Leviticus Chapter 3 - Paipera Tapu 1868 | Te Paipera Tapu 1868

Leviticus Chapter 3 - Paipera Tapu 1868

1
A ki te mea he patunga whakamarietanga tana whakahere, ki te mea e whakaherea mai ana e ia i roto i nga kau, ahakoa toa, ahakoa uha, kia koha-kore tana e tuku ai ki te aroaro o Ihowa.
2
Na, ka popoki iho tona ringa ki runga ki te mātenga o tana whakahere, ka patu ai ki te whatitoka o te tapenakara o te whakaminenga: na, ka tauhiuhia atu te toto e nga tohunga e nga tama a Arona ki runga ki te aata, a tawhio noa.
3
Katahi ka whakaherea atu e ia tetahi wahi o te patunga whakamarietanga hei whakahere ahi ki a Ihowa; te ngako e whiwhiwhiwhi ana ki nga whekau, me te ngako katoa o nga whekau,
4
Me nga whatukuhu e rua, me te ngako i aua mea, tera i te hope, me te taupa o runga ake i te ate, me nga whatukuhu, me tango mai tera e ia.
5
A me tahu e nga tama a Arona ki runga i te aata, ki runga i te tahunga tinana e takoto ana i runga i nga wahie o te ahi: he whakahere ahi tena, he kakara reka ki a Ihowa.
6
A ki te mea no nga hipi tana whakahere ki a Ihowa hei patunga whakamarietanga; he toa he uha ranei, kei whai koha tana e tuku ai.
7
Ki te whakaherea e ia he reme hei whakahere mana, me whakahere atu e ia ki te aroaro o Ihowa.
8
Me popoki hoki tona ringa ki runga ki te mātenga o tana whakahere, ka patu ai ki mua mai o te tapenakara o te whakaminenga: a ka tauhiuhia atu ona toto e nga tama a Arona ki te aata, a tawhio noa.
9
Me whakahere ano e ia tetahi wahi o te patunga whakamarietanga hei whakahere ahi ki a Ihowa; tona ngako me te hiawero katoa, kia tino tata ki te tiki tana tapahanga, me te ngako e whiwhiwhiwhi ana ki nga whekau, me te ngako katoa o nga whekau,
10
Me nga whatukuhu e rua, me te ngako i aua mea, tera i te hope, me te taupa o runga ake i te ate, me nga whatukuhu, me tango mai tera e ia.
11
A ma te tohunga e tahu ki runga ki te aata: he kai hoki no ta Ihowa whakahere ahi.
12
A ki te mea he koati tana whakahere, me whakahere ano e ia ki te aroaro o Ihowa.
13
A ka pokia iho tona ringa ki runga ki tona pane, ka patu ai ki mua mai o te tapenakara o te whakaminenga: a ma nga tama a Arona e tauhiuhi ona toto ki te aata, a tawhio noa.
14
A me whakahere atu e ia tetahi wahi o taua mea hei whakahere mana, hei whakahere ahi ki a Ihowa; te ngako e whiwhiwhiwhi ana ki nga whekau, me te ngako katoa o nga whekau,
15
Me nga whatukuhu e rua, me te ngako i aua mea, tera i te hope, me te taupa i runga i te ate, me nga whatukuhu, me tango tera e ia.
16
A ma te tohunga e tahu aua mea ki runga ki te aata: he kai tena no te whakahere ahi, hei kakara reka: ko te ngako katoa ma Ihowa.
17
Hei tikanga mau tonu tenei puta noa i o koutou whakatupuranga, i o koutou nohoanga katoa hoki kia kaua e kainga tetahi ngako, toto ranei, e koutou.