John Chapter 11 - Paipera Tapu 1868 | Te Paipera Tapu 1868

John Chapter 11 - Paipera Tapu 1868

1
Na, kei te mate tetahi tangata, a Raharuhi o Petani kāinga o Meri raua ko Māta tona tuakana.
2
(Ko taua Meri ano ia nāna nei i whakawahi te Ariki ki te hinu, i muru hoki i ona waewae ki ona makawe; he tungane nona a Raharuhi i mate nei.)
3
Na, ka tono tangata mai nga tuāhine ki a ia, ka mea, E te Ariki, tenei kei te mate tau tangata e aroha nei.
4
Te rongonga o Ihu, ka mea ia, Ehara tenei i te mate e mate rawa ai ia, engari hei mea mo te kororia o te Atua; ma tenei hoki ka whai kororia ai te Tama a te Atua.
5
Na, i aroha a Ihu ki a Māta, raua ko tona teina, ki a Raharuhi hoki.
6
Ano ka rongo ia ki tona matenga, e rua ona ra i noho ai ki taua wahi ra ano.
7
Muri iho i tenei ka mea ia ki ana akonga, Tatou ka haere ano ki Huria.
8
Ka mea nga akonga ki a ia, E te Kai whakaako, i whai nga Hurai i mua tata ake nei kia akina koe ki te kohatu; a e haere atu ano koe ki reira?
9
Ka whakahokia mai e Ihu, He teka ianei tekau ma rua nga haora o te ra? Ki te haere tetahi i te awatea, e kore ia e tutuki, no te mea e kite ana ia i te māramatanga o tenei ao.
10
Tena ka haere tetahi i te po, ka tutuki ia, no te mea kahore he whakamarama i roto i a ia.
11
Ka korerotia anei mea e ia: na, muri iho ka mea ia ki a ratou, Kei te moe to tatau hoa a Raharuhi; otiia ka haere ahau ki te whakaara i a ia i te moe.
12
Na, ko te meatanga mai a ana akonga, E te Ariki, me he mea kei te moe ia, e ora.
13
Kaore ko tona matenga ta Ihu i korero ai: ko ratou ia i mea, mo te takotoranga ina moe tana korero.
14
Katahi, ka mea nui atu a Ihu ki a ratou, Kua mate a Raharuhi.
15
A e hari ana ahau, he whakaaro hoki ki a koutou, no te mea kahore ahau i reira, kia whakapono ai koutou; ahakoa ra kia haere tatau ki a ia.
16
Na, ka mea a Tamati, e karangatia nei ko Ririmu, ki ona hoa akonga, Kia haere ano hoki tatau, kia mate tahi me ia.
17
Na, te taenga atu o Ihu, rokohanga atu kua wha ke ona ra i roto i te urupa.
18
Na, e tata ana Petani ki Hiruharama, kotahi pea tekau ma rima paronga:
19
A he tokomaha nga Hurai i tae mai ki a Māta raua ko Meri, ki te whakamarie i a raua mo to raua tungane.
20
A, te rongonga o Māta, tena a Ihu te haere mai na, ka whakatau atu i a ia: ko Meri ia i noho i roto i te whare.
21
Na, ka mea a Māta ki a Ihu, E te Ariki, me i konei koe, kihai i mate toku tungane.
22
Heoi e mātau ana ano ahau, ko tau e inoi ai ki te Atua, e homai e te Atua ki a koe.
23
Ka mea a Ihu ki a ia, E ara ake ano to tungane.
24
Ka mea Māta ki a ia, Ka mātau ahau e ara ake ano ia i te aranga a te ra whakamutunga.
25
Ka mea a Ihu ki a ia, Ko ahau te aranga mai me te ora: ko ia e whakapono ana ki a au, ahakoa kua mate, e ora ano:
26
E kore ano hoki e mate ake ake ake nga tāngata katoa e ora ana, a e whakapono ana ki a au. E whakapono ana ranei koe ki tenei?
27
Ka mea ia ki a ia, Ae, e te Ariki: e whakapono ana ahau, ko te Karaiti koe, ko te Tama a te Atua, e haere mai ana ki te ao.
28
A ka mutu enei korero ana, ka haere, ka karanga puku i tona teina i a Meri, ka mea, Kua tae mai te Kai whakaako, a e karanga ana ki a koe.
29
Ano ka rongo ia, hohoro tonu te whakatika, a haere mai ana ki a ia.
30
Na, kahore ano a Ihu i tomo noa ki roto ki te kāinga; heoi kei taua wahi ano ia i tutaki ai a Māta ki a ia.
31
A, te kitenga o nga Hurai e noho ana ki a ia i roto i te whare, e whakamarie ana i a ia, ka hohoro a Meri te whakatika, te puta ki waho, ka aru ratou i a ia, ka mea, E haere ana ia ki te urupa, ki reira tangi ai.
32
Ano ka tae a Meri ki te wahi kei reira nei a Ihu, a ka kite i a ia, ka takoto ki ona waewae, ka mea ki a ia, E te Ariki, me i konei koe, kihai i mate toku tungane.
33
Ano ka kite a Ihu i a ia e tangi ana, me nga Hurai i haere tahi mai me ia e tangi ana, ka ngunguru ia, ara, tona wairua, ka koingo,
34
A ka mea, I whakatakotoria ia e koutou ki hea? Ka mea ratou ki a ia, E te Ariki, haere mai kia kite.
35
Tangi ana a Ihu.
36
Na, ka mea nga Hurai, Nana, tona aroha ki a ia!
37
Na, ka mea etahi o ratou, He kai whakatitiro tenei i nga kanohi o te matapo, a kahore ranei i taea e ia te mea i tenei tangata ki kaua e mate?
38
Na, ka ngunguru ano a Ihu i roto i a ia, ka haere ki te urupa. He ana ia, kua oti te pa ki te kohatu.
39
Ka mea a Ihu, Tangohia te kohatu. Ka mea ki a ia a Māta tuahine o te tupapaku, E te Ariki, kua piro noa ake ia: ko te po wha hoki tenei.
40
Ano ra ko Ihu ki a ia, Kihai koia ahau i mea ki a koe, Ki te whakapono koe, e kite koe i te kororia o te Atua?
41
Na, ka tangohia e ratou te kohatu i te wahi i takoto ai te tupapaku. Na, ka ara ake nga kanohi o Ihu, ka mea ia, E Pa, ko taku whakawhetai tenei ki a koe, mou i whakarongo mai ki a au.
42
I mahara ano ahau e rongo tonu ana koe ki a au: heoi he whakaaro ki te hunga e tū mai nei i korero ai ahau, kia whakapono ai ratou, Nau ahau i tono mai.
43
Ano ka penei tana ki atu, he nui tona reo ki te karanga, E Raharuhi, puta mai.
44
Na, ko te putanga mai o te tupapaku, he mea here nga ringaringa me nga waewae ki nga takai: he mea takai tona mata ki te tauera. Ka mea a Ihu ki a ratou, Wetekia, tukua kia haere.
45
Na, he tokomaha nga Hurai i haere mai nei ki a Meri, a, to ratou kitenga i nga mea i mea ai a Ihu, Ka whakapono ki a ia.
46
Ko ētahi o ratou i haere atu ki nga Parihi, i korero ki a ratou i nga mea i mea ai a Ihu.
47
Na, ka whakaminea he runanga e nga tohunga nui ratou ko nga Parihi, a ka mea, Kei te aha tatau nei? he maha hoki nga merekara e meatia nei e tenei tangata.
48
Ki te penei ta tatau tuku i a ia, ka whakapono katoa ki a ia: a ka haere mai nga Roma, ka tango i to tatau kāinga, i to tatau iwi.
49
Na, ko tetahi o ratou, ko Kaiapa, ko te tohunga nui o ia tau, ka mea ki a ratou, E kore koutou e mātau ki tetahi mea,
50
Tē whakaaro, he pai ia mo tatau ki te mate te tangata kotahi mo te iwi, a kahore e ngaro te iwi katoa.
51
Na, ehara tenei korero i te mea nāna ake: engari ko te tohunga nui ia mo tera tau, a ka poropiti, kia mate a Ihu mo taua iwi;
52
A haunga taua iwi anake, engari kia whakaminea kia kotahi nga tamariki a te Atua kua marara noa atu.
53
No taua ra ake ano ka runanga ratou kia whakamatea ia.
54
Koia i mutu ai te haere nui o Ihu i roto i nga Hurai; otiia i haere atu i reira ki te wahi e tata ana ki te koraha, ki tetahi pa ko Eperaima te ingoa, a noho ana i reira ratou ko ana akonga.
55
Na, kua tata te Kapenga a nga Hurai: a he tokomaha i haere atu i taua whenua i mua o te Kapenga ki Hiruharama, ki te pure i a ratou.
56
Na, ka rapu ratou i a Ihu, a ka korerorero ki a ratou ano, i a ratou e tu ana i te temepara, e pehea ana a koutou whakaaro? e kore ranei ia e haere mai ki te hākari?
57
Na, kua takoto te tikanga a nga tohunga nui ratou ko nga Parihi, ki te mātau tetahi tangata ki te wahi e noho ai ia, me whakaatu, kia hopukia ai ia e ratou.