- 1
- Na, ka haere a Apimereke tama a Ierupaara ki Hekeme ki nga tungane o tona whaea, a ka korero ki a ratou, ki te hapu katoa ano hoki o te whare o te pāpa o tona whaea, ka mea,
- 2
- Tena, korerotia atu ki nga taringa o nga tangata katoa o Hekeme, Ko tehea te mea pai ki a koutou, ko nga tangata e whitu tekau, nga tamariki katoa a Ierupaara, hei kingi mo koutou, kia kotahi ranei te tangata hei kingi mo koutou? Kia mahara hoki he wheua ahau no koutou, he kikokiko no koutou.
- 3
- Na, ka korerotia e nga tungane o tona whaea enei kupu katoa mona ki nga taringa o nga tangata katoa o Hekeme, a ka anga o ratou ngakau ki te aru i a Apimereke; i mea hoki ratou, Ko to tatou teina ia.
- 4
- Na, ka homai etahi hiriwa e ratou ki a ia, e whitu tekau nga pīhi, i roto i te whare o Paara-periti, a ka utua e Apimereke ki aua mea etahi tangata wairangi, he hunga hikaka, a aru ana ratou i a ia.
- 5
- Katahi ia ka haere ki te whare o tona papa ki Opora, a patua iho e ia ona tuakana ona teina, nga tama a Ierupaara, e whitu tekau nga tangata, i runga i te kohatu kotahi; otiia i mahue a Iotama te tama whakamutunga a Ierupaara; i piri hoki ia.
- 6
- Na, ka huihui mai nga tangata katoa o Hekeme, ratou ko te whare katoa o Miro, a ka haere mai, ka mea i a Apimereke hei kingi ki te mānia o te pou i Hekeme.
- 7
- A ka korerotia ki a Iotama, na, ka haere ia, a tu ana i runga i te tihi o Maunga Keritimi; na, ka ara tona reo, a ka karanga atu ia, ka mea ki a ratou, Whakarongo mai ki a au, e nga tangata o Hekeme, kia whakarongo ai te Atua ki a koutou.
- 8
- I haere nga rakau ki te whakawahi i tetahi kingi mo ratou, a ka mea ki te oriwa, Ko koe hei kingi mo matou.
- 9
- Na, ko te meatanga mai a te oriwa ki a ratou, Kia whakarerea e ahau taku momonatanga, taku mea i whai kororia ai te Atua, nga tangata, a kia haere, kopikopiko ai ki nga mea a nga rakau?
- 10
- Na, ko te meatanga a nga rakau ki te piki, Haere mai koe hei kingi mo matou.
- 11
- Ano ra ko te piki ki a ratou, Kia whakarerea e ahau toku reka, me oku hua pai, a kia haere, kopikopiko ai ki nga mea a nga rakau?
- 12
- Katahi ka mea nga rakau ki te waina, Haere mai koe hei kingi mo matou.
- 13
- Na, ko te meatanga mai a te waina ki a ratou, Kia whakarerea e ahau toku waina e whakahari nei i te Atua i te tangata, a kia haere, kopikopiko ai ki nga mea a nga rakau?
- 14
- Katahi ka mea nga rakau katoa ki te taraheke, Haere mai koe hei kingi mo matou.
- 15
- Na, ko te meatanga mai a te taraheke ki nga rakau, Ki te mea he pono ta koutou whakawahinga i a au hei kingi mo koutou, Haere mai ki raro ki toku taumarumarutanga iho okioki ai, a ki te kahore, kia puta atu he ahi i roto i te taraheke hei kai i nga hita o Repanona.
- 16
- Na, ki te mea he pono, he tika, ta koutou mahi, i a koutou i mea nei i a Apimereke hei kingi, ki te pai hoki ta koutou mahi ki a Ierupaara ratou ko tona whare, ki te mea hoki i rite ki nga mahi a ona ringa ta koutou i mea ai ki a ia;
- 17
- (Na toku papa hoki i whawhai a koutou whawhai, a taruke ana ki te mate; na, ora ake koutou i a Miriana:
- 18
- Na, kua whakatika nei koutou i tenei ra ki te whare o toku pāpa, a patua iho ana tamariki, e whitu tekau nga tangata, ki runga ki te kohatu kotahi, a meinga ana e koutou a Apimereke, tama a tana pononga wahine hei kingi mo nga tangata o Hekeme, no te mea ko to koutou teina ia.)
- 19
- Na, ki te mea he pono, he tika, ta koutou i mea ai ki a Ierupaara, ratou ko tona whare i tenei ra, kia hari ki a Apimereke, kia hari hoki ia ki a koutou.
- 20
- A ki te kahore, kia puta mai he ahi i a Apimereke, hei kai mo nga tangata o Hekeme, ratou ko te whare o Miro; kia puta mai hoki he ahi i nga tangata o Hekeme, i te whare hoki o Miro, hei kai mo Apimereke.
- 21
- Na, ka rere a Iotama, a oma atu ana, haere ana ki Peere, a noho ana i reira i te wehi o tona tuakana o Apimereke.
- 22
- Ka toru nga tau o Apimereke e kawana ana i a Iharaira,
- 23
- Na, ka ungā mai e te Atua he wairua kino hei wehe i a Apimereke, ratou ko nga tangata o Hekeme; a ka mahi tinihanga nga tangata o Hekeme ki a Apimereke.
- 24
- He mea mo te mahi nanakia ki nga tamariki e whitu tekau a Ierupaara kia tae mai, a kia utaina o ratou toto ki runga ki to ratou teina ki a Apimereke i patu nei i a ratou; ki nga tangata ano hoki o Hekeme i whakakaha nei i ona ringa i patua ai ona tuakana, ona teina.
- 25
- Na, ka whakatakotoria e nga tangata o Hekeme he kai whanga mona ki runga ki nga tihi o nga maunga, a pahuatia ana e ratou te hunga katoa i puta ki a ratou i te ara; a ka korerotia mai ki a Apimereke.
- 26
- Katahi ka haere mai a Kaara tama a Epere, ratou ko ona teina, a ka tae mai ki Hekeme; na, ka whakawhirinaki atu nga tangata o Hekeme ki a ia.
- 27
- Katahi ratou ka haere atu ki nga māra, a whakiia ana nga hua o a ratou māra waina, takahia ana; na, ka waiata ratou, a ka haere ki te whare o to ratou atua, ka kai, ka inu, a kohukohua ana e ratou a Apimereke.
- 28
- Na, ko te meatanga mai a Kaara tama a Epere, Ko wai a Apimereke, ko wai hoki a Hekeme e waiho ai tatou hei tangata mana? ehara ianei ia i te tama na Ierupaara? ko Tepuru hoki tana kai whakahauhau? ko ta nga tangata Hamora papa o Hekeme ta koutou e mahi ai: he aha hoki tatou i mahi ai i tana?
- 29
- Na, me i toku ringa tenei iwi! ina kua peia e ahau a Apimereke. Katahi ia ka mea ki a Apimereke, Whakanuia te ope, puta mai hoki.
- 30
- A, te rongonga o Tepuru rangatira o te pa ki nga kupu o Kaara tama a Epere, ka mura tana riri.
- 31
- Na ka tono puku atu ia i etahi tangata ki a Apimereke, hei mea atu, Ko Kaara tama a Epere tenei, ratou ko ona teina, kua tae mai ki Hekeme; a kei te hanga tenei ratou i te pa hei arai atu i a koe.
- 32
- Na, whakatika aianei i te po, koutou ko ou tangata, ka whanga ai ki te parae.
- 33
- A ka whiti te ra i te ata, ka maranga wawe koe, ka huaki ki te pa: a ka puta ia, ratou ko ana tangata ki te whawhai ki a koe, mau e mea ki a ia tau e kite ai.
- 34
- Na, ko te whakatikanga ake o Apimereke ratou ko ana tangata katoa i te po, a e wha nga matua o ratou ki te whakatakoto mo Hekeme.
- 35
- A puta atu ana a Kaara tama a Epere, tu ana i te kuwaha o te keti o te pa: na, kua whakatika a Apimereke ratou ko ana tangata i te whakatakoto.
- 36
- A, te kitenga o Kaara i aua tangata, ka mea ia ki a Tepuru, Nana, nga tangata e heke mai ra i runga i nga tihi o nga maunga, Na, ko te meatanga mai a Tepuru ki a ia, Ko te ata o nga maunga te tirohia na e koe e ahua tangata ana.
- 37
- Na, ka korero mai ano a Kaara, a ka mea, Nana, te hunga e heke mai ra i runga i te wahi pukepuke o te whenua! kotahi hoki tera matua e haere mai ra i te ara o te mānia o Meonenimi.
- 38
- Na, ko te meatanga mai a Tepuru ki a ia, Keihea ra tou mangai i mea ra koe, Ko wai a Apimereke, e meinga ai tatou hei pononga mana? ehara ianei tenei i te iwi i whakahaweatia ra e koe. Na, haere atu aianei ki te whawhai ki a ia.
- 39
- Katahi ka haere atu a Kaara i te aroaro o nga tangata o Hekeme ki te whawhai ki a Apimereke.
- 40
- Na, ka whaia ia e Apimereke, a rere ana ia i tona aroaro, a he tokomaha i hinga, i patua, a, te kuwaha ra ano o te keti.
- 41
- Na, ka noho a Apimereke ki Aruma: a ka peia mai a Kaara ratou ko ona teina e Tepuru, kei noho ki Hekeme.
- 42
- A i te ata ka haere atu nga tangata ki te parae, a ka korerotia ki a Apimereke.
- 43
- Na, ka mau tangata ia, a wehea ana kia toru nga matua, na, ka whanga ki te parae. A, tona kitenga, na, kua puta mai tera te iwi i roto i te pa; te tino whakatikanga mai ki a ratou; patua iho e ia.
- 44
- I kokiri mai hoki a Apimereke ratou ko tana ngohi, a tu ana i te kuwaha o te keti o te pa: a kokiri atu ana era atu ngohi e rua ki te hunga katoa i te parae, patua iho.
- 45
- A whakapaua ana e Apimereke taua ra ki te whawhai ki te pa, a horo ana te pa i a ia, patua iho hoki nga tangata katoa i roto; na, wahia ana e ia te pa, ruia iho ki te tote.
- 46
- A, te rongonga o nga tangata katoa o te pourewa o Hekeme, na, ka haere ratou ki roto ki te taumaihi o te whare o te atua, o Periti.
- 47
- A ka korerotia ki a Apimereke kua huihui katoa nga tangata o te pourewa o Hekeme.
- 48
- Katahi ka piki atu a Apimereke ki Maunga Taramono, ratou ko ana tangata katoa; i mauria atu ano e Apimerake he titaha i tona ringa; na, ka tapahia e ia he peka rakau, a hapainga ana, amohia ana e ia i runga i ona pokohiwi, me te mea ano ki ana tangata, Ta koutou e kite ai e meatia ana e ahau, hohoro te pera e koutou.
- 49
- Katahi ka tapahia he peka e tenei e tenei o te iwi katoa, a haere ana ki te whai i a Apimereke: na ka whakatakotoria e ratou ki te taha o te taumaihi, a tahuna ana te taumaihi ki te ahi ki runga ki a ratou: na, ka mate ano hoki nga tangata katoa o te pourewa o Hekeme; ki te whakaaro iho kotahi te mano nga tane, nga wahine.
- 50
- Katahi ka haere a Apimereke ki Tepehe, a whakapaea ana a Tepehe e ia, a horo ana i a ia.
- 51
- Na, i waenganui o te pa tetahi pourewa kaha, a ka rere ki reira nga tane katoa, me nga wahine, nga tangata katoa hoki o te pa, a tutakina ana ratou ki roto, a piki ana ratou ki runga ki te tuanui o te pourewa.
- 52
- Na, ko te haerenga mai o Apimereke ki te pourewa, tauria ana e ia, ka whakatata mai hoki ki te kuwaha o te pourewa, kia tahuna ki te ahi.
- 53
- Te tino makanga a tetahi wahine i tetahi maramara no te kohatu mira ki runga ki te mātenga o Apimereke, na, pakaru iho tona angaanga.
- 54
- Na, hohoro tonu tana karanga ki te tangata i mau i ana patu, ka mea ki a ia, Unuhia to hoari, whakamatea hoki ahau, kei korerotia ahau, He wahine nana ia i patu. Na, werohia ana ia e tana tangata, a ka mate.
- 55
- A, te kitenga o nga tangata o Iharaira kua mate a Apimereke, na, ka haere ratou ki tona wahi ki tona wahi.
- 56
- Na, kua whakahokia mai e te Atua te kino a Apimereke i meatia e ia ki tona papa, i a ia i patu i ona tuakana i ona teina, i taua whitu tekau:
- 57
- Me te kino ano a nga tangata o Hekeme, i whakahokia katoatia mai e te Atua ki runga ki o ratou mātenga: a ka tau iho ki a ratou te kanga a Iotama tama a Ierupaara.
Address: 
Phone: 
Email: