Job Chapter 32 - Paipera Tapu 1868 | Te Paipera Tapu 1868

Job Chapter 32 - Paipera Tapu 1868

1
Heoi mutu ake te whakahoki kupu a enei tangata tokotoru ki a Hopa, no te mea he tika ia ki tana whakaaro iho.
2
Na mura tonu te riri a Erihu tama a Parakere Puti, no nga whanaunga o Rame: mura ana tana riri ki a Hopa, no te mea ki tana he tika rawa ia i te Atua.
3
I mura ano tana riri ki ona hoa tokotoru, no te mea kihai i kitea e ratou he kupu hei whakahokinga atu, heoi kei te whakahe ano ratou i a Hopa.
4
Na, i tatari a Erihu kia mutu ra ano nga korero a Hopa; no te mea he kaumatua rawa ratou i a ia.
5
Na, te kitenga o Erihu kahore he kupu i nga mangai o aua tangata tokotoru hei whakahokinga atu, mura ana tona riri.
6
Na, ka oho mai a Erihu tama a Parakere Puti, ka mea, He taitamariki ahau, ko koutou ia he koroheke rawa; koia ahau i hopohopo ai, i wehi ai ki te whakaatu i taku whakaaro ki a koutou.
7
I mea ahau, Ma nga ra te korero, ma nga tau kua maha e whakaatu mai te whakaaro nui.
8
Otiia he wairua ano to te tangata: na te manawa ano o te Kaha-rawa ratou i whai mahara ai.
9
Nga tangata nunui, kahore he whakaaro nui o ratou katoa; nga kaumatua, kore ratou katoa e matau ki te whakarite whakawa.
10
Koia ahau i mea ai, Whakarongo ki a au; me whakakite ano e ahau taku whakaaro.
11
Nana, i tatari ahau ki ā koutou kupu; i whai taringa atu ki ā koutou whakaaro mohio i a koutou e rapu kupu ana.
12
Nana, mahara tonu atu ahau ki a koutou, a kihai tetahi o koutou i whakaatu i te he o Hopa, i whakahoki kupu atu ranei ki ana korero.
13
Kei mea koutou, Kua kitea e matou te matauranga. Na te Atua ia i turaki, ehara i te tangata.
14
Na kihai i whakatikaia mai e ia ana kupu ki a au; e kore ano e whakahokia atu e ahau he kupu pera me a koutou ki a ia.
15
Porahurahu kau ana ratou, kore ake a ratou kupu i whakahoki atu ai; mutu ake a ratou korero.
16
Tatari noa ahau, a kihai nei ratou i korero; heoi tu ana ratou, kahore ake a ratou kupu i whakahoki atu ai;
17
Me korero atu ano hoki e ahau aku kupu, maku ano e whakaatu taku whakaaro.
18
Ki tonu hoki ahau i te korero, e akiakina ana ahau e te wairua i roto i a au.
19
Nana, toku kopu, rite tonu ki te waina kahore nei ona putanga; ki nga ipu hou ka tata nei te pakaru.
20
Me korero ahau, kia ta ai toku manawa: ka puaki toku mangai, ka whakahoki kupu atu ahau.
21
Kaua ano ahau e whakapai ki te kanohi tangata kaua ahau e whakapati i te tangata.
22
Kahore hoki ahau e mohio ki te whakapati; penei kua riro wawe ahau i toku Kai-hanga.