- 1
- Te tangata i whanau i te wahine, he torutoru nei ona ra; ki tonu ano i te raruraru.
- 2
- Ano he puawai ia e puta mai ana, e kotia iho ana: rere ana ia, ano he atarangi, kahore hoki he tumautanga.
- 3
- E titiro mai ano ranei ou kanohi ki te penei? e mea ranei koe i a au kia whakawa taua ki a taua?
- 4
- Ko wai hei homai i te mea ma i roto i te mea poke? Hore rawa.
- 5
- Kua rite na hoki nga ra mona: kei a koe te maha o ona marama. Takoto rawa i a koe te tikanga mona, a e kore ia e whiti ki tua.
- 6
- Kati te titiro mai ki a ia, kia ai he pariratanga, kia ata tutuki ai tona ra, rite tonu na hoki ia ki te kai mahi.
- 7
- Ka ai hoki he whakaaronga ki te rakau i tapahia, tera ano e pariri, e kore ano hoki tona wana e mutu.
- 8
- Ahakoa kua tawhitotia tona pakiaka ki te whenua, a kua mate tona take i roto i te puehu;
- 9
- Heoi kua haunga i te wai, ka pihi, ka whai peka, ko ta te mea tupu hanga hoki ia.
- 10
- Te tangata ia mate iho ia, marere noa iho; hemo ana te tangata, a, kei hea?
- 11
- Nga wai o te moana ka kore, te awa ka mimiti, ka maroke.
- 12
- Te tangata hoki, takoto ana ia, a kahore ona whakatikanga ake: kahore he marangatanga ake mo ratou, a kia kore ra ano nga rangi; e kore ano hoki ratou e ara i to ratou moe.
- 13
- Aue, me i hunā ahau e koe i roto i te rua, me i waiho au kia ngaro ana, kia hoki ra ano to riri; me i rohea mai e koe tetahi wa moku, a ka mahara mai ano ki a au!
- 14
- Ki te mate te tangata, e ora ano ranei ia? i nga ra katoa o te wa i whakaritea moku ka tatari ahau, kia tae mai ra ano he putanga ketanga moku.
- 15
- Tera koe e karanga mai, a ka whakao atu ahau ki a koe; ka matenui mai ano koe ki te mahi a ou ringaringa.
- 16
- Inaianei hoki e taua ana e koe oku hikoinga. He teka ianei e matatau tonu mai ana koe ki toku hara?
- 17
- Hīri rawa toku he ki roto ki te putea, tuitui rawa e koe toku kino.
- 18
- He maunga ano hoki, horo ana, memeha ake, a, neke mai ana te toka i tona wahi.
- 19
- E kai ana te wai i nga kohatu; e horoia atu ana e koe nga mea e tupu ana i te puehu o te whenua; ngaro iho ano i a koe ta te tangata i tumanako atu ai.
- 20
- Taea ana ia e koe, oti tonu atu, a haere ana ia; puta ke ana i a koe tona mata, na, kei te unga atu koe i a ia kia haere.
- 21
- Te whakahonoretanga o ana tama, kahore e mohiotia e ia; ka hoki iho ratou hei ware, heoi kahore tetahi aha o ratou e maharatia e ia.
- 22
- E mamae ano ia te kikokiko o tona tinana, a ka tangi tona wairua i roto i a ia.
Address: 
Phone: 
Email: