Lamentations Chapter 2 - Paipera Tapu 1868 | Te Paipera Tapu 1868

Lamentations Chapter 2 - Paipera Tapu 1868

1
Taukiri e! kua taupokina e te Ariki te tamahine a Hiona ki te kapu, i a ia e riri ana, kua makā iho ano e ia te ataahuatanga o Iharaira i runga i te rangi ki te whenua; kihai ano ia i mahara ki tona turanga waewae i te ra i riri ai ia!
2
Kua horomia e te Ariki nga nohoanga katoa o Hakopa, kihai hoki i tohungia e ia: wahia iho e ia nga pa kaha o te tamahine a Hura i a ia e aritarita ana; kua meinga ratou e ia kia pa ki te whenua; kua whakapokea e ia te kingitanga me ona rangatira.
3
Poutoa katoatia atu ana e ia te haona o Iharaira i tana riri e mura ana; whakahokia mai ana e ia ki muri tona ringa matau i te aroaro o te hoa riri, ngiha mai ana ia ki a Hakopa, ano he mura ahi e kai ana i tetahi taha, i tetahi taha.
4
Kua whakapikoa mai e ia tana kopere, koia ano kei ta te hoa riri; tona ringa matau i a ia i tu ra, rite tonu ki to te hoa whawhai, tukitukia ana e ia te hunga katoa i ahuareka mai ki te titiro atu i roto i te tapenakara o te tamahine a Hiona; ano he ahi tana riri e ringitia mai ana e ia.
5
I rite te Ariki ki te hoa riri, horomia ake e ia a Iharaira, horomia ake e ia ona whare kingi katoa; moti iho i a ia ona pa taiepa, whakanuia ana e ia te tangi me te aue i roto i te tamahine a Hura.
6
Kua takiritia atu ano e ia tona taiepa, ano he taiepa kāri: moti iho i a ia ona wahi whakaminenga: kua meinga e Ihowa nga hakari nui me nga hapati kia warewaretia i roto i Hiona, whakahaweatia iho e ia te kingi raua ko te tohunga i tana riri e aritarita ana.
7
Kua pangā atu e te Ariki tana aata, kua whakakahoretia tana wahi tapu, tukua atu ana e ia nga taiepa o o reira whare kingi ki roto ki te ringaringa o te hoa riri, hamama ana ratou i roto i te whare o Ihowa, me te mea ko te ra o te hakari nui.
8
He whakaaro ta Ihowa mo te whakamoti i te taiepa o te tamahine a Hiona; kua oti te aho te whakamaro atu e ia, kahore ano tona ringa i pepeke, whakangaro tonu ia; na reira tangi ana i a ia te pekerangi me te taiepa; raua ngatahi ngohe kau.
9
Kua tapokopoko ona keti ki roto ki te whenua, kua kore i a ia, kua whati ona tutaki, kei roto tona kingi me ona rangatira i nga tauiwi: kore ake he ture; kahore hoki he putanga mai o Ihowa kia kitea e ana poropiti.
10
Kei runga i te whenua nga kaumatua o te tamahine a Hiona e noho ana, whakarongo kau ana, opehia ake e ratou he puehu ki runga ki o ratou māhunga, whitiki rawa te kakahu taratara; nga wahina o Hiruharama, tuohu tonu o ratou māhunga ki te whenua.
11
Whakaruhi rawa oku kanohi i nga roimata, e ohooho ana oku whekau, kua maringi toku ate ki runga ki te whenua, he meatanga ki te wawahanga o te tamahine a toku iwi; no te mea e hemo ana nga kohungahunga me nga mea ngote u i nga huarahi o te pa.
12
Ta ratou ki ake ki o ratou whaea, Kei hea he witi, he waina? i a ratou e hemo ana, e pera ana me te hunga kua patua ki nga huarahi o te pa, maringi tonu atu o ratou wairua ki nga uma o o ratou whaea.
13
Ko te aha e waiho e ahau hei kai whakaatu ki a koe? ko te aha e waiho e ahau hei ahua mou, e te tamahine a Hiruharama? taku rite mou ko te aha, hei whakamarietanga maku i a koe, e te tamahine wahina a Hiona? he nui hoki to pakaru, koia ano kei te moana; ko wai hei rongoa i a koe?
14
Nga mea i kitea e o poropiti mou, he teka, he mea tikanga-kore; kihai ano i hurahia atu e ratou tou he, e tahuri atu ai to whakaraunga; heoi ano ta ratou i kite ai mou he poropititanga teka, he mea hei pana atu i a koe.
15
Kei te papaki ringa ki a koe te hunga katoa e tika ana i te ara, e hi mai ana, oioi ana o ratou māhunga ki te tamahine a Hiruharama; ta ratou kupu, Ko te pa ianei tenei i korerotia nei, Ko te tino ataahua rawa, e koa ai te whenua katoa?
16
Hamama tonu mai ki a koe nga mangai o o hoa riri katoa, e hi mai ana, pakiri ana o ratou niho: e mea ana, Kua horomia ia e tatou: ko te rangi pu ano tenei i taria atu e tatou, kua tupono mai ki a tatou, kua kitea e tatou.
17
Kua oti i a Ihowa tana i whakaaro ai, kua whakaritea tana kupu i whakahaua e ia i nga rangi o mua: wahia iho e ia, kihai hoki i tohungia; kua meinga e ia te hoa riri kia koa ki a koe, kua ara i a ia te haona o o hoa riri.
18
I karanga o ratou ngakau ki te Ariki, E te taiepa o te tamahine a Hiona, kia rere iho nga roimata, ano he awa, i te ao, i te po: kei whakata koe, kei mutu ta te whatu o to kanohi.
19
Maranga, hamama i te po: i te timatanga o nga mataaratanga ringitia atu tou ngakau ano he wai ki mua i to te Ariki aroaro, kia ara ake o ringaringa ki a ia, kia ora ai o kohungahunga e hemo nei i te kai i te ahunga mai o nga huarahi katoa.
20
Titiro mai, e Ihowa, whakaaroa ko wai i peneitia e koe? E kai ranei nga wahine i o ratou hua, i nga kohungahunga ano e hikitia ana? kia patua koia te tohunga me te poropiti ki te wahi tapu o te Ariki?
21
Kei te takoto te taitamariki raua ko te koroheke i runga i te whenua i nga huarahi, kua hinga aku wahina, aku taitamariki, i te hoari, he mea whakamate nau i te ra i riri ai koe; tukitukia ana e koe, kihai hoki i tohungia.
22
Me te mea he karangatanga nau te ra nui oku whakawehi i tetahi taha, i tetahi taha; kihai hoki tetahi i mawhiti, i toe, i te ra i riri ai a Ihowa; aku i hiki ai i whakatupu ai, poto ake i toku hoa riri.