- 1
- Ko te kupu tenei a Ihowa o nga mano, Atua o Iharaira, mo Moapa; Aue te mate mo Nepo! ka pahuatia hoki: kua whakama, kua horo Kiriataima, kua whakama, kua pawera Mihikapa.
- 2
- Kahore ake he whakamoemititanga mo Moapa: i Hehepono ratou e whakaaro ana ki te kino mona, Haere mai, tatou ka hatepe atu i a ia, kia kore ai tena iwi. Ka whakamotitia ano hoki koe, e Maramene; ka aru te hoari i a koe.
- 3
- Ka puta mai i Horonaima te reo e aue ana; he pahuatanga, he whakangaromanga nui.
- 4
- Ka pakaru a Moapa, kua meinga te aue e ona mea nohinohi kia rangona,
- 5
- I te pikinga atu hoki ki Ruhiti hono tonu te tangi e kake atu ana: i te heketanga atu hoki ki Horonaima e rangona ana e nga hoa riri te tangi ki te whakangaromanga.
- 6
- E rere, kahakina koutou kia ora ai; kia rite ki te kahikatoa i te koraha.
- 7
- Nau ra i whakawhirinaki ki o mahi, ki o taonga, i horo ai ano hoki koe: ka riro ano a Kemoho i te whakaraunga, ratou tahi ano ko ona tohunga, ko ona rangatira.
- 8
- Ka tae mai ano hoki te kai pahua ki nga pa katoa; e kore ano tetahi pa e ora, ka ngaro ano te raorao, ka hunā ano hoki te wahi papatairite, ka pera ano me ta Ihowa i korero ai.
- 9
- Hoatu he parirau ki a Moapa, kia rere atu ai, kia puta atu ai; no te mea ka ururuatia ona pa; tē ai he tangata hei noho ki reira.
- 10
- He kanga mo te tangata e mahi tinihanga ana i ta Ihowa mahi, he kanga mo te tangata e kore nei e tukua atu e ia tana hoari ki te toto.
- 11
- I runga i te rangimarie a Moapa no tona tamarikitanga ake ano, ata takoto ana ia i runga i ona nganga, kihai ano i ringitia atu i roto i tetahi oko ki tetahi oko, kihai ano hoki i riro i te whakarau; no reira mau tonu tona reka, kihai hoki tona kakara i puta ke.
- 12
- Mo reira kei te haere mai tenei nga ra, e ai ta Ihowa, e unga atu ai ahau i te hunga haereere noa ki a ia, a ka meinga ia e ratou kia haereere noa; ka ringitia atu ano hoki e ratou nga mea o ana oko; a ratou pounamu, mongamonga noa i a ratou.
- 13
- A ka whakama a Moapa ki a Kemoho, ka pera ano me te whare o Iharaira i whakama ki Pete-ere, ki ta ratou i whakawhirinaki atu ai.
- 14
- He pehea ta koutou e ki ra, He marohirohi tatou, he uaua ki te whawhai?
- 15
- Kua pahuatia a Moapa, kua riro atu i roto i ona pa, ana taitamariki, nga mea i whiriwhiria, kua riro ratou ki te patunga, e ai ta te kingi, ko Ihowa nei o nga mano tona ingoa.
- 16
- Ka tata te aitua o Moapa te puta; te he mona hohoro tonu.
- 17
- Tangihia ia, e te hunga katoa i tetahi taha ona, i tetahi taha; e te hunga katoa e mohio ana ki tona ingoa, ki ake, Ano te whatinga o te rakau kaha, o te tokotoko ataahua!
- 18
- Heke iho i runga i tou kororia, e noho ki runga ki te mate-wai, e te tamahine e noho na i Ripono; no te mea kua tae ake te kai pahua o Moapa ki a koe, ka kore i a ia ou pa kaha.
- 19
- E tu ki te ara titiro ai, e te wahine e noho ana i Aroere, ui atu ki te tangata e rere ana, ki te wahine kua mawhiti, mea atu, He aha te mea?
- 20
- Kua whakama a Moapa, kua pakaru hoki: e aue, e tangi; korerotia ki Aranono, kua oti a Moapa te pahua.
- 21
- Kua tae atu ano hoki te whakarite whakawa ki runga ki te mānia, ki Horono, ki Iahata, ki Mepaata,
- 22
- Ki Ripono, ki Nepo, ki Pete-ripirataima,
- 23
- Ki Kiriataima, ki Pete-kamuru, ki Pete-meono,
- 24
- Ki Kerioto, ki Potora, ki nga pa katoa o te whenua o Moapa, ki nga mea i tawhiti, ki nga mea e tata ana.
- 25
- Kua oti te haona o Moapa te pouto atu, kua whati tona ringa, e ai ta Ihowa.
- 26
- Whakahaurangitia ia: mona i whakakake ki a Ihowa. Ka titakataka ano a Moapa i roto i tona ruaki, ka waiho ano hoki ia hei katanga mai.
- 27
- He teka ianei i waiho a Iharaira hei katanga mai mau? i kitea ranei ia i roto i nga tahae? i to korerotanga na hoki i te mea mona, oraora tonu koe i te koa.
- 28
- E nga tangata o Moapa, whakarerea nga pa, e noho ki te kamaka, kia rite ki te kukupa e hanga nei i tana ohanga ki nga taha o te kuwaha o te rua.
- 29
- Kua rongo tatou i te whakapehapeha o Moapa, (nui atu tona whakapehapeha,) i tona whakakake, i tona whakapehapeha, i te nekehanga ake ano hoki i tona ngakau.
- 30
- E mohio ana ahau ki tana riri, e ai ta Ihowa, otiia kahore he tikanga i ana korero teka, e kore tena e taea e ia.
- 31
- Mo reira ka tangi ahau ki a Moapa, ka aue ahau ki a Moapa katoa; ka ngungurutia e toku ngakau nga tangata o Kiri-herehe.
- 32
- E te waina o Hipima, ka tangihia koe e ahau, ka rite ki te tangihanga mo Iatere: kua whiti o peka ki tera taha o te moana, kua tae ki te moana o Iatere: kua kokiri atu te kai pahua ki o hua raumati, ki to kohikohinga waina.
- 33
- Kua whakakahoretia ano hoki te koa, me te whakamanamana, i te mara momona, i te whenua ano o Moapa; kua whakamutua ano hoki e ahau he waina mo nga takahanga waina: e kore tetahi e hamama, e takatakahi; to ratou hamama ehara i te hamama.
- 34
- No te auetanga i Hehepono tae noa ki Ereare, ki Iahata, te puakanga o to ratou reo, no Toara tae noa ki Horonaimi; kei te kau tautoru te rite: no te mea ka tangata-koretia ano hoki nga wai o Nimirimi.
- 35
- Ka whakamutua ano e ahau i roto i a Moapa ta te tangata e whakaeke whakahere ana ki runga ki nga wahi tiketike, e ai ta Ihowa, ta te tangata ano hoki e tahu whakakakara ana ki ona atua.
- 36
- No reira, ano he putorino toku ngakau e tangi ana ki a Moapa, ano he putorino toku ngakau e tangi ana ki nga tangata i Kiri-herehe; no te mea kua moti nga taonga i mahia e ia.
- 37
- He mea moremore katoa hoki nga māhunga; nga kumikumi katoa tapahi rawa; he haehaenga kei nga ringaringa katoa, he kakahu taratara kei nga hope.
- 38
- Te tangi, horapa tonu atu ki nga tuanui katoa o Moapa, ki ona waharoa ano hoki; no te mea kua pakaru a Moapa i a au, kua rite ki te oko e kore e manakohia, e ai ta Ihowa.
- 39
- Ta ratou aue,—Ano te wawahanga! —Taukiri, e! kua tahuri mai te tuara o Moapa i te whakama; kua waiho ano hoki a Moapa hei katanga mai, hei whakawehi ki te hunga i tetahi taha ona, i tetahi taha.
- 40
- No te mea ko te kupu tenei a Ihowa, Nana, ka rite tana rere ki ta te ekara, ka roha ano hoki ona parirau ki runga ki Moapa.
- 41
- Kua horo Kerioto, kua riro nga pourewa; nga ngakau o nga marohirohi o Moapa i taua rangi, koia ano kei te ngakau o te wahine e whakamamae ana.
- 42
- Ka hunā ano a Moapa, ka kore tena iwi, mona i whakakake ki a Ihowa.
- 43
- Ko te wehi, ko te rua, ko te rore, kei a koe, e te tangata e noho ana i Moapa, e ai ta Ihowa.
- 44
- Na, te tangata i rere mai i te wehi, ka taka ki te rua; a te tangata e puta ake ana i roto i te rua, ka mau i te rore: no te mea ka kawea atu e ahau ki runga ki a ia, ara, ki a Moapa te tau e tirotirohia ai ratou, e ai ta Ihowa.
- 45
- Te hunga i rere, tu ana ratou i raro i te taumarumarunga iho o Hehepono, he whakaaro hoki ki te kaha: otiia tera e puta mai he ahi i roto i Hehepono, he mura ano hoki i roto i Hihono, a ka pau tetahi pito o Moapa, te tumuaki o nga tamariki a te ngangau.
- 46
- Aue te mate mou, e Moapa! ka hunā te iwi o Kemoho: ka riro nei hoki o tamariki hei whakarau, o tamahine ano hei whakarau.
- 47
- Otiia ka whakatahuritia atu ano e ahau te whakaraunga o Moapa i nga ra whakamutunga, e ai ta Ihowa. Heoi ano te whakaritenga whakawa mo Moapa.
Address: 
Phone: 
Email: