Jeremiah Chapter 27 - Paipera Tapu 1868 | Te Paipera Tapu 1868

Jeremiah Chapter 27 - Paipera Tapu 1868

1
I te timatanga o te kingitanga o Iehoiakimi tama a Hohia kingi o Hura ka puta mai tenei kupu a Ihowa ki a Heremaia, i mea ia,
2
Ko te kupu tenei a Ihowa ki a au, Hangā etahi here, etahi ioka mou; ka whakanoho ai ki runga ki to kaki.
3
Ungā atu hoki kia kawea ki te kingi o Eroma, ki te kingi o Moapa, ki te kingi o nga tamariki a Amono, ki te kingi ano o Taira, ki te kingi ano hoki o Hairona: ma nga karere e haere mai ana ki Hiruharama ki a Terekia kingi o Hura e mau.
4
Me whakahau ano ratou e koe kia ki atu ki o ratou ariki, Ko te kupu tenei a Ihowa o nga mano Atua o Iharaira, Kia penei ta koutou ki atu ki o koutou ariki,
5
Naku i hanga te whenua, te tangata, me te kararehe i runga i te mata o te whenua, he meatanga na toku kaha nui, na toku ringa kua oti te whakamaro; a hoatu ana e ahau ki te tangata i whakatikaia atu e oku kanohi.
6
Na, inaianei kua oti te hoatu e ahau enei whenua katoa ki te ringaringa o taku pononga, o Nepukaneha kingi o Papurona, kua hoatu ano hoki e ahau nga kirehe o te parae ki a ia kia whakamahia e ia.
7
Ka mahi ano hoki nga iwi katoa ki a ia, ki tana tama, ki te tama ano a tana tama, kia taka ra ano te tino wa o tona whenua. No reira he tini nga iwi, he nui nga kingi, e whakamahi i a ia.
8
Na, te iwi, te kingitanga, e kore e mahi ki a ia ki a Nepukaneha kingi o Papurona, a e kore e tukua mai o ratou kaki ki raro i te ioka o te kingi o Papurona, ka whiua e ahau taua iwi, e ai ta Ihowa, ki te hoari, ki te hemo-kai, ki te mate uruta, kia moti ra ano ratou i tona ringa.
9
Na, kaua koutou e whakarongo ki o koutou poropiti, ki o koutou tohunga tuāhu, ki o koutou moemoea, ki o koutou tohunga kapua, ki o koutou tohunga makutu, e korero na ki a koutou, e mea na, E kore koutou e mahi ki te kingi o Papurona:
10
No te mea e poropiti teka ana ratou ki a koutou, he mea kia matara atu ai koutou i to koutou oneone, kia peia atu hoki koutou e ahau, kia ngaro ai ano hoki koutou.
11
Na, te iwi e tukua mai o ratou kaki ki te ioka o te kingi o Papurona, a ka mahi ki a ia, ka waiho ratou e ahau ki to ratou oneone, e ai ta Ihowa, a ka ngakia e ratou, ka noho ano hoki ratou ki reira.
12
Na, rite tonu ki enei kupu katoa taku i korero ai ki a Terekia kingi o Hura, i mea ahau, Tukua atu o koutou kaki ki te ioka o te kingi o Papurona; e mahi ki a ia ratou ko tona iwi, kia ora ai koutou.
13
Kia mate koutou hei aha, koutou ko to iwi i te hoari, i te hemo-kai, i te mate uruta, i ta Ihowa i ki ai mo te iwi e kore nei e mahi ki te kingi o Papurona?
14
Kaua hoki e whakarongo atu ki nga kupu a nga poropiti e korero na ki a koutou, e mea na, E kore koutou e mahi ki te kingi o Papurona: e poropiti teka ana hoki ratou ki a koutou.
15
Kihai nei hoki ahau i unga i a ratou, e ai ta Ihowa, na, kei te poropiti teka ratou i runga i toku ingoa, he mea kia peia atu ai koutou e ahau, kia ngaro ai koutou, koutou ko nga poropiti e poropiti na ki a koutou.
16
I korero ano ahau ki nga tohunga, ki tenei iwi katoa, i mea, Ko te kupu tenei a Ihowa, Kei whakarongo koutou ki nga kupu a o koutou poropiti e poropiti na ki a koutou, e mea na, Tenei ka tata te whakahokinga mai o nga oko o te whare o Ihowa i Papurona: he poropiti teka hoki ta ratou ki a koutou.
17
Kei whakarongo ki a ratou; e mahi ki te kingi o Papurona, kia ora ai koutou: kia ururuatia tenei pa hei aha?
18
Na, ki te mea he poropiti ratou, ki te mea kei a ratou te kupu a Ihowa, ma ratou e inoi ki a Ihowa o nga mano kia kaua nga oko kua mahue nei ki te whare o Ihowa, ki te whare ano hoki o te kingi o Hura, ki Hiruharama, e tae ki Papurona.
19
Ko te kupu nei hoki tenei a Ihowa o nga mano mo nga pou, mo te moana; mo nga turanga, mo nga toenga o nga oko kua mahue nei ki tenei pa.
20
Kihai nei i riro i a Nepukaneha kingi o Papurona i tana whakaraunga atu i a Hekonia tama a Iehoiakimi kingi o Hura i roto i Hiruharama ki Papurona, ratou ko nga rangatira katoa o Hura, o Hiruharama;
21
Ina, ko te kupu tenei a Ihowa o nga mano, Atua o Iharaira, mo nga oko ka mahue nei ki te whare o Ihowa ki te whare ano hoki o te kingi o Hura, ki Hiruharama ano hoki;
22
Ka tae aua mea ki Papurona, ka takoto ano ki reira, taea noatia te ra e pa atu ai ahau ki a ratou, e ai ta Ihowa; katahi ka kawea mai e ahau, ka whakahokia mai ano ki tenei wahi.