- 1
- Kua korerotia e ahau enei mea ki a koutou, kei hē koutou.
- 2
- Ka peia atu koutou i roto i nga whare karakia; a meake puta te wa e mea ai nga kai whakamate katoa i a koutou, he mahi pai ta ratou ki te Atua.
- 3
- Na, e meatia enei mea ki a koutou, no te mea kahore ratou i mohio ki te Matua, kahore hoki ki a au.
- 4
- Otiia kua korerotia anei mea e ahau ki a koutou, mo te puta rawa mai o taua wa, ka mahara koutou ki aua mea, he mea korero naku ki a koutou. Na, kihai enei mea i korerotia e ahau ki a koutou i te timatanga, no te mea e noho ana ahau i a koutou.
- 5
- Na, e haere ana tenei ahau ki toku kai tono mai; a kahore tetahi o koutou i ui mai ki a au, Ko hea koe?
- 6
- Otira i taku korerotanga nei i enei mea ki a koutou, ka kī o koutou ngakau i te pouri.
- 7
- Na, he pono taku korero ki a koutou; Nui atu te pai mo koutou ki te haere ahau: ki te kahore hoki ahau e haere, e kore te Kai whakamarie e tae mai ki a koutou; a ki te haere ahau, maku ia e tono mai ki a koutou.
- 8
- Na, ka tae mai ia, māna e whakaatu ki te ao te hara, te tika, me te whakawa:
- 9
- Te hara, mo ratou kahore e whakapono ki a au;
- 10
- Te tika, no te mea e haere ana ahau ki toku Matua, a heoi ano to koutou kitenga i a au;
- 11
- Te whakawa, no te mea kua whakatikaia te whakawakanga mo te rangatira o tenei ao.
- 12
- Tenei ake aku mea maha e korero ai ahau ki a koutou, otiia e kore e taea e koutou te mau aianei.
- 13
- Na, ka tae mai ia, te Wairua o te pono, māna koutou e arahi ki te pono katoa: ehara hoki tana i te korero nāna ake; engari ka korerotia e ia nga mea e rongo ai ia: māna hoki e whakakite mai ki a koutou nga mea e puta mai ana.
- 14
- Ka whakakororiatia ahau e ia: ka tango hoki ia i aku mea, a ka whakaaturia atu ki a koutou.
- 15
- Nga mea katoa a te Matua, naku: koia ahau i mea ai, ka tangohia e ia aku mea, a ka whakaaturia atu ki a koutou.
- 16
- Taro ake a e kore koutou e kite i a au: a taro ake ano, ka kite koutou i a au, no te mea ka haere ahau ki te Matua.
- 17
- Na, ka mea etahi o ana akonga tetahi ki tetahi, He aha tenei e mea mai nei ia ki a tatou, Taro ake a e kore koutou e kite i a au: taro ake ano ka kite ano koutou i a au: me tenei, No te mea e haere ana ahau ki te Matua?
- 18
- Na, ka mea ratou, He aha tenei e mea mai nei ia, Taro ake? e kore tatou e mātau ki tana e mea mai nei.
- 19
- A i mohio a Ihu e hiahia ana ratou ki te ui atu ki a ia, a ka mea ki a ratou, E rapu ana koutou ki a koutou ano ki taku i mea ra, Taro ake a e kore koutou e kite i a au: a, taro ake ano ka kite ano koutou i a au?
- 20
- He pono, he pono taku e mea atu nei ki a koutou, Ka tangi koutou, ka aue, ko te ao ia ka hari: e pouri ano koutou, otira ka meinga to koutou pouri hei haringa.
- 21
- I te mea ka whakamamae te wahine, ka pouri, no te mea ka tae mai tona wa: ka whanau tana tamaiti, heoi ano maharatanga ki te mamae, i te hari hoki, no te mea ka whanau he tangata ki te ao.
- 22
- Na, tenei koutou te pouri nei: e kite ano ia ahau i a koutou, a ka hari o koutou ngakau, e kore ano hoki e tangohia i a koutou to koutou hari e tetahi.
- 23
- Na, i taua ra e kore koutou e ui ki tetahi mea i a au. He pono, he pono taku e mea atu nei ki a koutou, ko a koutou e inoi atu ai ki te Matua i runga i toku ingoa, e homai e ia ki a koutou.
- 24
- Kahore ano i inoia noatia e koutou tetahi mea i runga i toku ingoa: inoia, a ka whiwhi koutou, kia tino nui ai to koutou koa.
- 25
- He mea whakarite taku korerotanga i enei mea ki a koutou: otiia meake puta te wa e kore ai ahau e korero kupu whakarite ki a koutou, engari ka korerotia nuitia e ahau nga mea a te Matua ki a koutou.
- 26
- A taua ra ka inoi koutou i runga i toku ingoa; a e kore ahau e mea ki a koutou, e inoi atu ahau ki te Matua mo koutou:
- 27
- E aroha ana hoki te Matua ake ano ki a koutou, mo koutou hoki i aroha ki a au, a i whakapono i haere mai ahau i te Atua.
- 28
- I haere mai ahau i te Matua, a kua tae mai nei ki te ao: ka mahue ano hoki i a au te ao, a ka haere ki te Matua.
- 29
- Ka mea atu ana akonga ki a ia, Na, ka korero nui tenei koe, ehara tau korero i te kupu whakarite.
- 30
- Katahi matou ka mohio, tenei koe te mohio nei ki nga mea katoa, a e kore e mea ma tetahi e ui ki a koe: na konei matou i whakapono ai i haere mai koe i te Atua.
- 31
- Ka whakahokia mai e Ihu ki a ratou, Katahi koutou ka whakapono?
- 32
- Na, meake puta te wa, a kua puta nei ano, e whakamararatia ai koutou ki tana mea ki tana mea, a ka waiho ko ahau anake; otiia he teka ko ahau anake, no te mea kei a au nei te Matua.
- 33
- Kua korerotia e ahau anei mea ki a koutou, kia whai marietanga ai koutou i roto i a au. Ta koutou i te ao nei, he matemate: otira kia maia; kua taea e ahau te ao.
Address: 
Phone: 
Email: