- 1
- Na ka mahi kino ano hoki nga tamariki a Iharaira i te tirohanga a Ihowa, a ka hoatu ratou e Ihowa ki te ringa o nga Pirihitini, a e wha tekau nga tau.
- 2
- Na, ko tetahi tangata o Toraha no te hapu o nga Rani, tona ingoa ko Manoa, he pākoko hoki tana wahine, kahore ano i whanau tama.
- 3
- Na, ko te putanga mai o te anahera a Ihowa ki te wahine, ka mea ki a ia, Na, he pākoko tena koe, kahore hoki i whanau tama: otiia ka hapu ano koe, ka whanau he tamaiti.
- 4
- Na, kia tupato ra, kaua hoki e inumia he waina, he wai whakahaurangi ranei; kaua ano hoki e kainga tetahi mea poke.
- 5
- No te mea ka hapu tena koe, a ka whanau he tamaiti; na, kaua he heu e whakapangia ki tona mātenga: hei Natari hoki tena tamaiti ki te Atua no te kopu mai ano: a mana e timata te whakaora o Iharaira i roto i te ringa o nga Pirihitini.
- 6
- Na, haere ana te wahine, a korero ana ki tona tahu, ka mea, Te tangata ra a te Atua i puta mai nei ki a au! tona ahua kei te ahua o te anahera a te Atua; nui rawa te wehi! heoi kihai ahau i ui atu no hea ia, kihai ano hoki i korerotia mai e ia tona ingoa ki a au.
- 7
- I ki mai ano hoki ia ki a au, Ka hapu tena koe, a ka whanau he tamaiti; na, kaua koe e inu i te waina, i te wai whakahaurangi ranei, kaua ano hoki e kainga tetahi mea poke; he Natari hoki tena tamaiti ki te Atua no te kopu mai ano, a mate noa.
- 8
- Na, ka inoi a Manoa ki a Ihowa, a ka mea, Tena ra, e toku Ariki, kia haere mai ano hoki ki a maua te tangata a te Atua i tonoa mai na e koe, hei whakaatu i tetahi tikanga ki a maua mo te tamaiti ka whanau nei.
- 9
- A i rongo te Atua ki te reo o Manoa, a ka haere mai ano hoki te anahera a te Atua ki te wahine i a ia e noho ana i te parae; ko Manoa hoki ko tona tahu kahore i a ia.
- 10
- Na, hohoro tonu te wahine, oma ana, korero ana ki tona tahu, ka mea ki a ia, Nana! kua puta mai ki a au te tangata i haere mai ki a au i tera rangi.
- 11
- Katahi ka whakatika a Manoa, a aru ana i tana wahine, a ka tae mai ki taua tangata, ka mea ki a ia, Ko koe ranei te tangata i korero ra ki te wahine nei? Na, ko tana meatanga mai, Ae.
- 12
- Na, ko te meatanga atu a Manoa, Kia mana ra to kupu. Tena koa nga tikanga mo te tamaiti, me aha hoki ia e maua?
- 13
- Na, ka mea mai te anahera a Ihowa ki a Manoa, Kia tupato ra te wahine i nga mea katoa i korero ai ahau ki a ia.
- 14
- Kaua ia e kai i tetahi mea i puta mai i te waina; kaua ano e inumia e ia he waina, he wai whakahaurangi ranei, kaua ano hoki ia e kai i tetahi mea poke: kia mau ia ki nga mea katoa i kiia atu e ahau ki a ia.
- 15
- Na, ko te meatanga mai a Manoa ki te anahera a Ihowa, Kia pupuru maua i a koe, kia takā ai e maua he kuao koati mau.
- 16
- Na, ka mea te anahera a Ihowa ki a Manoa, Ahakoa pupuri noa koe i a au, e kore ahau e kai i tau taro: a ki te meatia e koe he tahunga tinana, me whakaeke ma Ihowa. Kihai hoki a Manoa i mohio he anahera ia na Ihowa.
- 17
- Katahi ka mea a Manoa ki te anahera a Ihowa, Ko wai to ingoa, kia whakahonore ai maua i a koe, ina mana o korero?
- 18
- Na, ko te meatanga atu a te anahera a Ihowa ki a ia, Na te aha toku ingoa i uia na e koe; he mea whakamiharo nei hoki?
- 19
- Na, ka tikina e Manoa tetahi kuao koati, me tetahi whakahere toto-kore, a whakaekea ana e ia ki runga ki te kohatu ki a Ihowa: na, he mea whakamiharo te mahi a taua anahera; me te titiro mai ano a Manoa raua ko tana wahine.
- 20
- I te putanga ake hoki o te mura i runga i te aata whaka-te-rangi, na, kua kake atu te anahera a Ihowa i roto i te mura o te aata. A, te kitenga o Manoa raua ko tana wahine, hinga tapapa ana raua ki te whenua.
- 21
- Na, mutu ake te puta mai o te anahera a Ihowa ki a Manoa raua ko tana wahine. Katahi a Manoa ka mohio he anahera ia na Ihowa.
- 22
- Na, ko te meatanga a Manoa ki tana wahine, Ka mate rawa taua; kua kite hoki taua i te Atua.
- 23
- Ano ra ko tana wahine ki a ia, Me i pai a Ihowa ki te whakamate i a taua, kihai i tangohia e ia te tahunga tinana, me te whakahere toto-kore a o taua ringa, kihai ano hoki i whakakitea mai e ia enei mea katoa ki a taua, kihai hoki i korerotia nga penei me ana nei inaianei ki a taua.
- 24
- Na, ka whanau taua wahine, he tamaiti, a huaina ana e ia tona ingoa ko Hamahona: na, ka tupu taua tamaiti, a ka manaakitia e Ihowa.
- 25
- Na, ka timata te wairua o Ihowa te aki i a ia i roto i te puni o Rana, i te takiwa o Toraha, o Ehetaoro.
Address: 
Phone: 
Email: