- 1
- Na, i te wha o nga tau o Iehoiakimi tama a Hohia kingi o Hura, ka puta mai tenei kupu ki a Heremaia, he mea na Ihowa, i mea ia,
- 2
- Tikina tetahi pukapuka māu, ka tuhituhi ai ki reira i nga kupu katoa i korerotia e ahau ki a koe mo Iharaira, mo Hura, mo nga iwi katoa, o te rangi ra ano i korero ai ahau ki a koe, o nga rangi ano i a Hohia, a tae noa iho ki tenei ra.
- 3
- Tera pea te whare o Hura e whakarongo ki te kino katoa e whakaaro nei ahau kia meatia ki a ratou, a ka tahuri mai ia tangata, ia tangata, i ā ratou ara kino, a ka murua e ahau to ratou he, to ratou hara.
- 4
- Katahi a Heremaia ka karanga atu ki a Paruku, tama a Neria: a ko Paruku ki te tuhituhi ki te pukapuka, ko Heremaia hei korero i nga kupu katoa a Ihowa i korerotia e ia ki a ia.
- 5
- Na, ka whakahau atu a Heremaia i a Paruku, ka mea, Kua tutakina nei ahau; e kore e ahei i a au te haere ki te whare o Ihowa.
- 6
- Engari mau e haere, e korero te pukapuka i tuhituhia e koe, taku i korero ai, nga kupu a Ihowa ki nga taringa o te iwi i roto i te whare o Ihowa i te ra noho puku: me korero ano e koe ki nga taringa a Hura katoa e haere mai ana i roto i o ratou pa.
- 7
- Tera pea ta ratou inoi e tae atu ki te aroaro o Ihowa, a ka hoki mai ratou i tana ara kino, i tana ara kino: he nui hoki te riri, te weriweri, i korerotia e Ihowa mo tenei iwi.
- 8
- Na, meatia ana e Paruku tama a Neria nga mea katoa i whakahaua ai ia e Heremaia poropiti, korerotia ana e ia i roto i te pukapuka nga kupu a Ihowa i roto ano i te whare o Ihowa.
- 9
- Na, i te rima o nga tau o Iehoiakimi tama a Hohia kingi o Hura, i te iwa o nga marama, ka karangatia e ratou he noho puku ki te aroaro o Ihowa ma te iwi katoa i Hiruharama, ma te iwi katoa i haere mai i roto i nga pa o Hura ki Hiruharama.
- 10
- Katahi ka korerotia e Paruku i roto i te pukapuka nga kupu a Heremaia i roto i te whare o Ihowa, i roto i te ruma o te kai tuhituhi, o Kemaria tama a Hapana, i to runga marae, i te kuwaha o te keti hou o te whare o Ihowa, me te whakarongo ano te iwi katoa.
- 11
- Te rongonga o Mikaia tama a Kemaria, tama a Hapana, ki nga kupu katoa a Ihowa i roto i te pukapuka,
- 12
- Na, ka haere ia ki raro ki te whare o te kingi ki te ruma o te kai tuhituhi, a i reira nga rangatira katoa e noho ana, a Erihama kai tuhituhi, ratou ko Teraia tama a Hemaia, ko Erenatana tama a Akaporo, ko Kemaria tama a Hapana, ko Terekia tama a Hanania, ko nga rangatira katoa ano hoki.
- 13
- A whakaaturia atu ana e Mikaia ki a ratou nga kupu katoa i rongo ai ia i te korerotanga a Paruku i te pukapuka ki nga taringa o te iwi.
- 14
- Katahi nga rangatira katoa ka unga atu i a Iehuri, tama a Netania, tama a Heremia, tama a Kuhi, ki a Paruku, hei mea atu, Te pukapuka i korerotia e koe ki nga taringa o te iwi, mauria mai i tou ringaringa, haere mai hoki. Na, mauria ana e Paruku tama a Neria te pukapuka i tona ringa, a haere mai ana ki a ratou.
- 15
- Na, ko ta ratou meatanga atu ki a ia, Tena ra, e noho, korerotia mai hoki ki o matou taringa. Na, korerotia atu ana e Paruku ki o ratou taringa.
- 16
- A to ratou rongonga ki nga kupu katoa, wehi ana ratou, tenei tangata, tenei tangata, a ka mea ki a Paruku, Ka korerotia marietia atu enei kupu katoa e matou ki te kingi.
- 17
- A i ui ano ratou ki a Paruku, i mea, Tena koa, whakaaturia mai ki a matou, I pehea to tuhituhinga i enei kupu katoa a tona mangai?
- 18
- Ano ra hoki ko Paruku ki a ratou, Na tona mangai enei kupu katoa i korero ki a au, a tuhituhia iho e ahau ki te mangumangu ki roto ki te pukapuka.
- 19
- Katahi nga rangatira ka ki atu ki a Paruku; Haere atu ki te piri, korua ko Heremaia, kaua hoki tetahi tangata e mohio kei hea korua.
- 20
- Na, haere ana ratou ki te kingi ki te marae; i waiho ano ia e ratou te pukapuka i te ruma o Erihama kai tuhituhi, a korerotia atu ana e ratou nga kupu katoa ki nga taringa o te kingi.
- 21
- Katahi ka ungā atu a Iehuri e te kingi ki te tiki i te pukapuka. Na, tikina atu ana e ia i roto i te ruma o Erihama kai tuhituhi; a korerotia atu ana e Iehuri ki nga taringa o te kingi, ki nga taringa ano hoki o nga rangatira katoa e tu ana i te taha o te kingi.
- 22
- Na, i te noho te kingi i te whare hotoke i te iwa o nga marama, a i te kānga ahi te ahi e ka ana i tona aroaro.
- 23
- Na, e toru, e wha nga wharangi i korerotia e Iehuri, haehaea ana e ia ki te maripi a te kai tuhituhi, makā atu ana e ia ki te ahi i te kānga ahi, a pau katoa te pukapuka i te ahi i te kānga ahi.
- 24
- Kahore hoki he wehi, kahore he haehae o nga kakahu o te kingi ratou ko ana tangata e whakarongo ana ki enei kupu katoa.
- 25
- I tohe ano ia a Erenatana, ratou ko Teraia, ko Kemaria, ki te kingi kia kaua e tahuna te pukapuka; heoi kihai ia i whakarongo ki a ratou.
- 26
- Katahi te kingi ka whakahau i a Ierameere tama a Hamereke, ratou ko Heraia tama a Atariere, ko Heremia tama a Apareere kia hopukia a Paruku kai tuhituhi, raua ko Heremaia poropiti; na Ihowa ia raua i huna.
- 27
- A i puta mai ano te kupu a Ihowa ki a Heremaia i muri iho i ta te kingi tahunga i te pukapuka, i nga kupu ano i tuhituhia e Paruku, i ā Heremaia ra i korero ai; i mea ia,
- 28
- Tikina atu ano hoki tetahi atu pukapuka, tuhituhia ki reira nga kupu katoa o mua, o te pukapuka tuatahi i tahuna e Iehoiakimi kingi o Hura.
- 29
- Na, te kupu māu ki a Iehoiakimi kingi o Hura, Ko te kupu tenei a Ihowa, I tahuna ra e koe tenei pukapuka, i ki koe, Na te aha tenei i tuhituhia ai e koe ki konei? he aha koe i ki ai, Tera te kingi o Papurona ka haere mai, ka whakangaro i tenei whenua, ka moti ano hoki i a ia nga tangata me nga kararehe o konei?
- 30
- Mo reira ko te kupu tenei a Ihowa mo Iehoiakimi kingi o Hura; E kore ia e whai tangata hei noho ki runga ki te torona o Rawiri, ka makā atu ano hoki tona tinana ki te werawera i te awatea, ki te huka i te po.
- 31
- Ka whiua ano hoki ia e ahau, ratou ko ona uri, ko ana tangata, mo ta ratou he, ka kawea mai ano hoki e ahau ki runga ki a ratou, ki runga ki te hunga e noho ana i Hiruharama, ki runga ki nga tangata o Hura, te kino katoa i korerotia e ahau mo ratou, a kihai nei ratou i whakarongo mai.
- 32
- Katahi ka tikina atu tetahi atu pukapuka e Heremaia, a hoatu ana e ia ki te kai tuhituhi ki a Paruku tama a Neria, a tuhituhia iho e ia ki reira ta Heremaia i korero ai, nga kupu katoa o te pukapuka i tahuna e Iehoiakimi kingi o Hura ki te ahi: he tini ano hoki nga kupu pena i tapiritia iho ki runga ki aua kupu.
Address: 
Phone: 
Email: