- 1
- Ko ahau te waina pono, ko toku Matua te kai mahi.
- 2
- Ko nga manga katoa i roto i a au e kore e whai hua, e tangohia e ia: a nga manga katoa e whai hua ana, ka whakapaia e ia, kia maha atu ai ona hua.
- 3
- Na, kua ma tenei koutou i te kupu i korerotia e ahau ki a koutou.
- 4
- Kia u koutou ki roto ki a au, me ahau hoki i roto i a koutou. Ka rite hoki ki te manga e kore e whai hua ko ia anake, ki te kahore e u ki te waina; e kore ano hoki koutou, ki te kore e u ki roto ki a au.
- 5
- Ko ahau te waina, ko koutou nga manga: ki te u tetahi ki roto ki a au, me ahau hoki i roto i a ia, ka maha o tera hua: ki te kahore hoki ahau, e kore tetahi mea e taea e koutou.
- 6
- Ki te kore e u tetahi ki roto ki a au, ka makā atu ia, ano he manga, a ka maroke; na, ka kohikohia, ka makā ki te kapura, ka tahuna.
- 7
- Ki te u koutou ki roto ki a au, a ka u ano aku kupu i roto i a koutou, e inoia e koutou ta koutou e pai ai, a ka meatia ma koutou.
- 8
- Ka whakakororiatia toku matua ki te penei, ki te whai hua maha koutou: a ka meinga koutou te akonga naku.
- 9
- Rite tonu ki to te Matua aroha ki a au toku aroha ki a koutou: kia u koutou ki toku aroha.
- 10
- Ki te pupuri koutou i aku ture, ka u koutou ki toku aroha: me ahau hoki kua pupuri nei i nga ture a toku Matua, a ka u nei ano ki tona aroha.
- 11
- Kua korerotia anei mea e ahau ki a koutou, kia pumau ai toku koa i roto i a koutou, kia nui rawa ai ano hoki to koutou koa.
- 12
- Ko taku ture tenei, Kia aroha koutou tetahi ki tetahi, me ahau hoki kua aroha nei ki a koutou.
- 13
- Kahore he aroha o tetahi i rahi ake i tenei, ara, kia tuku te tangata i a ia ano kia mate mo ona hoa.
- 14
- Ko koutou oku hoa, ki te meatia e koutou aku e whakahau nei ki a koutou.
- 15
- Heoi ano taku meatanga he pononga koutou; e kore hoki te pononga e mohio ki ta tona ariki e mea ai: engari kua oti koutou te hua e au hei hoa; ko aku mea katoa hoki i rongo ai ahau ki toku Matua, kua oti te whakakite atu e ahau ki a koutou.
- 16
- Kahore koutou i whiriwhiri i a au, engari naku koutou i whiriwhiri, a naku ano koutou i mea, kia haere kia whai hua, kia mau tonu hoki o koutou hua: a ko ta koutou e inoi ai ki te Matua i runga i toku ingoa, ka hoatu ki a koutou.
- 17
- Ko aku whakahaunga enei ki a koutou, kia aroha koutou tetahi ki tetahi.
- 18
- Ki te mea e kinongia ana koutou e te ao, e mohio ana koutou e te ao, e mohio ana koutou i kinongia ahau i mua i a koutou.
- 19
- Ki te mea no te ao koutou, e arohaina e te ao ona: tena ko tenei ehara nei koutou i te ao, a naku ano koutou i whiriwhiria i roto i te ao, koia te ao ka kino ai ki a koutou.
- 20
- Kia mahara ki te kupu i korero ai ahau ki a koutou, E kore te pononga e rahi ake i tona ariki. Ki te mea i whakaotia ahau e ratou, ka whakaotia ano hoki koutou; ki te mea i pupuri ratou i taku kupu, ka pupuri ano hoki ratou i ta koutou.
- 21
- Otira e meatia katoatia anei mea e ratou ki a koutou he whakaaro hoki ki toku ingoa, no te mea kahore ratou i mohio ki toku kai tono mai.
- 22
- Me i kaua ahau te haere mai, te korero ki a ratou, penei kahore o ratou hara: tena ko tenei kahore a ratou whakaoraora mo to ratou hara.
- 23
- Te tangata e whakakino ana ki a au, e whakakino ana ano hoki ki toku Matua.
- 24
- Me i kaua te mahia e ahau i roto i a ratou nga mahi kahore i mahia e tetahi atu, penei kahore o ratou hara: tena ko tenei kua kite ratou, kua whakakino ano hoki ki a maua ko toku Matua.
- 25
- Ma tenei ia ka rite ai te kupu i tuhituhia ki ta ratou ture, Kua kino noa ratou ki a au.
- 26
- Otiia ka tae mai te Kai whakamarie e tonoa mai nei e ahau ki a koutou i te Matua, te Wairua o te pono, e puta mai ana i te Matua, ko ia hei kai whakaatu moku:
- 27
- Ko koutou ano hoki hei kai whakaatu, no te mea i ahau koutou no te timatanga iho ra ano.
Address: 
Phone: 
Email: