Jeremiah Chapter 37 - Paipera Tapu 1868 | Te Paipera Tapu 1868

Jeremiah Chapter 37 - Paipera Tapu 1868

1
Na, kua kingi a Kingi Terekia tama a Hohia i muri i a Konia tama a Iehoiakimi he mea whakakingi ia na Nepukararetara kingi o Papurona ki te whenua o Hura.
2
A, kihai ia i whakarongo, ratou ko ana tangata, ko te iwi ano o te whenua, ki nga kupu a Ihowa i korerotia e Heremaia poropiti.
3
Na, ka unga mai a Kingi Terekia i a Iehukara tama a Heremia raua ko Tepania tama a Maaheia tohunga ki a Heremaia poropiti, hei ki atu, Tena ra, inoi mo tatou ki a Ihowa ki to tatou Atua.
4
A, i haere mai, i haere atu a Heremaia i roto i te iwi; kahore ano i makā e ratou ki te whare herehere.
5
Na, kua puta mai te taua a Parao i Ihipa; a, te rongonga o nga Karari i whakapae ra i Hiruharama i to ratou rongo, na, haere atu ana ratou i Hiruharama.
6
Na, ko te putanga mai o te kupu a Ihowa ki a Heremaia poropiti; i mea ia,
7
Ko te kupu tenei a Ihowa Atua o Iharaira, Kia penei ta korua ki atu ki te kingi o Hura, i unga mai nei i a korua ki te rapu tikanga i a au; Nana, te ope a Parao i puta mai ra hei awhina mo koutou, ka hoki ki tona whenua, ki Ihipa.
8
A ka hoki mai ano nga Karari, ka tatau ki tenei pa, ka horo ano hoki i a ratou, ka tahuna ki te ahi.
9
Ko te kupu tenei a Ihowa, Kei tinihangatia koutou e o koutou ngakau, kei mea, Ka haere rawa atu nga Karari i a tatou; no te mea e kore ratou e haere.
10
Na, ahakoa i patua e koutou te ope katoa a nga Karari e tatau na ki a koutou, a toe ake o ratou ko etahi tangata i werowerohia, ka whakatika ano ratou i tona teneti, i tona teneti, ka tahu i tenei pa ki te ahi.
11
Na, i te whatinga atu o te ope a nga Karari i Hiruharama i te wehi ki te ope a Parao,
12
Ka puta atu a Heremaia i roto i Hiruharama, he haerenga hoki nona ki te whenua o Peniamine kia wehea atu ai ia i reira i roto i te iwi.
13
A, i a ia i te kuwaha o Peniamine, na, i reira tetahi rangatira tiaki, tona ingoa, ko Iriia, he tama na Heremia tama a Hanania; heoi hopukia ana a Heremaia poropiti e ia, me tana ki mai ano, E tahuti atu ana koe ki nga Karari.
14
Na, ko te kianga atu a Heremaia, He teka, kahore aku tahuti ki nga Karari. Heoi kihai ia i whakarongo ki tana: na, hopukia atu ana a Heremaia e Iriia, kawea atu ana e ia ki nga rangatira.
15
Na, ka riri nga rangatira ki a Heremaia, whiua ana ia e ratou, tukua atu ana ia ki te whare herehere ki te whare o Honatana kai tuhituhi: kua waiho hoki tena e ratou hei whare herehere.
16
Te taenga atu o Heremaia ki roto ki te whare herehere, ki roto ki nga ruma, a ka maha nga rangi e noho ana a Heremaia ki reira;
17
Katahi a Kingi Terekia ka unga tangata mai ki te tiki i a ia. Na, ka ui puku mai te kingi ki a ia, i roto i tona whare, a ka mea, He kupu ranei tena na Ihowa? Na, ko te kianga mai a Heremaia, Tenei ano: I ki ano ia, Ka hoatu koe ki te ringaringa o te kingi o Papurona.
18
I ki ano a Heremaia ki a Kingi Terekia, He aha toku hara ki a koe, ki o tangata, ki tenei iwi, i tukua ai ahau e koutou ki te whare herehere?
19
Na, kei hea a koutou poropiti i poropiti ra ki a koutou, i mea ra, E kore te kingi o Papurona e tae mai ki a koutou, ki tenei whenua ranei?
20
Na, tena ra, whakarongo, e taku ariki, e te kingi, kia tae atu taku inoi ki to aroaro; kaua hoki ahau e whakahokia ki te whare o Honatana kai tuhituhi, kei mate ahau ki reira.
21
Katahi a Kingi Terekia ka whakahau kia kawea a Heremaia ki te marae o te whare herehere, kia hoatu ano he rohi taro mana i tenei ra, i tenei ra, he mea tiki atu i te huarahi o nga kai tunu taro, a kia pau ra ano te taro katoa o te pa. Na, noho ana a Heremaia i te marae o te whare herehere.