e noho na i runga i te torona o Rawiri, koutou ko o tangata ko to iwi e tomo ana ki roto ki enei kuwaha;
- 3
- Ko te kupu tenei a Ihowa, Whakaritea te whakawa, kia tika, whakaorangia te tangata e pahuatia ana i roto i te ringa o te kai tukino: kaua e whakatetetetea, kaua e whakatupuria kinotia te manene, te pani, te pouaru, kaua ano hoki e whakahekea te toto hara-kore ki tenei wahi.
- 4
- No te mea ki te mahia marietia tenei mea e koutou, katahi ka tomo ki roto ki nga kuwaha o tenei whare nga kingi e noho ana i runga i te torona o Rawiri, e eke ana ki runga ki nga hariata, ki nga hoiho, a ia, ana tangata, me tona iwi.
- 5
- Tena ko tenei e kore koutou e whakarongo ki enei kupu, hei oati tenei ahau ki a au ano, e ai ta Ihowa, ka takoto kau noa iho tenei whare.
- 6
- No te mea ko te kupu tenei a Ihowa mo te whare o te kingi o Hura, Ko Kireara koe ki a au, ko te tihi o Repanona; heoi tera rawa koe ka meinga e ahau hei koraha, hei pa e kore e nohoia.
- 7
- Ka rite ano i a au nga kai whakangaro mou, rite rawa ratou i tana patu, i tana patu: a ka tuaina e ratou o hita papai, ka makā ki runga ki te ahi.
- 8
- He maha ano hoki nga iwi e haere i te taha o tenei pa, e mea ki tona hoa, ki tona hoa, Na te aha tenei i meatia ai e Ihowa ki tenei pa nui?
- 9
- Katahi ratou ka ki ake, Mo ratou i whakarere i te kawenata o Ihowa o to ratou Atua, a koropiko ana ki nga atua ke, mahi atu ana ki a ratou.
- 10
- Kaua e tangihia te tupapaku, kaua hoki ia e uhungatia. Kia nui te tangi mo te tangata e haere atu ana; no te mea e kore ia e hoki mai i muri, e kore ano e kite i te whenua i whanau ai ia.
- 11
- No te mea ko te kupu tenei a Ihowa mo Harumu tama a Hohia, kingi o Hura, i kingi nei i muri i tona pāpā, i a Hohia, a haere atu ana i tenei wahi; E kore ia e hoki mai ki konei, a ake ake ake:
- 12
- Engari, te wahi i whakaraua atu ai ia, ka mate ia ki reira; e kore ano ia e kite i tenei whenua, a ake ake.
- 13
- Aue te mate mo te tangata kahore nei e tika ina hangā e ia tona whare, kahore ano hoki he whakarite whakawa, ina mahia e ia ona ruma; e whakamahi ana i tona hoa, he mea utu-kore, a kahore e hoatu ta tana mahi ki a ia;
- 14
- E mea ana, Ka hangā e ahau he whare nui moku, he tiketike nga ruma, pokaia ana he matapihi i roto; he hita te hipoki, pania ana e ia ki te whero pai.
- 15
- E kingi ranei koe, no te mea e whakataetae ana koe ki nga hita? kihai ianei to pāpā i kai, i inu, i whakarite i te whakawa, i te tika? na, he pai tana i reira?
- 16
- I whakaritea e ia te whakawa a te ware, a te rawa-kore; he pai tana i reira: he teka ianei ko te mohiotanga tenei ki a au? e ai ta Ihowa.
- 17
- Kahore hoki ou kanohi, ou ngakau mo tetahi mea ke atu, ko to apo anake, ko te whakaheke i te toto hara-kore, ko te tukino, ko te tutu, hei mahi mau.
- 18
- Mo reira ko ta Ihowa kupu tenei mo Iehoiakimi tama a Hohia kingi o Hura, Kahore he tangi mona, Aue, e toku tuakana! aue e te tuahine! kahore he tangi mona, Aue, te ariki! Aue, tona kororia!
- 19
- He tanumanga kaihe te tanumanga mona, ka toia, ka makā atu ki waho noa atu i nga kuwaha o Hiruharama.
- 20
- E piki i Repanona tangi ai, kia puaki ano hoki tou reo i Pahana, e tangi ano i nga taha katoa; kua mongamonga noa nei hoki te hunga katoa i aroha ki a koe.
- 21
- I korero ahau ki a koe i tou rangimarietanga, a i mea koe, E kore ahau e rongo. Ko to tikanga tenei no to taitamarikitanga ake, kihai hoki koe i whakarongo ki toku reo.
- 22
- Ka kainga e te hau o hepara katoa, ka riro hoki te hunga i arohaina ai koe ki te whakaraunga, katahi rawa koe ka whakama, ka numinumi kau ki to kino katoa.
- 23
- E te wahine e noho na i Repanona, e hanga na i to kohanga ki nga hita, ano te nui o tou ataahua ina tae mai nga mamae ki a koe, nga mamae e rite ana ki o te wahine e whanau ana!
- 24
- E ora ana ahau, e ai ta Ihowa, ahakoa he ringi i runga i toku ringa matau a Konia tama a Iehoiakimi kingi o Hura, ka unuhia atu koe e ahau i reira;
- 25
- Ka hoatu ano koe e ahau ki te ringaringa o te hunga e whai ana kia whakamatea koe, ki te ringa ano o te hunga e wehi na koe i to ratou mate, ki te ringaringa hoki o Nepukararetara kingi o Papurona, ki te ringaringa ano o nga Karari.
- 26
- Ka akiritia atu ano koe e ahau, me to whaea ano i whanau ai koe, ki tetahi atu whenua ehara nei i te wahi i whanau ai koutou, a ka mate koutou ki reira.
- 27
- Na, te whenua, i okaka tonu ai o ratou ngakau kia hoki ki reira, e kore ratou e hoki ki reira.
- 28
- Tenei tangata a Konia, he whakapakoko ranei ia e whakahaweatia ana, he mea pakaru? he oko ranei ia e kore e matenuitia? he aha ratou i akiritia atu ai, ratou ano ko ona uri? kua makā atu nei ratou ki te whenua kihai i mohiotia e ratou.
- 29
- E te whenua, e te whenua, e te whenua, whakarongo ki te kupu a Ihowa.
- 30
- Ko te kupu tenei a Ihowa, Tuhituhia tenei tangata he uri-kore, he tangata e kore e oti pai tana i nga ra e ora ai ia: e kore hoki e oti pai ta tetahi o ona uri e noho ana i runga i te torona o Rawiri, e kingi ana i nga ra e takoto ake nei i roto i a Hura.
Address: 
Phone: 
Email: