- 1
- Katahi ka whakahokia mai e Eripata Temani; i mea ia.
- 2
- Ko te hau kau koia te matauranga e whakapuakina mai e te tangata whakaaro; kia whakakiia ano ranei e ia tona kopu ki te marangai?
- 3
- Tana mea hei ako mai ko nga kupu hua-kore, ko nga korero kahore nei e whai tikanga?
- 4
- Kua akiritia na hoki e koe te wehi; kei te kaiponu ano koe i te inoi ki te aroaro o te Atua.
- 5
- Na, kei te whakapuaki tou mangai i tou kino, kua whiriwhiria ano hoki e koe te arero o te hunga tinihanga.
- 6
- Ehara i a au, na tou mangai i hopu to kino; ko ou ngutu ano hei whakaatu i tou he.
- 7
- Ko koe ianei te tangata tuatahi kua whanau? he mea hanga ranei koe no mua atu i nga pukepuke?
- 8
- I rongo ranei koe i ta te Atua whakaaro puku? kua motuhia atu ranei nga mahara ki a koe anake?
- 9
- Ko te aha te mohiotia ana e koe, a kahore e mohiotia e matou? ko tehea whakaaro ano hoki au kahore nei i a matou?
- 10
- Nga hina, nga koroheke, kei a matou ano, kaumatua rawa ake i tou pāpā.
- 11
- Ki tau he mea iti ā te Atua whakamarietanga? kei a koe ranei tetahi mea huna?
- 12
- He aha koe i kahakina atu ai e tou ngakau? he aha hoki o kanohi i hinana ai,
- 13
- I tahuri mai ai tou wairua ki te whakahe i te Atua, i puaki mai ai ena kupu i tou mangai?
- 14
- He aha te tangata, e ma ai ia? te whanau ranei o te wahine, i tika ai?
- 15
- Nana, kahore ia e whakawhirinaki ki ana mea tapu; kahore hoki nga rangi e ma ki tana titiro.
- 16
- Tera noa ake ia te whakarihariha, te poke, o te tangata e inu nei i te kino ano he wai.
- 17
- Maku e whakaatu ki a koe, whakarongo mai ki a au; kua kitea hoki tenei e ahau, a me korero atu;
- 18
- He mea korero mai na nga mohio, he whakarerenga iho na o ratou mātua: kihai hoki i hunā e ratou:
- 19
- Ki a ratou nei anake te homaitanga o te whenua; kihai hoki te tangata ke i tika i waenganui i a ratou.
- 20
- E whakamamae ana te tangata kino i nga ra katoa, kei te ngaro ano hoki te maha o nga tau o te kai tukino.
- 21
- He reo whakawehi kei roto i ona taringa; a i te mea e mau nei ano te rongo, ka haere mai te kai whakangaro ki a ia.
- 22
- Kahore āna whakaaetanga ake tera ia ka hoki ake i te pouri, e whanga ana ano hoki te hoari ki a ia.
- 23
- E kopikopiko noa ana ia ki te taro mana: Kei hea ra? e mohio ana ia kua tata ki tona ringa te ra o te pouritanga.
- 24
- Ko te ngakau mamae, me te tumatatenga, hei kai whakawehi i a ia; ka kaha ake raua i a ia, me te mea he kingi kua rite ana mea mo te whawhai.
- 25
- No te mea i totoro mai tona ringa ki te whawhai ki te Atua, a i whakakaha i a ia ki te whawhai ki a te Kaha-rawa.
- 26
- Torere mai ana ia ki runga ki a ia, ki runga ki te kaki, ki runga ki nga puku matotoru o ana whakangungu rakau.
- 27
- Ahakoa i kopakina tona mata e tona ngako, e tupu ana te ngako o tona hope,
- 28
- Heoi ko nga pa i whakangaromia hei nohoanga mona, me nga whare kahore e nohoia, meake nei waiho hei puranga,
- 29
- E kore ia e whai taonga, e kore ano ona rawa e mau, e kore ano hoki te mana o ana mea e roa ki runga ki te whenua.
- 30
- E kore ia e riro mai i roto i te pouri, ona peka ka maroke i te mura, ka riro atu ano ia i te manawa o tona mangai.
- 31
- Kei whakawhirinaki te tangata e tinihangatia ana ki te mea teka noa; no te mea ko te mea teka noa hei utu ki a ia.
- 32
- E kore tona ra e taea, kua rite; e kore ano hoki tona peka e whai rau.
- 33
- Ka peratia ona karepe kaiota me o te waina ka aia atu e ia; ka makā ona puawai, me te mea no te oriwa.
- 34
- Ka mokemoke hoki nga whakaminenga o te hunga ngutu kau, ka pau hoki i te ahi nga tapenakara i nga utu whakapati.
- 35
- He mahi nanakia te mea i hapu ki roto ki a ia, whanau ake he mea teka noa; ko o ratou kopu ano hei hanga mai i te tinihanga.
Address: 
Phone: 
Email: