- 1
- A ka mate a Ehuru, ka mahi kino ano hoki nga tamariki a Iharaira i te tirohanga a Ihowa.
- 2
- Na, ka hokona ratou e Ihowa ki te ringa o Iapini kingi o Kanaana, ko te kingi hoki ia o Hatoro, a ko Hihera te rangatira o tana ope; i Harohete ano hoki o nga tauiwi tona nohoanga.
- 3
- Katahi ka tangi atu nga tamariki a Iharaira ki a Ihowa: e iwa rau nei hoki ana hariata rino, a e rua tekau nga tau i tukinotia rawatia ai e ia nga tamariki a Iharaira.
- 4
- A ko Tepora poropiti, wahine a Rapiroto, ko ia te kai whakarite whakawa o Iharaira i taua wa.
- 5
- A tona nohoanga kei raro i te nikau a Tepora i te takiwa o Rama, o Pete-ere, i Maunga Eperaima: na, ka haere mai nga tamariki a Iharaira ki runga ki a ia kia whakaritea nga whakawakanga.
- 6
- Na, ka tono tangata atu ia hei karanga i a Paraka tama a Apinoama i Kerehe Napatari, a ka mea ki a ia, Kihai ianei a Ihowa te Atua o Iharaira i whakahau mai, i mea, Haere ki te kukume tangata mai ki Maunga Taporo; kia tekau mano tangata ano hoki o nga tamariki a Napatari o nga tamariki a Hepuruna e riro mai hei hoa mou.
- 7
- A maku e kukume mai ki a koe ki Awa Kihona a Hihera rangatira o te ope a Iapini, me ana hariata, me ona mano; ka hoatu ano hoki e ahau ki tou ringa.
- 8
- Na, ko te meatanga mai a Paraka ki a ia, Ki te haere tahi koe i a au, ka haere ahau; a ki te kahore koe e haere tahi i a au, e kore ahau e haere.
- 9
- Katahi ia ka mea atu, Ae ra, me haere tahi taua: otiia e kore koe e whai kororia i te ara ka haere nei koe; no te mea ka hokona e Ihowa a Hihera ki roto ki te ringa o te wahine. Na, ka whakatika a Tepora, a haere tahi ana me Paraka ki Kerehe.
- 10
- Katahi ka karangarangatia a Hepuruna raua ko Napatari e Paraka ki Kerehe; a kotahi tekau mano o nga tangata i haere i raro i ona waewae: i haere tahi ano hoki a Tepora i a ia.
- 11
- Na, kua wehe atu a Hepere te Keni i roto i nga Keni. Ko tetahi ia o nga tamariki a Hopapa hungawai o Mohi; a tae noa atu tana whakaturanga i tona teneti ki te mānia i Taanaimi, ki tera i Kerehe.
- 12
- A, te korerotanga atu ki a Hihera kua riro a Paraka tama a Apinoama ki runga ki Maunga Taporo;
- 13
- Na, ka karangarangatia e Hihera ana hariata katoa, e iwa nga rau, he hariata rino, me tona nuinga katoa, i Harohete o nga tauiwi ki Awa Kihona.
- 14
- Katahi ka mea a Tepora ki a Paraka, Whakatika, ko te rangi hoki tenei e tukua ai e Ihowa a Hihera ki tou ringa; kahore ianei a Ihowa i haere atu na i mua i a koe? Na, ko te haerenga iho o Paraka i runga i Maunga Taporo kotahi tekau mano hoki nga tangata ki te whai i a ia.
- 15
- A meinga ana e Ihowa a Hihera kia whati, me ana hariata katoa, me tana ope katoa i te mata o te hoari i te aroaro o Paraka. Katahi ka marere iho a Hihera i runga i tana hariata, a rere a waewae ana.
- 16
- Na, ka whaia atu nga hariata me te ope e Paraka, a tae noa ki Harohete o nga tauiwi: a hinga ana te ope katoa a Hihera i te mata o te hoari; kihai hoki tetahi i toe.
- 17
- Ko Hihera ia, rere a waewae ana ia, a, te teneti o Taere wahine a Hepere Keni: he rongo mau hoki ta Iapini kingi o Hatoro ratou ko te whare o Hepere o te Keni.
- 18
- Na, ka puta atu a Taere ki te whakatau i a Hihera, a ka mea ki a ia, Peka mai, e taku ariki, peka mai ki a au; kaua e wehi: Katahi ia ka peka atu ki a ia ki te teneti, a ka hipokina e ia ki te koroka.
- 19
- Na, ko tana meatanga mai ki a ia, Tena, maku tetahi wai hei inu, kia iti; e mate wai ana hoki ahau. Katahi ka wetekina e ia te koki waiu, a whakainumia ana ia, na hipokina iho ia e ia.
- 20
- Na, ka mea mai tera ki a ia, E tu koe ki te kuwaha o te teneti, a ki te haere mai he tangata ki te ui ki a koe, ki te mea, He tangata ranei to konei? Na, ka mea atu koe, Kahore.
- 21
- Katahi ka tikina e Taere, wahine a Hepere, tetahi titi o te teneti, a ka mau tona ringa ki te hama, na, tē kaha te haere atu ki a ia, heoi patua iho e ia te titi ki tona rahirahinga, a ngoto tonu atu ki te whenua: i parangia hoki ia e te moe, i ngenge. Na, kua mate.
- 22
- Na, ko te whainga mai a Paraka i a Hihera; a ka puta atu a Taere ki te whakatau i a ia, ka mea ki a ia, Haere mai, a maku e whakaatu ki a koe tau tangata e rapu na. A tona haerenga atu ki a ia, na ko Hihera e takoto ana, kua mate, me te titi i tona rahirahinga.
- 23
- Heoi hinga ana a Iapini kingi o Kanaana i te Atua i taua ra i te aroaro o nga tamariki a Iharaira.
- 24
- Na, ka kake, ka kaha haere, te ringa o nga tamariki a Iharaira ki a Iapini kingi o Kanaana, a hautopea noatia atu e ratou a Iapini kingi o Kanaana.
Address: 
Phone: 
Email: