- 1
- A i rongo a Hepatia tama a Matana, ratou ko Keraria tama a Pahuru, ko Iukara tama a Heremia, ko Pahuru tama a Marakia, i nga kupu i korerotia e Heremaia ki te iwi katoa, i a ia i ki ra,
- 2
- Ko te kupu tenei a Ihowa, Te tangata e noho ana i tenei pa ka mate i te hoari, i te hemo-kai, i te mate uruta: na, te tangata e haere atu ana ki nga Karari, ka ora; hei taonga pārau ano tona wairua ki a ia, ka ora ano ia.
- 3
- Ko te kupu tenei a Ihowa, Tera rawa tenei pa ka hoatu ki te ringaringa o te ope a te kingi o Papurona, a ka horo i a ia.
- 4
- Na, ko te kianga mai a nga rangatira ki te kingi, Me whakamate ra tenei tangata; ma tana penei hoki ka ngoi-kore ai nga ringaringa o nga tangata whawhai kua toe ki te pa nei, me nga ringaringa ano o te iwi katoa, i a ia ka korero nei i enei kupu ki a ratou: ehara hoki ta tenei tangata i te rapu pai mo tenei iwi, engari he kino.
- 5
- Na, ko te kianga mai a Kingi Terekia, Nana, kei to koutou ringaringa ia, e kore hoki e ahei i te kingi te whakahe i ta koutou.
- 6
- Na ka mau ratou ki a Heremaia, a makā ana ia e ratou ki te poka o Marakia tama a Hamereke, ki tera i te marae o te whare herehere; he mea tuku atu a Heremaia na ratou ki nga taura. Na, kahore he wai i roto i te poka; engari he oru, a tapoko ana a Heremaia ki te oru.
- 7
- Na, kua rongo a Epere-mereke Etiopiana, (he unaka hoki ia i roto i te whare o te kingi,) kua tukua e ratou a Heremaia ki te poka; Na, i te noho ano te kingi i te kuwaha o Peniamine.
- 8
- Katahi a Epere-mereke ka haere atu i roto i te whare o te kingi, ka korero atu ki te kingi, ka mea atu,
- 9
- E taku ariki, e te kingi, He kino nga mea katoa e mea nei enei tangata ki a Heremaia poropiti i makā nei e ratou ki te poka; i a ia hoki e noho mai nei ka mate ia i te hemo-kai, kahore atu hoki he taro i te pa.
- 10
- Katahi te kingi ka whakahau i a Epere-mereke Etiopiana, ka mea atu, Kawea atu etahi tangata i konei, kia toru tekau, ka tango ake i a Heremaia poropiti i roto i te poka, i te mea kahore ano ia kia mate noa.
- 11
- Na kua mau a Epere-mereke ki nga tangata hei hoa mona, a haere ana ki te whare o te kingi ki raro i te whare taonga, tangohia mai ana e ia i reira etahi pakarukaru tawhito, etahi tawhetawhe pirau: tukua atu ana e ia ki nga taura ki a Heremaia ki roto ki te poka.
- 12
- Katahi a Epere-mereke Etiopiana ka ki atu ki a Heremaia, Tena whakanohoia iho nga pakarukaru, nga tawhetawhe ki raro i ou peke, ki roto atu i nga taura. A ka oti tena te mea e Heremaia.
- 13
- Na, ka hutia ake e ratou a Heremaia ki nga taura, whakaputaina ake ana ia i roto i te poka. Na, ka noho a Heremaia ki te marae o te whare herehere.
- 14
- Katahi a Kingi Terekia ka unga tangata mai ki te tiki i a Heremaia poropiti ki a ia, ki te tuatoru o nga tapokoranga atu o te whare o Ihowa. Na, ko te kianga mai a te kingi ki a Heremaia, Me ui atu e au tetahi kupu ki a koe; kaua tetahi mea e hunā ki a au.
- 15
- Ano ra hoki ko Heremaia ki a Terekia, Ki te whakaaturia atu e ahau ki a koe, he teka ianei ko te whakamate kau tau moku? a ki te whakatakotoria atu e ahau he whakaaro ki a koe, e kore koe e whakarongo ki a au.
- 16
- Katahi a Kingi Terekia ka oati puku atu ki a Heremaia, ka mea atu, E ora ana a Ihowa, nāna nei tenei wairua i hanga mo tatou, e kore ahau e whakamate i a koe, e kore ano koe e tukua e ahau ki te ringaringa o enei tangata e whai nei kia whakamatea koe.
- 17
- Na, ko te kianga mai a Heremaia ki a Terekia, Ko te kupu tenei a Ihowa, Atua o nga mano, Atua o Iharaira, Ki te haere marie atu koe ki nga rangatira o te kingi o Papurona, ka ora tou wairua, e kore ano tenei pa e wera i te ahi; engari ka ora koe, koutou ko tou whare.
- 18
- Tena ko tenei e kore koe e haere atu ki nga rangatira o te kingi o Papurona, katahi ka hoatu tenei pa ki te ringaringa o nga Karari, a ka tahuna e ratou ki te ahi: e kore ano koe e mawhiti mai i roto i o ratou ringaringa.
- 19
- Na, ko te kianga mai a Kingi Terekia ki a Heremaia, E wehi ana ahau i nga Hurai i papahoro atu ki nga Karari, kei tukua ahau e ratou ki o ratou ringaringa, kei whakatupuria kinotia ahau e ratou.
- 20
- Ano ra ko Heremaia, E kore koe e tuku atu e ratou. Tena, whakarongo ki te reo o Ihowa e korerotia atu nei e ahau ki a koe, kia whai pai ai koe, kia ora ai tou wairua.
- 21
- Na, ki te kore koe e pai ki te haere atu, ko te kupu tenei i whakakitea mai e Ihowa ki a au:
- 22
- Na, nga wahine katoa e mahue ki te whare o te kingi o Hura ka whakaputaina mai ki waho ki nga rangatira o te kingi o Papurona, a ka mea ratou, I tohea koe e ou hoa aroha, a riro ana koe i to ratou: kua tapoko o waewae ki te paru, kua hoki ki muri.
- 23
- O wahine katoa ano, me o tamariki, ka whakaputaina ki waho ki nga Karari: e kore ano koe e mawhiti i roto i o ratou ringa; engari ka mau koe i te ringa o te kingi o Papurona, a ka meinga ano e koe kia tahuna tenei pa ki te ahi.
- 24
- Na, ko te kianga mai a Terekia ki a Heremaia, Kei mohiotia enei kupu e tetahi tangata, a e kore koe e mate.
- 25
- Na, ki te rongo nga rangatira kua korero ahau ki a koe, a ka tae mai ki a koe, ka mea ki a koe, Tena ra, whakaaturia ki a matou, He aha to korero ki te kingi; kaua e hunā ki a matou, a e kore matou e whakamate i a koe: i pehea mai ano hoki te kupu a te kingi ki a koe?
- 26
- Katahi koe ka mea atu ki a ratou, I te kawe atu ahau i taku inoi ki te kingi kia kaua ahau e whakahokia atu ki te whare o Honatana ki reira mate ai.
- 27
- Na, ka haere mai nga rangatira katoa ki a Heremaia, a ka ui ki a ia; a korerotia atu ana e ia ki a ratou enei kupu katoa i whakahaua mai e te kingi; a whakarongo puku ana ratou ki a ia, kihai hoki taua mea i rangona.
- 28
- Na, noho ana a Heremaia i roto i te marae o te whare herehere, a taea noatia te ra i horo ai a Hiruharama, a i reira ano ia i te horonga o Hiruharama.
Address: 
Phone: 
Email: