- 1
- Na, ka mahi kino nga tamariki a Iharaira i te tirohanga a Ihowa, a tukua ana ratou e Ihowa ki te ringa o Miriana, e whitu nga tau.
- 2
- A nui atu te kaha o te ringa o Miriana i to Iharaira: a na Miriana i hangā ai e nga tamariki a Iharaira nga rua i nga maunga mo ratou, me nga ana, me nga pa taiepa.
- 3
- Na, ka oti te mahi whakato a Iharaira, ka haere mai a Miriana raua ko Amareke, me nga tangata o te rawhiti; kei te whakaeke i a ratou.
- 4
- Whakapaea iho e ratou, a moti ake i a ratou nga hua o te whenua, a tae noa koe ki Kaha, kihai hoki i mahue tetahi oranga mo Iharaira, kahore he hipi, he kau, he kaihe.
- 5
- I whakaeke mai hoki ratou me a ratou kahui, i haere mai me a ratou teneti; koia ano kei nga mawhitiwhiti te maha; e kore hoki e taea te tatau ratou me a ratou kamera: na, haere mai ana ratou ki te whenua whakangaro ai.
- 6
- Na, kua rawa-kore noa iho a Iharaira i a Miriana; a ka tangi atu nga tamariki a Iharaira ki a Ihowa.
- 7
- A, te tangihanga atu o nga tamariki a Iharaira ki a Ihowa i te mahi a Miriana,
- 8
- Ka tono tangata mai a Ihowa ki nga tamariki a Iharaira, he poropiti, hei mea ki a ratou, Ko te kupu tenei a Ihowa Atua o Iharaira, Naku koutou i kawe mai ki runga nei i Ihipa; naku hoki koutou i whakaputa mai i te whare pononga;
- 9
- Naku koutou i whakaora i te ringa o nga Ihipiana, i te ringa hoki o o koutou kai tukino katoa; a peia ana ratou e ahau i to koutou aroaro, hoatu ana hoki e ahau to ratou whenua ki a koutou.
- 10
- I mea ano hoki ahau ki a koutou, Ko Ihowa ahau ko to koutou Atua; kaua e wehingia nga atua o nga Amori no ratou nei te whenua e noho na koutou: heoi kahore nei koutou i whakarongo ki toku reo.
- 11
- Katahi ka haere mai te anahera a Ihowa, a noho ana i raro i tetahi oki i Opora, he rakau na Ioaha Apieteri: a i te patu witi tana tama a Kireono ki te mara waina, he mea kia toe ai i a Miriana.
- 12
- Na, ka puta mai te anahera a Ihowa ki a ia, a ka mea ki a ia, Kei a koe a Ihowa, e te tangata marohirohi.
- 13
- Na, ko te meatanga mai a Kireono ki a ia, Aue, e taku ariki, me i a matou a Ihowa, na te aha i pono mai ai ki a matou enei mea katoa? kei hea hoki ana merekara i korero mai ai o matou matua ki a matou, i mea ai, Kahore ianei a Ihowa i kawe mai i a tatou i Ihipa? na, kua whakarere nei a Ihowa i a matou, kua tukua ano hoki matou ki te ringa o Miriana.
- 14
- Na, ko te tahuritanga mai o Ihowa ki a ia, te meatanga mai hoki, Haere i runga i tenei kaha ou, whakaorangia hoki a Iharaira i te ringa o Miriana: kahore ianei ahau i tono i a koe?
- 15
- Katahi ka mea tera ki a ia, Aue, e taku ariki, ma te aha ahau e whakaora ai i a Iharaira! titiro hoki, he rawa-kore taku hapu i roto i a Manahe, ko te iti rawa hoki ahau i roto i te whare o toku papa.
- 16
- Na, ko te meatanga mai a Ihowa ki a ia, Ko ahau hei hoa mou; a ka patua e koe a Miriana, me te mea he tangata kotahi ratou.
- 17
- Katahi ia ka mea atu ki a ia, Na, ki te mea kua manakohia ahau e koe, tena ra, whakaaturia mai he tohu ki a au mou ka korero mai nei ki a au.
- 18
- Kaua ra e haere atu i konei, kia tae mai ra ano ahau ki a koe ki te kawe mai i taku whakahere, kia whakatakotoria ra ano e ahau ki tou aroaro. Na, ko tau meatanga mai, Me noho ahau, kia hoki mai ra ano koe.
- 19
- Katahi ka haere a Kireono, a takā ana e ia tetahi kuao koati, me tetahi epa paraoa hei keke rewena-kore: ko te kikokiko i whaowhina e ia ki te kete, ko te hupa i ringitia ki te pāta, na kawea mai ana ki waho ki a ia ki raro i te oki; a tapaea atu ana ki a ia.
- 20
- Na, ko te meatanga mai a te anahera a te Atua ki a ia, Tangohia te kikokiko me nga keke rewena-kore, ka whakatakoto ai ki runga ki tenei kamaka, ka riringi ai hoki i te hupa. Na, peratia ana e ia.
- 21
- Katahi ka whatorona atu e te anahera a Ihowa te pito o te tokotoko i tona ringa, a pa atu ana ki te kikokiko me nga keke rewena-kore; na, ko te putanga ake o te ahi i roto i te kamaka, pau ake te kikokiko me nga keke rewena-kore. Na, kua riro atu te anahera a Ihowa i tana tirohanga mai.
- 22
- A, te kitenga o Kireono ko te anahera ia a Ihowa, na, ka mea a Kireono, Aue, e te Ariki, e Ihowa! moku hoki i kite i te anahera a Ihowa titiro atu titiro mai.
- 23
- Katahi ka mea mai a Ihowa ki a ia, Kei te mau te rongo ki a koe; kaua e wehi: e kore koe e mate.
- 24
- Na, ka hangā e Kireono tetahi aata ma Ihowa ki reira, a huaina iho e ia Ko Ihowa-haromo: kei Opora o nga Apieteri na ano taua mea, a taea noatia iho tenei ra.
- 25
- A i taua po ano ka mea a Ihowa ki a ia, Tikina te puru kau a tou papa, te rua hoki o nga puru, e whitu nei ona tau, ka wawahi ai i te aata o Paara, i tera a tou papa: me tua hoki e koe te motu nehenehe i tona taha.
- 26
- Me hanga ano hoki e koe he aata ma Ihowa ma tou Atua ki runga ki tenei kamaka, he mea whakararangi; ka mau ai ki te tuarua o nga puru, na, whakaekea atu hei tahunga tinana ki runga ki nga rakau o te nehenehe e tuakina e koe.
- 27
- Katahi ka tangohia e Kireono etahi tangata kotahi tekau, no ana pononga, a rite tonu tana i mea ai ki ta Ihowa i korero ai ki a ia: na, i wehi ia i te whare o tona papa, i nga tangata ano hoki o te pa i kore ai e meatia i te awatea; koia i meatia potia ai e ia.
- 28
- Na, te marangatanga ake o nga tangata o te pa i te ata, re! kua wahia iho te aata o Paara, kua oti te motu nehenehe i tona taha te tua, kua oti hoki te tuarua o nga puru te whakaeke ki te aata i hangā ra.
- 29
- Na, ko ta ratou meatanga ki tetahi ki tetahi, I meatia tenei mea e wai? A ka rapu ratou, ka ui, na, ka korerotia mai, I meatia tenei mea e Kireono tama a Ioaha.
- 30
- Katahi ka mea mai nga tangata o te pa ki a Ioaha, Whakaputaina mai to tama ki waho, kia whakamatea; mona i wahi i te aata o Paara, i tua hoki i te nehenehe i tona taha.
- 31
- Na, ko te meatanga atu a Ioaha ki te hunga katoa e tu mai ana, Ko koutou ranei hei kai tohe i ta Paara whakawa? ko koutou ranei hei whakaora i a ia? Ki te tohe tetahi i tana whakawa, me whakamate i te ata nei ano. Ki te mea he atua ia, mana ano tana whakawa e tohe mo tana aata kua wahia nei.
- 32
- Na, huaina iho ia e ia i taua ra, Ko Ierupaara; i mea hoki, Ma Paara ano e tohe tana whakawa mona, i tona aata kua wahia nei e ia.
- 33
- Na, ka huihui tahi a Miriana katoa, ratou ko Amareke, ko nga tangata o te rawhiti, a ka whiti mai, ka noho hoki ki Raorao Ietereere.
- 34
- Na, kua tau te Wairua o Ihowa ki runga ki a Kireono, a whakatangihia ana e ia te tetere, hei karanga i a Apietere ki te aru i a ia.
- 35
- I tono karere ano hoki ia puta noa i a Manahe, a ka huihuia mai ano hoki ratou ki a ia: i tono karere ano hoki ia ki a Ahera, ki a Hepuruna, ki a Napatari; a ka haere mai ratou ki te whakatau i a ratou.
- 36
- Na, ko te meatanga a Kireono ki te Atua, Ki te mea noku te ringa e whakaorangia ai e koe a Iharaira, ki te pera koe me tau i korero mai ra,
- 37
- Na, ka waiho nei e ahau te huruhuru hipi ki runga ki te papa; a ki te mea i runga i te huruhuru anake te tomairangi, a e maroke ana a runga katoa o te whenua, katahi ahau ka mohio noku te ringa e whakaorangia ai e koe a Iharaira, ka rite ano ki tau i korero mai ra.
- 38
- A pera tonu: tana marangatanga ake i te ata, na, ka romia e ia te huruhuru, a tauia ana te tomairangi i roto i te huruhuru, ki tonu te peihana i te wai.
- 39
- Ka korero ano a Kireono ki te Atua, Kei mura mai to riri ki a au, a heoi ano aku korerotanga ko tenei: tena, kia kotahi ake whakamatauranga aku ki te huruhuru, a ka kati. Kia maroke ko te huruhuru anake, a kia whai tomairangi a runga i te whenua katoa.
- 40
- A pera ana ano te Atua i taua po: a ko te huruhuru anake i maroke; i whai tomairangi hoki a runga i te whenua katoa.
Address: 
Phone: 
Email: