Job Chapter 33 - Paipera Tapu 1868 | Te Paipera Tapu 1868

Job Chapter 33 - Paipera Tapu 1868

1
Tena ra, whakarongo mai, e Hopa, ki aku korero, kia whai taringa mai koe ki aku kupu katoa.
2
Nana, kua puaki nei toku mangai, kei te korero toku arero i roto i toku mangai.
3
He mea tika, no roto i toku ngakau aku kupu, ka mārama ano hoki te korerotanga a oku ngutu i te matauranga.
4
He mea hanga ahau na te Wairua o te Atua; na te manawa o te Kaha-rawa ahau i whai ora ai.
5
Ki te taea e koe te whakahoki kupu mai ki a au, whakatikaia o korero ki toku aroaro, e tu ki runga.
6
Nana, kei to te Atua wahi nei ahau, ko tau hoki tena i pai ai: he paru nei ano ahau, he mea hanga hoki.
7
Nana, e kore te wehi ki a au e whakawehi i a koe; e kore ano hoki toku ringa e taimaha iho ki a koe.
8
He pono kua mea mai koe ki oku taringa, i a au ano i whakarongo atu nei ki tou reo e korero ana,
9
E ma ana ahau, kahore oku he: he hara-kore ahau, kahore aku kino.
10
Na, e rapu ana ia i te take riri ki a au, e kiia ana ahau e ia he hoa riri nona.
11
Kua oti oku waewae te karapiti e ia ki te rakau, e ata titiro ana ia ki aku hikoinga katoa.
12
Nana, ehara tenei mea au i te mea tika; me whawhati e ahau to kupu; nui atu hoki te Atua i te tangata.
13
He aha koe i totohe ai ki a ia? e kore hoki e korerotia e ia te tikanga o tetahi o ana meatanga.
14
Kotahi hoki, e rua a te Atua korerotanga, otiia kahore e maharatia mai e te tangata.
15
I te moe, i te putanga moemoea mai o te po, ina au iho te moe o te tangata, i nga moenga i runga i te takotoranga;
16
Ko reira ia whakapuare ai i nga taringa o nga tangata, hīri ai i te ako mo ratou.
17
He mea kia whakanekehia atu ai e ia te tangata i tana mahi, kia hipokina ai ano hoki te whakapehapeha a te tangata.
18
E puritia ana e ia tona wairua kei tae ki te rua, tona ora kei riro i te hoari.
19
E whiua ana hoki ia ki te mamae i runga i tona moenga, ona wheua maha ki te mamae kaha.
20
A whakarihariha noa tona ora ki te taro, tona wairua ki te kai e minaminatia ana.
21
E honia atu ona kiko, a kore noa e kitea, purero mai ana ona wheua kihai nei i kitea i mua.
22
E whakatata ana tona wairua ki te rua, tona ora ki nga kai whakamate.
23
Ki te mea he karere tera kei a ia, he kai whakaatu tikanga, tetahi i roto i te mano, hei whakaatu i tona tika ki te tangata:
24
Katahi ia ka tohu i a ia, a ka mea, Whakaorangia ia kei heke ki te rua; kua kitea hoki e ahau he utu.
25
Tona kiri, nui atu te ngawari i to te tamaiti: ka hoki iho ia ki nga ra o tona tamarikitanga.
26
Ka inoi ia ki te Atua, a ka manako tera ki a ia; ka kite ano ia i tona mata i runga i te koa; ka whakahokia mai e ia tona tika ki te tangata.
27
E titiro mai ana ia ki nga tangata, a ki te mea tetahi, Kua hara ahau, whakaparoritia ake e ahau te tika, a kahore he painga ki a au;
28
Ka whakaorangia e ia tona wairua kei riro ki te rua, a e kite tona ora i te māramatanga.
29
Nana, he maha nga meatanga a te Atua i enei mea katoa ki te tangata,
30
He mea kia hoki mai ai tona wairua i roto i te rua, kia whakamāramatia ai ki te māramatanga o te ora.
31
Kia whai whakaaro mai, e Hopa. Whakarongo mai ki a au. Kati tau, a ka korero atu ahau.
32
Ki te mea he kupu tau, utua mai taku. Korero, ko taku hoki i pai ai kia whakatikaia tau.
33
Ki te kahore, whakarongo mai ki a au, Kati tau, a maku koe e whakaako ki te whakaaro nui.