Jeremiah Chapter 26 - Paipera Tapu 1868 | Te Paipera Tapu 1868

Jeremiah Chapter 26 - Paipera Tapu 1868

1
I te timatanga o te kingitanga o Iehoiakimi tama a Hohia kingi o Hura, ka puta mai tenei kupu i a Ihowa; i mea ia,
2
Ko te kupu tenei a Ihowa, E tu ki te marae o te whare o Ihowa, korerotia atu ki nga pa katoa o Hura e haere mai ana ki te koropiko i roto i te whare o Ihowa nga kupu katoa e whakahaua atu nei e ahau ki a koe kia korerotia atu ki a ratou; kaua tetahi kupu e kaiponuhia atu:
3
Me kahore ratou e whakarongo, e tahuri mai ia tangata, ia tangata, i o ratou ara kino, a ka ripeneta ahau ki te kino e mea nei ahau kia meatia ki a ratou mo te kino o a ratou mahi.
4
Kia penei ano to ki atu ki a ratou, Ko te kupu tenei a Ihowa, Ki te kahore koutou e whakarongo ki a au, ara, e haere i runga i taku ture i hoatu e ahau ki to koutou aroaro,
5
E whakarongo ano ki nga kupu a aku pononga, a nga poropiti i ungā atu nei e ahau ki a koutou, i a au i maranga wawe ra, i unga atu i a ratou, a kihai na koutou i whakarongo mai;
6
Na ka meinga e ahau tenei whare kia rite ki Hiro, ka meinga ano e ahau tenei pa hei kanga ma nga iwi katoa o te whenua.
7
A, te rongonga o nga tohunga, o nga poropiti, ratou ko te iwi katoa i a Heremaia e korero ana i enei kupu i te whare o Ihowa.
8
Na, te mutunga o ta Heremaia korerotanga i nga mea katoa i whakahaua ai ia e Ihowa kia korerotia ki te iwi katoa, na, ka hopukia atu ia e nga tohunga ratou ko nga poropiti, ko te iwi katoa, a ka ki mai ratou, Ko te mate kau mou.
9
He aha koe i poropiti ai i runga i te ingoa o Ihowa? he aha koe i ki ai, Ka rite tenei whare ki Hiro, ka ururuatia ano hoki tenei pa, tē ai he tangata hei noho? Na, ko te huihuinga mai o te iwi katoa ki a Heremaia ki te whare o Ihowa.
10
A, te rongonga o nga rangatira o Hura ki enei mea, na haere mai ana ratou i te whare o te kingi ki te whare o Ihowa, a noho ana i te kuwaha o te kēti hou o te whare o Ihowa.
11
Na, ko te korerotanga a nga tohunga ratou ko nga poropiti ki nga rangatira ratou ko te iwi katoa; i ki mai ratou, Ka tika te mate mo tenei tangata, kua poropiti hoki ia i te he mo tenei pa; kua rongo na hoki o koutou taringa.
12
Na, ko te kianga mai a Heremaia ki nga rangatira katoa, ratou ko te iwi katoa, i ki mai ia, Na Ihowa ahau i unga mai ki te poropiti i nga kupu katoa i rongo ra koutou mo tenei whare, mo tenei pa.
13
Na, tena, kia pai o koutou ara, a koutou mahi, whakarongo hoki ki te reo o Ihowa o to koutou Atua, a ka ripeneta a Ihowa ki te kino i korerotia e ia mo koutou.
14
Ko au nei kei roto nei ahau i to koutou ringaringa, ma koutou e mea mai ki a au te mea e pai ana, e rite ana ki ta koutou titiro iho.
15
Otiia kia tino mohio koutou ki te whakamate koutou i a au, ka heke i a koutou he toto hara-kore ki runga ki a koutou, ki tenei pa ano hoki, ki ona tangata ano hoki, no te mea he pono ta Ihowa ngarenga i a au ki a koutou ki te korero i enei kupu katoa ki o koutou taringa.
16
Na, ko te kianga ake a nga rangatira, ratou ko te iwi katoa ki nga tohunga ratou ko nga poropiti, Kahore he take e mate ai tenei tangata; engari kua korero mai ia ki a tatou i runga i te ingoa o Ihowa o to tatou Atua.
17
I whakatika ano etahi o nga kaumatua o te whenua, i korero atu ki te huihui katoa o te iwi, i mea,
18
I poropoti a Mika Morahati i nga ra o Hetekia kingi o Hura, i korero ki te iwi katoa o Hura, i mea, Ko te kupu tenei a Ihowa o nga mano, Ka parautia a Hiona, ka rite ki te mara, hei puranga ano hoki a Hiruharama, ka rite ano hoki te maunga o te whare ki nga wahi tiketike o te ngahere.
19
I anga ranei a Hetekia kingi o Hura ratou ko Hura katoa, ki te whakamate i a ia? he teka ianei i wehi ia i a Ihowa, a inoi ana ki te mata o Ihowa, a ripeneta ana a Ihowa ki te kino i korerotia e ia mo ratou? Na, tatou nei, he nui te kino e meatia ana e tatou ki o tatou wairua.
20
Na, i poropiti ano hoki tetahi tangata i runga i te ingoa o Ihowa, a Uriia tama a Hemaia o Kiriata-tearimi; i poropititia e ia he hē mo tenei pa, mo tenei whenua, he penei ano me nga kupu katoa a Heremaia.
21
A, te rongonga o kingi Iehoiakimi ratou ko ana metararahi, ko nga rangatira katoa, i ana kupu, ka whai te kingi kia whakamatea ia, a, te rongonga o Uriia, ka wehi, ka rere, a haere ana ki Ihipa.
22
Na, ungā atu ana e Iehoiakimi etahi tangata ki Ihipa, a Erenatana tama a Akaporo, ratou ko ona hoa ki Ihipa.
23
Na, tikina atu ana e ratou a Uriia i Ihipa, kawea mai ana ki a kingi Iehoiakimi; patua iho e ia ki te hoari, makā atu ana e ia tona tinana ki nga tanumanga o nga tamariki a te iwi.
24
I a Heremaia ano ia te ringaringa o Ahikama tama a Hapana, i kore ai ia e tukua atu ki te ringaringa o te iwi kia whakamatea.