- 1
- Ano ra ko Hopa; i mea ia,
- 2
- He hapai pehea ra tau i te tangata kahore nei ona kaha? he whakaora pehea tau i te ringa ngoi-kore?
- 3
- Ka tae to whakatakoto whakaaro ma te tangata kahore nei ona matauranga! nui atu to whakaaturanga i te whakaaro tika.
- 4
- I puaki ki a wai o kupu? no wai te wairua i puta mai ra i a koe?
- 5
- E wiri ana nga tupapaku i raro i te wai, me nga mea ano e noho ana i reira.
- 6
- E takoto kau ana te reinga i tona aroaro, kahore hoki he hipoki mo te whakangaromanga.
- 7
- E horahia atu ana e ia te taha ki te hau-raro ki runga ki te wahi takoto kau, whakairihia ana e ia te whenua ki runga ki te kahore noa iho.
- 8
- E takaia ana e ia nga wai ki roto ki ana kapua matotoru, kahore hoki te kapua e pakaru i a ratou.
- 9
- E kaiponuhia atu ana e ia a mua o tona torona, horahia ana e ia tona kapua ki runga.
- 10
- He mea karapoti nana nga wai, rohe rawa, a kia mutu ra ano te māramatanga me te pouritanga.
- 11
- Wiri ana nga pou o te rangi, miharo ana ki tona whakatupehupehunga.
- 12
- Ko tona kaha hei wahi i te moana, marū ana te whakakake i tona matauranga.
- 13
- He mea whakapaipai nga rangi na tona wairua; na tona ringa i hanga taua mea kopikopiko te nakahi.
- 14
- Na, he pito enei no ona ara, ano te iti o te wahi ona e rangona ana! Ko wai hoki ka matau ki te whatitiri o tona kaha?