- 1
- He pono, he pono taku e mea atu nei ki a koutou, Ki te kahore tetahi e tomo ra te kuwaha ki te kāinga hipi, a ka piki ke, he tahae ia, he tangata pahua.
- 2
- Tena ko te tangata e tomo ana ra te kuwaha, ko te hepara ia o nga hipi.
- 3
- Ka uaki te kai tiaki tatau ki a ia; a ka rongo nga hipi ki tona reo: na, ka karangatia e ia ana hipi ake, to tenei ingoa to tenei ingoa, a ka arahina ki waho.
- 4
- A ka oti ana ake hipi te tuku ki waho, ka haere ia ki mua i a ratou, a ka aru nga hipi i a ia: e mātau ana hoki ratou ki tona reo.
- 5
- E kore ia ratou e aru i te tauhou, engari ka oma i a ia: e kore hoki e mātau ki te reo o nga tauhou.
- 6
- I korerotia tenei kupu whakarite e Ihu ki a ratou: heoi kihai ratou i mohio ki nga mea i korerotia e ia ki a ratou.
- 7
- Na, ka mea ano a Ihu ki a ratou, He pono, he pono taku e mea atu nei ki a koutou, Ko ahau te tatau o nga hipi.
- 8
- He tahae, he kai pahua te hunga katoa i haere mai i mua i a au: heoi kihai nga hipi i whakarongo ki a ratou.
- 9
- Ko ahau te tatau: ki te waiho ahau hei huarahi tomokanga atu ma tetahi, e ora ia, a ka haere ki roto ka haere ki waho, ka kite hoki i te kai.
- 10
- Heoi ano ta te tahae e haere mai ai, he tahae, he patu, he whakamoti hoki: i haere mai ahau kia whiwhi ai ratou ki te ora, ina, tona nui noa atu.
- 11
- Ko ahau te hepara pai: he hepara pai, ka tuku i a ia ano kia mate mo nga hipi.
- 12
- Tena ko te tangata e utua ana, ehara nei i te hepara, ehara nei i a ia nga hipi, tona kitenga i te wuruhi e haere mai ana, whakarerea ake e ia nga hipi, oma ana: na, ka hopukia ratou e te wuruhi, a whakamararatia ana nga hipi.
- 13
- Ka oma te tangata e utua ana, no te mea e utua ana ia, a kahore ana whakaaro ki nga hipi.
- 14
- Ko ahau te hepara pai, e mātau ana hoki ki aku, a e matauria ana ahau e aku,
- 15
- Rite tonu ki to te Matua matauranga ki a au, toku matauranga hoki ki te Matua: e tuku ana ano hoki ahau i a au ki te mate mo nga hipi.
- 16
- He hipi atu ano aku, ehara nei i tenei kāinga: me arahi mai ratou e ahau, a ka rongo ratou ki toku reo; a e whakakotahitia te kahui, kotahi ano hoki hepara.
- 17
- Koia te Matua ka aroha mai ai ki a au, no te mea e tuku ana ahau i a au kia mate, kia whakaora ake ai ano ahau i a au.
- 18
- Ehara i te mea ma tetahi tangata ahau e whakamate, engari maku ano ahau e tuku kia mate. Kei a au te tikanga mo te tuku atu, kei a au ano te tikanga mo te whakaora ano. Na toku Matua tenei ture kua riro mai nei i a au.
- 19
- Katahi ka wehewehea nga Hurai, na enei kupu hoki.
- 20
- He tokomaha o ratou i mea, He rewera tona, e haurangi ana: he aha koutou ka whakarongo ai ki a ia?
- 21
- Ko etahi i mea, Ehara enei i nga kupu a te tangata e nohoia ana e te rewera. E ahei koia i te rewera te mea i nga kanohi o nga matapo kia kite?
- 22
- A i Hiruharama ano tenei, i te hākari horohoronga, i te mea ko te hotoke.
- 23
- E haereere ana a Ihu i te temepara i te whakamahau o Horomona.
- 24
- Na, ka karapotia ia e nga Hurai, a ka mea ratou ki a ia, Kia pehea te roa o tau mahi whakaruarua i o matou ngakau? Ki te mea ko te Karaiti koe, korerotia nuitia mai ki a matou.
- 25
- Ka whakahokia mai a Ihu ki a ratou, Kua korerotia e ahau ki a koutou, a e kore koutou e whakapono: ko nga mahi e mahi nei ahau i runga i te ingoa o toku Matua, ko enei hei kai whakaatu moku.
- 26
- Otira e kore koutou e whakapono, no te mea ehara koutou i te hipi naku, ko taku hoki ia i mea ai ki a koutou.
- 27
- E rongo ana aku hipi ki toku reo, a e mātau ana ahau ki a ratou, e aru ana hoki ratou i a au:
- 28
- A e hoatu ana e ahau ki a ratou he oranga tonutanga; e kore ano hoki ratou e ngaro ake ake ake, e kore ano hoki tetahi e tango i a ratou i roto i toku ringa.
- 29
- Nui atu i te katoa toku Matua, nana nei ratou i homai ki a au; e kore ano hoki ratou e taea e tetahi te tango i roto i te ringa o toku Matua.
- 30
- Ko ahau ko te Matua, kotahi maua.
- 31
- Katahi ka mau ano nga Hurai ki nga kohatu hei aki ki a ia.
- 32
- Ka whakahokia mai e Ihu ki a ratou, He maha nga mahi pai kua whakakitea atu nei e ahau ki koutou, he mea na toku Matua; mo tehea o aua mahi ka akina ai ahau e koutou?
- 33
- Ka whakahokia atu e nga Hurai ki a ia, ka mea, Ehara te mahi pai i te mea e akina ai koe; engari mo te kohukohu; mo te mea hoki ko koe tangata nei ano, e whakaatua na i a koe.
- 34
- Ka whakahokia mai e Ihu ki a ratou, Kahore ranei i tuhituhia i roto i ta koutou ture, Nāku i mea, He atua koutou?
- 35
- Ki te huaina e ia he atua te hunga i tae mai nei te kupu a te Atua ki a ratou, a e kore e taea te whakakahore te Karaipiture;
- 36
- E mea ana oti koutou ki ta te Matua i whakatapu ai, i tono mai ai hoki ki te ao, E kohukohu ana koe; noku i mea, Ko ahau te Tama a te Atua?
- 37
- Ki te kore ahau e mahi i nga mahi a toku Matua, aua ahau e whakaponohia.
- 38
- Tena ki te mahi ahau, ahakoa e kore koutou e whakapono ki a au, whakaponohia nga mahi: kia mātau ai koutou, kia whakapono ai, ko te Matua kei roto i a au, me ahau hoki kei roto i a ia.
- 39
- Na, ka whai ano ratou kia hopukia ia: heoi puta atu ana ia i o ratou ringaringa;
- 40
- Na, ka haere atu ano ia ki tera taha o Horano, ki te wahi i mātua iriiri ai a Hoani; a noho ana i reira.
- 41
- A he tokomaha i haere atu ki a ia; i mea ratou, Kihai a Hoani i mahi i tetahi merekara: he pono ia nga mea katoa i korerotia e Hoani mo tenei.
- 42
- A he tokomaha o reira i whakapono ki a ia.
Address: 
Phone: 
Email: