- 1
- E rua tekau ma tahi nga tau o Terekia i tona kingitanga; a kotahi tekau ma tahi nga tau i kingi ai ia ki Hiruharama. Na, te ingoa o tona whaea ko Hamutara, he tamahine na Heremaia o Ripina.
- 2
- A i kino tana mahi ki te titiro a Ihowa; i rite ki nga mea katoa i mea ai a Iehoiakimi.
- 3
- No reira i a Ihowa ka riri nei ka puta te aitua ki Hiruharama, ki a Hura, a makā noatia atu ratou i tona aroaro; whakakeke ana a Terekia ki te kingi o Papurona.
- 4
- Na, i te iwa o nga tau o tona kingitanga, i te tekau o nga marama, i te tekau o nga ra o te marama, ka tae mai a Nepukararetara kingi o Papurona, a ia me tana ope katoa ki Hiruharama. Na, nohoia mai ana a reira e ia, a hangā ana e ratou etahi taumaihi ki tetahi taha, ki tetahi taha, hei whawhaitanga ki reira.
- 5
- Na, ka whakapaea te pa, a tae noa ki te tekau ma tahi o nga tau o Kingi Terekia.
- 6
- I te wha o nga marama, i te iwa o te marama he nui te mate-kai o te pa; kahore hoki he taro ma nga tangata o te whenua.
- 7
- Na, kua pakaru te pa, rere ana nga tangata whawhai katoa, puta mai ana ratou i roto i te pa, i te po, na te ara o te kuwaha i waenganui o nga taiepa e rua, na tera i te kāri a te kingi; (i tetahi taha ano hoki nga Karari o te pa, i tetahi taha;) a haere ana i te ara o te mānia.
- 8
- Katahi te kingi ka whaia e te ope, e nga Karari, a hopukia ana e ratou a Terekia ki nga mānia i Heriko; i marara noa atu hoki tana ope katoa i tona taha.
- 9
- Ka mau nei te kingi i a ratou, kawea ana ia e ratou ki te kingi o Papurona ki Ripira i te whenua o Hamata; a korerotia ana e ia te whakawakanga mona.
- 10
- Katahi ka tukitukia e te kingi o Papurona nga tamariki a Terekia ki tana tirohanga iho ano: i tukitukia ano hoki nga rangatira katoa o Hura e ia ki Ripira.
- 11
- Nga kanohi ano hoki e rua o Terekia whakamatapotia ana e ia: herea ana ia e te kingi o Papurona ki nga mekameka parahi, kawea atu ana ki Papurona, makā atu ana ki te whare herehere, a taea noatia te ra i mate ai ia.
- 12
- I te rima o nga marama, i te tekau o nga ra o te marama, (ko te tekau ma iwa hoki ia, o nga tau o Kingi Nepukararetara kingi o Papurona,) ka haere mai a Neputara-arana rangatira o nga kai tiaki, he tangata tu ki te aroaro o te kingi o Papurona, ki Hiruharama.
- 13
- Na, tahuna ake e ia te whare o Ihowa, te whare o te kingi, nga whare katoa o Hiruharama; nga whare katoa ano o te hunga nunui, tahuna ana e ia ki te ahi.
- 14
- Wahia iho ano hoki te taiepa katoa o Hiruharama, a whawhe noa, e te ope katoa a nga Harari, e ta te rangatira o nga kai tiaki.
- 15
- A, i whakahekea atu ano e Neputara-arana rangatira o nga kai tiaki etahi o nga rawa-kore o te iwi, me era atu ano o te iwi i mahue ki te pa, me te hunga i papahoro atu, i taka atu ki te kingi o Papurona, me era atu o taua huihuinga tangata.
- 16
- I mahue ia i a Neputara-arana rangatira o nga kai tiaki etahi o nga rawa-kore o te whenua hei kai mahi waina, hei paruauru.
- 17
- Na, nga pou parahi i te whare o Ihowa, me nga turanga, me te moana parahi i te whare o Ihowa, wawahia ana e nga Karari, a maua atu ana e ratou te parahi o aua mea ki Papurona.
- 18
- Me nga pāta, me nga koko pungarehu, me nga kutikuti rama, me nga peihana, me nga koko, me nga oko parahi katoa mo a ratou mahi tapu, tangohia ake e ratou.
- 19
- Nga oko ano hoki, nga takotoranga ahi ano hoki, nga peihana, nga pāta, nga turanga rama, nga koko, nga kapa, nga aha aha koura, nga aha aha hiriwa, tangohia ake e te rangatira o nga kai tiaki.
- 20
- Nga pou e rua, kotahi moana, kotahi tekau ma rua nga puru parahi i raro i nga turanga, i hangā e Horomona mo te whare o Ihowa. Kahore he paunatanga o te parahi o enei oko katoa.
- 21
- Na, nga pou, kotahi tekau ma waru whatianga te roa o te pou kotahi; a tekau ma rua nga whatianga o te aho hei pae mona; na, tona matotoru, e wha nga ringaringa; he mea tuwhera a roto.
- 22
- He parahi te whakapaipai o runga, a e rima nga whatianga te roa o te whakapaipai kotahi: he parahi katoa ano hoki te mea i whiria, me nga pomekaranete i tetahi taha o te whakapaipai, i tetahi taha. Rite tonu hoki ki enei o te rua o nga pou, me nga pomekaranete ano.
- 23
- Na, e iwa tekau ma ono nga pomekaranete o te taha kotahi; nga pomekaranete katoa i te mea i kotahi te rau, a whawhe noa.
- 24
- I tangohia ano hoki e te rangatira o nga kai tiaki a Heraia te tino tohunga, ratou ko te tohunga tuarua ko Tepania, ko nga kai tiaki tokotoru o te kuwaha.
- 25
- I tangohia ano hoki e ia i roto i te pa tetahi unaka, te rangatira o nga tangata whawhai, tokowhitu ano hoki no te aroaro pu ake o te kingi, he hunga i rokohanga ki roto ki te pa, me te kai tuhituhi a te rangatira ope, te kai huihui i nga tangata o te whenua, e ono tekau ano hoki nga tangata o te iwi o te whenua, he hunga i rokohanga e ia ki roto ki te pa.
- 26
- Na, ka mau a Neputara-arana rangatira o nga kai tiaki ki a ratou, kawea ana ratou ki te kingi o Papurona ki Ripira.
- 27
- Na, patua iho ratou e te kingi o Papurona, whakamatea iho ki Ripira ki te whenua o Hamata. Heoi whakahekea atu ana a Hura i tona oneone.
- 28
- Ko te hunga tenei i whakaraua atu e Nepukararetara: i te whitu o nga tau, e toru mano e rua tekau ma toru nga Hurai:
- 29
- I te tekau ma waru o nga tau o Nepukararetara, e waru tau e toru tekau ma rua nga tangata i whakaraua atu e ia i Hiruharama.
- 30
- I te rua tekau ma toru o nga tau o Nepukararetara, e whitu rau e wha tekau ma rima nga tangata o nga Hurai, i whakaraua atu e Neputara-arana rangatira o nga kai tiaki: ana tangata katoa, e wha mano e ono rau.
- 31
- Na, i te toru tekau ma whitu o nga tau o te whakahekenga atu o Iehoiakimi kingi o Hura, i te tekau ma rua o nga marama i te rua tekau ma rima o nga ra o te marama, ka whakaarahia e Ewiri-meroraka kingi a Papurona, i te tau i kingi ai ia, te māhunga o Iehoiakimi kingi o Hura, whakaputaina mai ana ia e ia i roto i te whare herehere.
- 32
- A he pai ana korero ki a ia, nekehia ake ana e ia tona torona ki runga ake i te torona o nga kingi i tona taha i Papurona.
- 33
- Nga kakahu i herea ai ia whakariroia ketia ake e ia; a kai taro tonu ana ia i tona aroaro i nga ra katoa i ora ia.
- 34
- Na, tana kai he kai i homai tonu mai mana e te kingi o Papurona, he mea mo tenei ra, mo tenei ra, a taea noatia te ra o tona matenga, i nga ra katoa i ora ai ia.
Address: 
Phone: 
Email: