- 1
- A ki te kawea mai tetahi he whakahere toto-kore ki a Ihowa, ko te paraoa hei whakahere mana; me riringi ano e ia he hinu ki runga ki taua mea, ka maka hoki i te parakihe ki runga:
- 2
- A ka kawea mai e ia ki nga tohunga ki nga tama a Arona: na, ka aohia ake e ia i roto i taua mea, kia ki tona ringa i te paraoa, i te hinu, me te parakihe katoa hoki; ka tahu ai te tohunga i te whakamaharatanga ki taua mea ki runga ki te aata, hei whakahere ahi, hei kakara reka ki a Ihowa.
- 3
- A ma Arona ratou ko ana tama te toenga o te whakahere toto-kore: he mea tino tapu tena i roto i nga whakahere ahi a Ihowa.
- 4
- A ki te maua mai e koe hei whakahere he whakahere toto-kore i tunua ki te oumu, hei nga keke paraoa, hei nga mea rewena-kore, me konatunatu ki te hinu, hei nga keke angiangi ranei kahore nei he rewena, he mea pani ki te hinu.
- 5
- A ki te mea he whakahere toto-kore te whakahere, he mea i tunua ki te paraharaha, hei te mea paraoa, kihai nei i rewenatia, kua oti nei te konatu ki te hinu.
- 6
- Me whatiwhati e koe, ka riringi ai ki te hinu: he whakahere toto-kore tena mea.
- 7
- A ki te mea he whakahere toto-kore to whakahere, he mea i paraipanatia, me hanga taua mea ki te paraoa, ki te hinu.
- 8
- A me kawe mai e koe te whakahere toto-kore i hangā ki enei mea ki a Ihowa: a ka tukua atu ki te tohunga, na, mana e mau atu ki te aata.
- 9
- Na, ka tangohia e te tohunga i roto te whakahere toto-kore he whakamaharatanga ki taua mea, ka tahu ai ki runga ki te aata: hei whakahere ahi, hei kakara reka ki a Ihowa.
- 10
- A ma Arona ratou ko ana tama te toenga o te whakahere toto-kore: he mea tino tapu tena i roto i nga whakahere ahi a Ihowa.
- 11
- Kei hangā ki te rewena tetahi whakahere toto-kore e kawea mai ana e koutou ma Ihowa: kei tahuna hoki e koutou he rewena, he honi ranei, i roto i tetahi o nga whakahere ahi a Ihowa.
- 12
- Ko te whakaherenga o nga tuapora, me whakahere ena mea e koutou ma Ihowa: otiia e kore e tahuna ki runga ki te aata hei kakara reka.
- 13
- Me kinaki ano hoki e koe ki te tote au whakahere toto-kore katoa ina whakaherea; kei whakamutua atu ano hoki e koe te tote o te kawenata o tou Atua mo tau whakahere toto-kore: me whakahere he tote e koe ki runga i au whakahere katoa.
- 14
- A ki te whakaherea mai e koe o tuapora, hei whakahere toto-kore ki a Ihowa, hei te witi hou, hei te mea i whakamaroketia ki te ahi, hei te witi i patua mai i roto i nga puku ki, te whakahere toto-kore o au tuapora e whakaherea e koe.
- 15
- Me riringi ano e koe he hinu ki runga ki taua mea, me whakatakoto ano hoki he parakihe ki runga: he whakahere toto-kore tena mea.
- 16
- Na, me tahu e te tohunga te whakamaharatanga ki taua mea, tetahi wahi o te witi patu o taua mea, tetahi wahi hoki o te hinu, me te parakihe katoa o taua mea: he whakahere ahi taua mea ki a Ihowa.
Address: 
Phone: 
Email: