John Chapter 17 - Paipera Tapu 1868 | Te Paipera Tapu 1868

John Chapter 17 - Paipera Tapu 1868

1
Ka korerotia enei mea e Ihu, na, ka anga ake ona kanohi ki te rangi, ka mea, E Pa, kua taea te haora: whakakororiatia to Tamaiti, kia whakakororiatia ai ano hoki koe e to Tamaiti:
2
Kua tukua mai nei hoki e koe ki a ia nga tikanga mo nga kikokiko katoa, kia hoatu e ia te oranga tonutanga ki te hunga katoa kua homai nei e koe ki a ia.
3
A ko te oranga tonutanga tenei, kia mātau ratou ki a koe, ko koe anake te Atua pono, ki a Ihu Karaiti ano hoki i tonoa mai nei e koe.
4
Kua whakakororiatia koe e ahau i runga i te whenua: ka oti i a au te mahi i homai e koe kia mahia e ahau.
5
Na, kia whai kororia ahau aianei i a koe ake, e Pa; hei te kororia ano i kororiatia ai ahau i a koe i mua atu o te ao.
6
Kua whakapuakina e ahau tou ingoa ki nga tāngata i homai e koe ki a au i roto i te ao: nou ratou, nau ano hoki ratou i homai ki a au; a kua puritia e ratou tau kupu.
7
Katahi ratou ka mātau nau ano nga mea katoa i homai nei e koe ki a au.
8
No te mea kua hoatu e ahau ki a ratou nga kupu i homai e koe ki a au; a kua tango ratou, kua tino mātau ano, i haere mai ahau i a koe, kua whakapono ano hoki ratau, nau ahau i tono mai.
9
Mo ratou taku inoi: kahore aku inoi mo te ao, engari mo au i homai ai ki a au; nau hoki ratou.
10
Aku katoa, nau ano, naku hoki āu; a ka whai kororia ahau i a ratou.
11
Na, heoi ano taku noho i te ao; kei te ao nei ano enei, ko ahau ia ka haere atu ki a koe. E te Matua tapu, puritia i runga i tou ingoa te hunga kua homai e koe ki a au, kia kotahi ai ratou, me taua nei.
12
I ahau ano e noho ana i a ratou i te ao, i puritia ratou e ahau i runga i tou ingoa: kua tiakina e ahau āu i homai ai ki a au, a kahore tetahi o ratou i ngaro, ko te tamaiti anake o te ngaromanga; kia rite ai te Karaipiture.
13
Na, ka haere atu nei ahau ki a koe; a e korerotia ana e ahau enei mea i te ao nei, kia tino nui ai toku koa i roto i a ratou.
14
Kua hoatu e ahau tau kupu ki a ratou; a e kino ana te ao ki a ratou, no te mea ehara ratou i te ao, me ahau hoki ehara nei i te ao.
15
Kahore aku inoi kia tangohia atu ratou e koe i te ao, engari kia tiakina ratou e koe kei kino.
16
Ehara ratou i te ao, me ahau hoki ehara i te ao.
17
Whakatapua ratou e koe ki to pono: ko tau kupu te pono.
18
Nau ahau i tono mai ki te ao, me ahau hoki kua tono nei i a ratou ki te ao.
19
A he whakaaro ki a ratou i whakatapu ai ahau i a au, kia tapu ai hoki ratou i te pono.
20
Ehara taku i te inoi mo enei anake, engari mo te hunga e meinga e ta ratou kupu kia whakapono ki a au;
21
Kia kotahi ai ratou katoa; me koe hoki, e Pa, i roto i a au, me ahau ano hoki i roto i a koe, kia kotahi ai hoki ratou i roto i a taua: kia whakapono ai te ao, nau ahau i tono mai.
22
Kua hoatu ano hoki e ahau ki a ratou te kororia i homai e koe ki a au; kia kotahi ai ratou, me taua nei hoki he kotahi:
23
Ko ahau i roto i a ratou, ko koe hoki i roto i a au, kia tino tutuki ai ratou ki te kotahitanga: kia mohio ai ano hoki te ao, nau ahau i tono mai, a e rite ana tou aroha ki a ratou, ki tou aroha ki a au.
24
E Pa, e mea ana ahau kia noho tahi ki a au, ki te wahi e noho ai ahau, au i homai ai ki a au; kia kite ai ratou i toku kororia kua homai nei e koe ki a au: no mua atu hoki i te hanganga o te ao tou aroha ki a au.
25
E te Matua tika, ahakoa te ao tē mohio ki a koe, e mohio ana ano ahau ki a koe, a kua mohio ano enei, nau ahau i tono mai.
26
Kua whakapuakina ano hoki tou ingoa e ahau ki a ratou, a ka whakapuakina ano: kia mau ai i roto i a ratou te aroha i arohaina ai ahau e koe, me ahau ano hoki i roto i a ratou.