- 1
- Na, ka maranga wawe a Ierupaara, ara, a Kireono, ratou ko tona nuinga katoa, a noho ana ki te puna wai o Haroro; a kei te taha ki te nota o ratou te puni o Miriana, kei Puke More, kei te raorao.
- 2
- Na, ko te meatanga mai a Ihowa ki a Kireono, He nui rawa te hunga i a koe nei; e kore e hoatu e ahau a Miriana ki o ratou ringaringa, kei whakapehapeha mai a Iharaira ki a au, kei mea, Na toku ringa ano ahau i whakaora.
- 3
- Na, tena, karanga atu ki nga taringa o te iwi, mea atu, Ki te wehi, ki te pawera tetahi, hoki atu, hohoro te haere atu i Maunga Kireara. Na, e rua tekau ma rua mano o te iwi i hoki; a mahue iho, kotahi tekau mano.
- 4
- A i mea mai ano a Ihowa ki a Kireono, E nui ana ano te iwi ra; kawea ratou ki raro ki te wai, a ko ahau hei kai whakamatautau mau i a ratou ki reira: a ko taku e mea ai ki a koe, Me haere tahi tenei i a koe, ko ia e haere tahi i a koe; a ko taku e mea ai ki a koe, E kore tenei e haere tahi i a koe, kaua tena e haere.
- 5
- Na, ko tana kawenga i te iwi ki raro ki te wai, a ka mea a Ihowa ki a Kireono, Te hunga katoa e mitikia ai te wai e o ratou arero, e pera ana me te kuri e miti nei, me whakatu ratou e koe ki tahaki; me te hunga katoa ano hoki e piko iho ana ki runga ki o ratou turi inu ai.
- 6
- A, te tokomahatanga o te hunga i mitimiti, me te whakapa ano i a ratou ringa ki o ratou mangai, e toru rau tangata: i piko iho hoki te nuinga katoa o te iwi ki runga ki o ratou turi ki te inu i te wai.
- 7
- Na, ko te meatanga mai a Ihowa ki a Kireono. Ko nga rau e toru i mitimiti ra aku tangata e ora ai koutou, e hoatu ai hoki e ahau a Miriana ki tou ringa; a kia haere te iwi katoa ia tangata ia tangata ki o ratou wahi.
- 8
- Na, ka mauria atu e te iwi he o ki o ratou ringaringa, me a ratou tetere: ko te nuinga ia o Iharaira i tonoa e ia ki tona teneti ki tona teneti, a purutia ana aua tangata e toru nga rau: na, i raro i a ia te puni o Miriana, i te raorao.
- 9
- Na, i taua po ka mea a Ihowa ki a ia, Whakatika, haere ki raro ki te puni ra, kua hoatu hoki e ahau ki tou ringa.
- 10
- A ki te wehi koe ki te haere ki raro, haere korua ko Pura ko to tangata ki raro ki te puni.
- 11
- A ka rongo koe ki a ratou korero, katahi ka maia ou ringa, a ka haere koe ki raro ki te puni. Na, ko te haerenga atu o raua ko tana tangata ko Pura ki te hiku o nga matua o te puni.
- 12
- A e takoto noa ana i te raorao a Miriana, a Amareke, me nga tangata katoa o te rawhiti, koia ano kei nga mawhitiwhiti te maha; me a ratou kamera hoki, kahore e taea te tatau; rite tahi ano ki te onepu i te taha o te moana te maha.
- 13
- A, te haerenga atu o Kireono, na, e korero ana tetahi tangata i te moe ki tona hoa, e mea ana, Nana, moe iho ahau, a ko tetahi keke taro parei e huri mai ana ki te puni o Miriana. Na, kua tae mai ki te teneti; kei te aki; na, kua hinga, kua huri koaro, a takoto ana te teneti.
- 14
- Na, ka whakahokia mai e tona hoa, a ka mea mai, Ehara tena i te mea ke atu i te hoari a Kireono tama a Ioaha; he tangata ia no Iharaira, a kua hoatu e te Atua a Miriana me te ope katoa ki tona ringa.
- 15
- A te rongonga o Kireono i te korerotanga o te moe, me tona tikanga, na ka koropiko ia, a hoki ana ki te puni o Iharaira, ka mea, Whakatika, kua homai hoki e te Atua te ope a Miriana ki o koutou ringa.
- 16
- Katahi ka wehea e ia nga tangata e toru rau, kia toru nga matua, a whakawhiwhia ana e ia nga ringa o ratou katoa ki te tetere, ki te oko takoto noa, ki te rama i roto i te oko.
- 17
- A i mea ano ia ki a ratou, Titiro mai ki a au, kia rite hoki ta koutou e mea ai: na, e haere ana tenei ahau ki te hiku o te ope, a kia rite ta koutou e mea ai ki taku e mea ai.
- 18
- A ka whakatangi matou ko oku hoa katoa i te tetere, na, me whakatangi ano hoki nga tetere e koutou i nga taha katoa o te puni katoa, me ki ake hoki, Ko te hoari a Ihowa raua ko Kireono.
- 19
- Na, ka haere mai a Kireono me tona rau kotahi ki te hiku o te puni i te timatanga o to waenga mataaratanga, i te mea katahi ano ka whakaturia nga kai mataara: na, whakatangihia ana e ratou nga tetere, a wahia iho nga oko i o ratou ringa.
- 20
- Heoi whakatangihia ana nga tetere e nga matua e toru, wahia ana hoki e ratou nga oko: i puritia e ratou nga rama ki o ratou ringa maui, me nga tetere ki o ratou ringa matau, whakatangi ai; me to ratou karanga hoki, Ko te hoari a Ihowa raua ko Kireono.
- 21
- Na, tu ana ratou i tona turanga i tona turanga, i nga taha katoa o te puni: a ka rere katoa te puni, ka hamama, ka whati.
- 22
- I whakatangi ano hoki nga rau e toru i nga tetere, a ka meinga e Ihowa kia anga te hoari a tenei a tenei ki tona hoa ki tona hoa, puta noa i te puni katoa: na, ka whati te puni katoa ki Pete-hita, ki Tererata, ki te tukunga atu hoki ki Apere-mehora, tae noa ki Tapata.
- 23
- Katahi ka huihuia mai nga tangata o Iharaira, i roto i a Napatari, i a Ahera, i a Manahe katoa, a whaia ana a Miriana e ratou.
- 24
- A i tono karere ano a Kireono puta noa i Maunga Eperaima hei mea atu, Haere mai ki raro ki te whakatau i a Miriana; nohoia mai hoki nga wai, a puta noa ki Peta-para ki Horano, hei arai mai mo ratou. Na ka huihui mai nga tangata katoa o Eperaima, a nohoia atu ana e ratou nga wai, a puta noa ki Peta-para ki Horano.
- 25
- A tokorua nga rangatira o Miriana i mau i a ratou, ko Orepe raua ko Teepe; a patua iho e ratou a Orepe ki te kamaka ki Orepe, i patua hoki a Teepe ki te poka waina a Teepe, a whaia ana e ratou a Miriana, a kawea mai ana e ratou nga matenga o Orepe raua ko Teepe ki a Kireono ki tera taha o Horano.
Address: 
Phone: 
Email: