- 1
- Na ko nga iwi enei i waiho e Ihowa hei whakamatautau mana i a Iharaira, i nga mea kahore ano i mohio ki nga pakanga katoa o Kanaana;
- 2
- Hei mea kau ia kia mohio ai nga whakatupuranga o nga tamariki a Iharaira, hei whakaako i a ratou ki te whawhai, i te hunga ia kahore i mohio ki aua mea i mua;
- 3
- Ko nga rangatira tokorima o nga Pirihitini, ko nga Kanaani katoa, ko nga Haironi, ratou ko nga Hiwi i noho i Maunga Repanona, i Maunga Paara-heremona, a tae noa ki te haerenga atu ki Hamata.
- 4
- Na, hei whakamatautau ratou mo Iharaira, kia mohiotia ai e rongo ranei ratou ki nga whakahaunga a Ihowa i whakahaua e ia ki o ratou matua, he mea whakapuaki mai na Mohi.
- 5
- Na, ka noho nga tamariki a Iharaira ki waenganui o nga Kanaani, o nga Hiti, o nga Amori, o nga Perihi, o nga Hiwi, o nga Iepuhi.
- 6
- A ka tango i a ratou tamahine hei wahine ma ratou, ka hoatu ano hoki i a ratou tamahine ki a ratou tamariki, ka mahi ano hoki ki o ratou atua.
- 7
- Na, kua mahi nga tamariki a Iharaira i te kino i te tirohanga a Ihowa, wareware ake ki a Ihowa ki to ratou Atua, mahi ana hoki ki nga Paara, ki nga ngahere.
- 8
- Na, ka mura te riri a Ihowa ki a Iharaira, a hokona atu ana ratou e ia ki te ringa o Kuhana-rihataimi kingi o Mehopotamia. Na, e waru nga tau i mahi ai nga tamariki a Iharaira ki a Kuhana-rihataimi.
- 9
- A, te tangihanga atu a nga tamariki a Iharaira ki a Ihowa, na, ka whakaarahia ake e Ihowa he kai whakaora, mo nga tamariki a Iharaira, hei whakaora i a ratou; ara, a Otoniere tama a Kenaha teina o Karepe.
- 10
- Na, i runga i a ia te wairua o Ihowa, a i whakarite whakawa ia mo Iharaira; i haere hoki ki te whawhai; a homai ana e Ihowa ki tona ringa a Kuhana-rihataimi kingi o Mehopotamia: na, kua kaha tona ringa ki te whawhai ki a Kuhana-rihataimi.
- 11
- A e wha tekau nga tau i takoto kau ai te whenua i te whawhai. Na ka mate a Otoniere tama a Kenaha.
- 12
- Na, ka mahi kino ano nga tamariki a Iharaira i te tirohanga a Ihowa, a ka whakakahangia e Ihowa a Ekerona kingi o Moapa ki te whawhai ki a Iharaira, mo ratou i mahi kino i te tirohanga a Ihowa.
- 13
- Katahi ka huihuia mai e ia ki a ia nga tamariki a Amona ratou ko Amareke, a haere ana, patua ana e ia a Iharaira, a tangohia ana e ia te pa nikau.
- 14
- A, kotahi tekau ma waru nga tau i mahi ai nga tamariki a Iharaira ki a Ekerona, kingi o Moapa.
- 15
- A, te tangihanga a nga tamariki a Iharaira ki a Ihowa, na, ka whakaarahia mai e Ihowa tetahi kai whakaora mo ratou, a Ehuru tama a Kera, he Peniamini, he tangata ringa maui: na, ka hoatu e nga tamariki a Iharaira he hakari kia kawea e ia ki a Ekerona kingi o Moapa.
- 16
- Otiia kua oti i a Ehuru tetahi hoari te hanga mana; e rua ona mata, kotahi whatianga te roa; na, ka whitikiria e ia i roto i ona kakahu ki tona huha matau.
- 17
- Na, ko tana tukunga mai i te hakari ki a Ekerona kingi a Moapa: na, he tangata tetere rawa a Ekerona.
- 18
- A ka mutu ta tera tuku i te hakari, ka tonoa atu e ia te hunga i mauria mai ai te hakari.
- 19
- A hoki mai ana ia i nga whakapakoko i Kirikara, ka mea, He kupu puku taku ki a koe, e te kingi. Na, ka mea tera, Whakarongoa. Katahi ka mawehe atu i a ia te hunga katoa e tu ana i tona taha.
- 20
- Na, ko te haerenga mai o Ehuru ki a ia; a i te noho ia i te ruma raumati; mona anake hoki tera. Na, ka mea a Ehuru, He kupu na te Atua taku ki a koe. Katahi ia ka whakatika mai i tona nohoanga.
- 21
- Na, ka torona iho tona ringa maui e Ehuru, ka mau ki te hoari i tona huha matau, werohia atu ana ki tona kopu.
- 22
- A ngoto tahi atu te kakau me te mata, a tutakina iho te mata e te ngako, tē taea te unu te hoari i roto i tona kopu, a ka puta mai te paru ki waho.
- 23
- Katahi ka haere atu a Ehuru na te whakamahau, a tutakina atu ana e ia nga tatau o te ruma ki a ia, kiia iho hoki.
- 24
- A, tona haerenga atu, ka haere mai nga pononga a tera, a, to ratou kitenga kua kiia nga tatau o te ruma, ka mea ratou, He pono kei te uhi ona waewae i te ruma raumati.
- 25
- Tatari ana ratou, a whakama noa, a kahore noa iho kia wahia e ia nga tatau o te ruma; katahi ratou ka mau ki te ki, a wahia ana e ratou. Na, kua taka to ratou ariki ki te whenua, kua mate.
- 26
- Ko Ehuru ia i mawhiti atu i a ratou e tatari roa ana, a whakarerea mai ana e ia nga whakapakoko, na mawhiti atu ana ki Heirata.
- 27
- A tona taenga atu, ka whakatangihia e ia te tetere ki Maunga Eperaima, a heke mai ana nga tamariki a Iharaira i runga i te maunga hei hoa mona, ko ia hoki i to ratou aroaro.
- 28
- Katahi ia ka mea ki a ratou, Haere mai tatou, kua homai hoki e Ihowa nga Moapi o koutou hoa riri ki o koutou ringaringa. Na, heke ana ratou i muri i a ia, a ka riro mai i a ratou nga whitinga atu a Horano ki Moapa; kihai hoki i tukua tetahi tangata kia whiti atu.
- 29
- Na, patua iho e ratou nga Moapi i taua wa; ki te whakaaro iho kotahi tekau mano nga tangata, he hunga tetere kau, he marohirohi katoa; kihai hoki tetahi i mawhiti.
- 30
- Na, ka hinga a Moapa i taua ra i te ringa o Iharaira. A e waru tekau nga tau i takoto kau ai te whenua i te pakanga.
- 31
- A i muri i a ia, na, ko Hamakara tama a Anata, a patua iho e ia nga Pirihitini, e ono rau nga tangata, ki te wero kau: na, ka ora ano hoki a Iharaira i a ia.
Address: 
Phone: 
Email: