- 1
- Te kupu a Ihowa i puta mai ki a Heremaia poropiti mo nga Pirihitini i te mea kahore ano a Parao i patu noa i Kaha.
- 2
- Ko te kupu tenei a Ihowa, Nana, te puta mai nei nga wai i te nota! ka meinga hei waipuke e ngawha ana, ka huri ano hoki ki runga ki te whenua, ki nga mea katoa ano o reira, ki te pa, ki nga tangata ano hoki e noho ana i roto, a ka hamama nga tangata, ka aue ano hoki te hunga katoa e noho ana i te whenua.
- 3
- Haruru ana te takahanga o nga matimati o ona hoiho kaha, wiri ana te whenua i ona hariata, ngateri ana i ona wīra; kore iho nga mātua e tahurihuri ki nga tamariki i te ngoi-kore o nga ringaringa;
- 4
- No te mea kei te haere mai te ra e pahuatia ai nga Pihiritini katoa, e hatepea atu ai nga kai awhina katoa kua mahue nei o Taira, o Hairona, ka pahuatia nei hoki e Ihowa nga Pirihitini, nga toenga o te whenua o Kapatoro.
- 5
- Kua tae to pakira ki runga ki Kaha; kua whakangaromia a Ahakerono, me te toenga ano o to ratou awaawa: kia pehea te roa o to haehaenga i a koe?
- 6
- E te hoari a Ihowa, kia pehea te roa ou ka kore nei e ata takoto? hoki atu ki roto ki to kopaki okioki ai, kati tau.
- 7
- Me pehea e ata takoto ai, kua whakahaua nei hoki ia e Ihowa ki te he mo Ahakerono, mo te tahatika ano o te moana? kua oti ia te whakarite mo reira.
Address: 
Phone: 
Email: