- 1
- A, te rongonga o Iapini o te kingi o Hatoro, na ka tono tangata ia ki a Iopapa kingi o Marano, ki te kingi o Himirono, ki te kingi ano hoki o Akahapa.
- 2
- Ki nga kingi ano hoki ki te taha ki te nota, ki era i nga maunga, i te mania hoki ki te taha ki te tonga o Kinerota, i te raorao ano hoki i nga taha ano hoki o Roro whaka-te-hauauru,
- 3
- Ki nga Kanaani o nga taha ki te rawhiti, ki te hauauru, ki nga Amori, ki nga Hiti, ki nga Perihi, ki nga Iepuhi i nga maunga, ki nga Hiwi ano hoki i raro iho i Heremona i te whenua o Mitipa.
- 4
- Na, ko to ratou haerenga mai, me a ratou ope katoa, he tini te tangata, me te onepu i te taha o te moana te tokomaha, me nga hoiho, me nga hariata, tona tini.
- 5
- A, te huihuinga mai o enei kingi katoa, na, ka haere ratou, a noho tahi ana ki nga wai o Meromo, whawhai ai ki a Iharaira.
- 6
- Na, ko te meatenga a Ihowa ki a Hohua, Kei wehi i a ratou: kia penei hoki apopo ka hoatu katoa ratou e ahau, mate rawa, ki a Iharaira: me tapahi e koe o ratou hoiho, me tahu ano hoki a ratou hariata ki te ahi.
- 7
- Na, ka huakina tatatia ratou e Hohua, ratou ko nga tangata hapai pakanga katoa, ki nga wai o Meromo; heoi kokiri mai ana ratou ki a ratou.
- 8
- Na, ka homai ratou e Ihowa ki te ringa o Iharaira, a patua iho ratou, whaia ana e ratou, a, tae noa ki Hairona nui, ki Mihirepoto-maimi, ki Raorao Mitipe hoki ki te taha ki te rawhiti; na, patupatua iho ratou e ratou, a kore noa tetahi morehu o ratou i mahue.
- 9
- A rite tonu ta Hohua i mea ai ki a ratou ki ta Ihowa i korero mai ai ki a ia: i tapahia e ia o ratou hoiho, i tahuna hoki a ratou hariata ki te ahi.
- 10
- Na, ka tahuri a Hohua i taua wa, a horo ana i a ia a Hatoro, patua iho hoki e ia tona kingi ki te hoari: ko Hatoro hoki te upoko i mua o aua kingitanga katoa.
- 11
- Na, patua iho e ratou nga mea ora katoa o reira ki te mata o te hoari, a poto noa: kahore i mahue tetahi mea whai manawa: i tahuna ano hoki e ia a Hatoro ki te ahi.
- 12
- I riro katoa mai ano hoki i a Hohua nga pa katoa o era kingi, me nga kingi katoa o reira, a patua iho e ia ki te mata o te hoari, a poto noa ratou; i pera ano ia me ta Mohi, me ta te pononga a Ihowa, i whakahau ai.
- 13
- No nga pa ia i tu i runga i nga pukepuke, kihai ena i tahuna e Iharaira, heoi ano ko Hatoro anake; ko tena i tahuna e Hohua.
- 14
- Otiia i tangohia e nga tamariki a Iharaira ma ratou nga taonga parakete katoa o era pa, me nga kararehe; ko nga tangata katoa ia i patua e ratou ki te mata o te hoari, a poto noa ratou, kihai i mahue i a ratou tetahi mea whai manawa.
- 15
- Ko ta Ihowa i whakahau ai ki tana pononga ki a Mohi, ta Mohi hoki i whakahau ai ki a Hohua, a i pera ano a Hohua; kihai i kapea e ia tetahi o nga mea katoa i whakahaua e Ihowa ki a Mohi.
- 16
- Na, riro ana i a Hohua taua whenua katoa, te maunga, me nga wahi katoa o te tonga, me te whenua katoa o Kohena, me te raorao, me te mānia, me te maunga o Iharaira, me to reira raorao ano;
- 17
- O Maunga Haraka, e anga nei whakarunga ki Heira, a tae noa ki Paara-kara i Raorao Repanona, i raro iho i Maunga Heremona: i mau ano i a ia o ratou kingi katoa, a patua iho, whakamatea iho.
- 18
- He maha nga ra i whawhai ai a Hohua ki aua kingi katoa.
- 19
- Kahore he pa i hohou rongo ki nga tamariki a Iharaira, heoi ano ko nga Hiwi i noho i Kipeono: ko era atu katoa i riro mai i runga i te whawhai.
- 20
- Na Ihowa hoki o ratou ngakau i whakapakeke, kia turia ai e ratou a Iharaira ki te riri, kia ngaro ai ratou i a ia, kia kore ai hoki ratou e tohungia, engari kia ngaro ratou i a ia, kia pera me ta Ihowa i whakahau ai ki a Mohi.
- 21
- I taua wa ano ka haere atu a Hohua, a hunā iho e ia nga Anakimi o nga maunga, o Heperona, o Repiri, o Anapa, o nga maunga katoa o Hura, o nga maunga katoa ano hoki o Iharaira: i whakangaromia ngatahitia ratou e Hohua me o ratou pa.
- 22
- Kihai i mahue tetahi o nga Anakimi i te whenua o nga tamariki a Iharaira: ko Kaha, ko Kata, ko Aharoro anake, nga wahi i toe ai ratou.
- 23
- Na, ka riro i a Hohua te whenua katoa, ka pera tonu me nga mea katoa i kiia mai e Ihowa ki a Mohi; a hoatu ana e Hohua hei kāinga tupu mo Iharaira, he mea whakarite ki o ratou wehenga, puta noa i o ratou iwi. Na, ka takoto kau te whenua i te whawhai.
Address: 
Phone: 
Email: