- 1
- Te kupu i puta mai ki a Heremaia, he mea na Ihowa, i nga ra o Iehoiakimi tama a Hohia kingi o Hura; i mea ia,
- 2
- Haere ki te whare o nga Rekapi, ka korero ki a ratou, ka kawe mai i a ratou ki te whare o Ihowa ki tetahi o nga ruma, ka whakainu i a ratou ki te waina.
- 3
- Katahi ka tikina atu e ahau a Iaatania tama a Heremaia, tama a Hapatinia, ratou ko ona teina, ko ana tamariki katoa, ko te whare katoa ano hoki o nga Rekapi;
- 4
- A kawea mai ana ratou e ahau ki te whare o Ihowa, ki te ruma o nga tama a Hanana tama a Ikiraria, a tetahi tangata a te Atua, ki tera i te taha o te ruma o nga rangatira, i runga ake i te ruma o te kai tiaki o te tatau, o Maaheia tama a Harumu:
- 5
- A whakatakotoria atu ana e ahau etahi pāta ki te aroaro o nga tamariki o te whare o nga Rekapi, ki tonu i te waina, me etahi kapa. Na, ko taku meatanga atu ki a ratou, Inumia he waina.
- 6
- Ano ra ko ratou, E kore matou e inu waina; i ako mai nei hoki to matou pāpā a Ionarapa tama a Rekapa ki a matou, i mea, Kei inu waina koutou, koutou ko a koutou tamariki, a ake ake ake.
- 7
- Kaua ano hoki koutou e hanga whare, kaua e whakatokia he purapura, kaua ano hoki e whakatokia he mara waina, kaua ano he pena ma koutou; engari, i o koutou ra katoa, me noho koutou i roto i te teneti, kia maha ai nga ra e ora ai koutou ki runga ki te mata o te oneone e noho manene nei koutou.
- 8
- Na, rongo tonu matou ki te reo o to matou pāpā, o Ionarapa tama a Rekapa, ki nga mea katoa i whakahau mai ai ia ki a matou, ara, kia kaua e inu waina i o matou ra katoa, matou, a matou wahine, a matou tamariki, a matou tamahine;
- 9
- Kia kaua ano hoki e hanga whare hei nohoanga iho mo matou: kahore ano hoki a matou mara waina, mara ke ranei, kahore ano he purapura;
- 10
- Na, o matou nohoanga iho he teneti, rongo tonu matou, mahia ana e matou nga mea katoa i whakahaua mai e to matou pāpā, e Ionarapa, ki a matou.
- 11
- Na, i te mea ka whakaekea mai te whenua e Nepukararetara kingi o Papurona, ka mea matou, Haere mai, tatou ka haere ki Hiruharama, kei mate i te ope a nga Karari, i te ope ano a nga Hiriana. Na, noho ana matou i Hiruharama.
- 12
- Na, ko te putanga o te kupu a Ihowa ki a Heremaia; i mea ia,
- 13
- Ko te kupu tenei a Ihowa o nga mano, Atua o Iharaira; Haere, mea atu ki nga tangata o Hura, ki te hunga ano hoki e noho ana i Hiruharama, E kore ianei koutou e manako mai ki te ako, e whakarongo ki aku kupu, e ai ta Ihowa?
- 14
- Kua whakaritea nei nga kupu a Ionarapa tama a Rekapa, ana i whakahau ai ki ana tamariki kia kaua e inu waina; kihai hoki ratou i inu, a taea noatia tenei ra; rongo tonu ratou ki te ako a to ratou pāpā: ko au ia, i korero ahau ki a koutou; maranga wawe ana ahau, korero ana; heoi kihai koutou i whakarongo ki a au.
- 15
- I ungā atu ano e ahau aku pononga katoa nga poropiti, maranga wawe ana ahau, ungā ana ratou e ahau; i mea ahau, Tahuri mai ra, e tera tangata, e tera tangata, i o koutou ara kino, kia pai ano hoki a koutou mahi, kaua hoki e whaia nga atua ke; kaua e mahi ki a ratou, e noho hoki ki te whenua i hoatu e ahau ki a koutou ko o koutou mātua; heoi kihai i anga mai o koutou taringa, kihai ano koutou i whakarongo ki a au.
- 16
- Na, kua whakamanā nei e nga tama a Ionarapa tama a Rekapa te ako a to ratou pāpā i ako atu ai ia ki a ratou; tenei iwi ia, kihai ratou i whakarongo ki a au:
- 17
- Mo reira ko te kupu tenei a Ihowa Atua o nga mano, Atua o Iharaira, Nana, ka kawea mai e ahau ki a Hura, ki te hunga ano hoki e noho ana i Hiruharama, nga kino katoa i korerotia e ahau mo ratou: no te mea i korero atu ahau ki a ratou, a kihai ratou i whakarongo mai, i karanga ahau ki a ratou, a kihai ratou i whakao mai.
- 18
- I mea ano a Heremaia ki te whare o nga Rekapi, Ko te kupu tenei a Ihowa o nga mano, Atua o Iharaira, Na, i whakarongo na koutou ki te ako a to koutou pāpā a Ionarapa, i pupuri hoki i ana ako katoa, i mahi i nga mea katoa i akona mai e ia ki a koutou.
- 19
- Mo reira ko te kupu tenei a Ihowa o nga mano, Atua o Iharaira, E kore e whakakorea he tangata ma Ionarapa tama a Rekapa, hei tu ki toku aroaro i nga ra katoa.
Address: 
Phone: 
Email: