Job Chapter 31 - Paipera Tapu 1868 | Te Paipera Tapu 1868

Job Chapter 31 - Paipera Tapu 1868

1
Kua oti te kawenata te whakarite e ahau ki oku kanohi kia whakaaroaro ahau hei aha ki te kotiro?
2
A he aha ta te Atua e tuwha mai ai i runga? he aha ta te Kaha-rawa taonga tupu i te wahi tiketike?
3
He teka ianei he whakangaromanga mo te tangata kino? he whiu e rere ke ana mo nga kai mahi o te he?
4
He teka ranei e kitea ana e ia oku ara? e taua ana e ia oku hikoinga katoa.
5
Ki te mea i runga i te tekateka noa toku haere, a i hohoro toku waewae ki te tinihanga;
6
Kia paunatia ahau i runga i te pauna tika, kia mohio ai te Atua ki toku tapatahitanga.
7
Ki te mea i kotiti ke toku hikoinga i te ara, a i whai toku ngakau i oku kanohi, i piri ai te he ki oku ringa;
8
Na, ko ahau hei whakato, a ma tetahi atu e kai; kia rangā atu ano hoki oku uri.
9
Ki te mea i whakawairangitia toku ngakau e te wahine, a i whanga ahau ki te tatau o toku hoa;
10
Kia huri paraoa taku wahine ma tetahi atu, kia piko iho ano hoki te tangata ke ki runga i a ia.
11
He kino rawa hoki tera; he hē ano ki ta nga kai whakarite whakawa.
12
He ahi hoki tera e kai ana, a taea noatia te whakangaromanga, a poto iho aku hua, a nga pakiaka ra ano.
13
Ki te mea i whakahaweatia e ahau te whakawa a taku pononga tane, a taku pononga wahine, i a raua e totohe ana ki a au;
14
Ka pehea ra ahau ina whakatika te Atua? he aha taku kupu e whakahoki atu ai ki a ia ina tae mai ia ki te titiro?
15
He teka ranei na toku kai hanga ano ia i hanga i roto i te kopu? a nana ano maua i whai ahua ai i roto i aua puku na ano?
16
Ki te mea i kaiponuhia e ahau ta nga rawa-kore i hiahia ai, a meinga ana e ahau nga kanohi o te pouaru kia pau i te minamina;
17
Ki te mea ranei i kainga taku maramara e toku kotahi, a kihai te pani i kai i tetahi wahi o taua kai;
18
(He mea whakatupu ia naku no toku taitamarikitanga ra ano me te mea ko tona pāpā ahau: te pouaru he mea arahi naku no te kopu ra ano o toku whaea;)
19
Ki te mea i kite ahau i tetahi e tata ana ki te mate, he kore no te kakahu, a kahore he uhi mo te rawa-kore;
20
Ki te mea kihai tona hope i whakapai ki a au, a kihai ia i mahana i nga huruhuru o taku kahui;
21
Ki te mea i ara toku ringa hei pehi i te pani, i toku kitenga he awhina tera moku kei te kuwaha;
22
Kia marere atu toku ringaringa i roto i te peke, kia whati te tākakau o toku ringa.
23
Ko ta te Atua whakangaromanga hoki taku i wehi ai; kihai hoki ahau i marohirohi ake i tona nui.
24
Ki te mea i u atu taku whakaaro ki te koura, a i mea ahau ki te koura para-kore, Ko koe taku e whakawhirinaki atu ai;
25
Ki te mea i koa ahau no te mea kua maha oku rawa, a he nui ta toku ringa i whiwhi ai;
26
Ki te mea i titiro atu ahau ki te ra e whiti ana, ki te marama ranei he mea ataahua nei ina haere;
27
Na, ka kumea pukutia atu toku ngakau, a ka kihitia toku ringa e toku mangai:
28
He kino ano tenei ki ta te kai whakarite whakawa: he whakakahoretanga hoki naku ki te Atua i runga.
29
I koa ranei ahau ki te whakangaromanga o te tangata i kino ki a au, i era ranei ki runga i te pānga mai o te he ki a ia?
30
Kihai ra hoki ahau i tuku i toku mangai kia hara, kihai i whai kia kangā tona wairua.
31
Kihai ranei nga tangata o toku tapenakara i mea, Tana koa te tangata kihai nei i makona i tana kikokiko?
32
Kihai te manene i moe i waho. I whakatuwheratia ano e ahau oku tatau ki te tangata haere.
33
I pera ranei ahau me Arama? i hipoki i oku he? i huna ranei i toku kino ki roto ki toku uma?
34
I wehi koia ahau i te huihui nui? i mataku ranei ki te whakahawea o nga hapu, a whakarongo kau ana, kihai hoki i puta ki waho?
35
Aue, me i whakarongo mai tetahi ki a au! Nana, taku i hiahia ai, kia utua mai taku kupu e te Kaha-rawa, kia tuhituhia hoki he pukapuka e taku hoa riri.
36
Ina, kua amohia e ahau i runga i toku pokohiwi, kua herea hei karauna moku.
37
Kua whakaaturia e ahau ki a ia te maha o oku hikoinga, rite tonu ki to te rangatira toku whakatatanga atu ki a ia.
38
Ki te tangi taku oneone, he whakahe i a au, ki te uru ano ona moa ki te aue,
39
Ki te mea i kainga e ahau ona hua he mea kihai i utua; ki te mea ranei i meinga e ahau ona ariki kia mate,
40
Kia riro pu te witi i te tataramoa, te parei i te otaota kino. Heoi ano nga korero a Hopa.