- 1
- A i muri iho i a Apimereke, ka whakatika ake hei kai whakaora mo Iharaira ko Tora tama a Pua, tama a Roro, he tangata no Ihakara; a i noho ia ki Hamiri ki Maunga Eperaima.
- 2
- A e rua tekau ma toru nga tau i whakarite whakawa ai ia mo Iharaira, na, ka mate, a tanumia ana ki Hamiri.
- 3
- A i muri i a ia ka whakatika ko Haira Kireari, a e rua tekau ma rua nga tau i whakarite whakawa ai ia mo Iharaira.
- 4
- Na, e toru tekau ana tama, he hunga e toru tekau nga kuao kaihe hei eke ma ratou, e toru tekau hoki o ratou pa, e karangatia nei, ko Hawoto Haira, a tae noa iho ki tenei ra; kei te whenua o Kireara.
- 5
- Na, ka mate a Haira, a ka tanumia ki Kamono.
- 6
- Na, ka mahi kino ano hoki nga tamariki a Iharaira ki ta Ihowa titiro, i mahi ki nga Paara, ki a Ahataroto, ki nga atua o Hiria, ki nga atua o Hairona, ki nga atua o Moapa, ki nga atua o nga tamariki a Amona, ki nga atua o nga Pirihitini: whakarerea ake e ratou a Ihowa, kihai ano hoki i mahi ki a ia.
- 7
- Na, ka mura te riri a Ihowa ki a Iharaira, a hokona atu ana ratou e ia ki te ringa o nga Pirihitini, ki te ringa hoki o nga tamariki a Amona.
- 8
- A i tera tau puta noa i nga tau kotahi tekau ma waru i kurua, i tukinotia e ratou nga tamariki a Iharaira, nga tamariki katoa a Iharaira i tera taha o Horano, i te whenua o nga Amori i Kireara.
- 9
- Na, ka whiti mai nga tamariki a Amona i Horano ki te whawhai ano hoki ki a Hura, ki a Peniamine, ki te whare ano hoki o Eperaima, a taea noatia iho te raru o Iharaira.
- 10
- Katahi ka karanga atu nga tamariki a Iharaira ki a Ihowa, ka mea, Kua hara matou ki a koe, kua whakarerea hoki e matou to matou Atua, kua mahi ano hoki ki nga Paara.
- 11
- Na, ko te meatanga mai a Ihowa ki nga tamariki a Iharaira, Kahore ianei koutou i whakaorangia e ahau i nga Ihipiana, i nga Amori, i nga tamariki hoki a Amona, i nga Pirihitini?
- 12
- I tukino ano hoki nga Haironi, nga Amareki, ratou ko nga Maoni i a koutou, a, ta koutou tangihanga ki a au, na whakaorangia ana koutou e ahau i o ratou ringa.
- 13
- Heoi whakarerea ana ahau e koutou, a mahi ana koutou ki nga atua ke: koia ahau tē whakaora ai ano hoki i a koutou.
- 14
- Haere, karanga atu ki a koutou atua i whiriwhiri ai; ma ratou koutou e whakaora i te wa e he ai koutou.
- 15
- Katahi ka mea mai nga tamariki a Iharaira ki a Ihowa, Kua hara matou, mau e mea ki a matou nga mea katoa e pai ana ki tau titiro iho; otiia kia whakaorangia matou e koe aianei.
- 16
- Na, ka whakarerea atu e ratou nga atua ke i roto i a ratou, a ka mahi ki a Ihowa: na, ka koingo tona ngakau ki a Iharaira i mate nei.
- 17
- Na, ka huihuia mai nga tamariki Amona, a ka noho ki Kireara, i huihui ano hoki nga tamariki a Iharaira, a noho ana i Mitipa.
- 18
- Na, ko te meatanga a te iwi, ratou ko nga rangatira o Kireara, ki tetahi ki tetahi, Ko wai te tangata hei timata i te whawhai ki nga tamariki a Amona? ka waiho ia hei upoko mo nga tangata katoa o Kireara.