Leviticus Chapter 6 - Paipera Tapu 1868 | Te Paipera Tapu 1868

Leviticus Chapter 6 - Paipera Tapu 1868

1
A i korero mai ano a Ihowa ki a Mohi, i mea,
2
Ki te hara tetahi, a ka kino tana mahi ki a Ihowa, a ka teka ki tona hoa, he mea i tukua ki a ia kia tiakina, he whakaaetanga ranei, he mea ranei i pahuatia, he whakahaere he ranei ki tona hoa;
3
I kitea ranei e ia tetahi mea i ngaro, a ka korero teka ki taua mea, ka oati teka; i tetahi ranei o enei tini mea e mea ai te tangata, e whai hara ai hoki:
4
Na, kua hara nei ia, kua he, a me whakahoki mai e ia te mea i pahuatia e ia, te mea ranei i riro tinihanga i a ia, te mea ranei i tukua atu ki a ia kia tiakina, te mea ngaro ranei i kitea e ia,
5
Nga mea katoa i oati teka ai ia; me utu e ia taua mea, ka tapiri mai ano hoki ki te wahi whakarima, a ka homai ki te tangata nona te mea, i te ra o tona whakahere mo te he.
6
A me kawe mai e ia tana whakahere mo te he ki a Ihowa, he hipi toa, he mea koha-kore no roto i te kahui, he mea i whakaritea e koe ona utu, hei whakahere mo te he, ki te tohunga:
7
A ma te tohunga e mea whakamarietanga mona ki te aroaro o Ihowa: a ka murua te he o tana mea, o nga mea katoa i mea ai ia, i hara ai.
8
A i korero mai ano a Ihowa ki a Mohi, i mea,
9
Whakahaua atu a Arona ratou ko ana tama, ka mea atu, Ko te ture tenei mo te tahunga tinana: He tahunga tinana tena, no te mea e ka ana i runga i te aata i te roa o te po, a taea noatia te ata, kia ka tonu hoki te ahi ki runga ki te aata.
10
A me kakahu e te tohunga tona kakahu rinena, me tarau ono e ia ona tarau rinena ki tona kiri, ka kohi ai i nga pungarehu i pau tahi me te tahunga tinana i te ahi i runga i te aata, a ka waiho e ia i te taha o te aata.
11
Na, ka whakarerea atu e ia ona kakahu, ka kakahu ai i etahi atu kakahu, a ka maua atu nga pungarehu ki waho i te puni ki te wahi poke-kore.
12
Kia ka tonu ano te ahi ki runga ki te aata; kei pirau: a me whakau ano e te tohunga nga wahie ki runga i taua mea i tenei ata i tenei ata, ka ata whakatakoto ai i te tahunga tinana ki runga; a me tahu ano e ia te ngako o nga whakamarietanga ki runga ki taua mea.
13
Kia ka tonu te ahi i runga i te aata; kei pirau.
14
A ko te ture ano tenei mo te whakahere toto-kore: me whakahere taua mea e nga tama a Arona ki te aroaro o Ihowa, ki mua atu o te aata.
15
A ka aohia mai e ia, kia ki tona ringa i te paraoa o te whakahere toto-kore, i te hinu hoki o taua mea, me te parakihe katoa, ano hoki i runga i te whakahere toto-kore, ka tahu ai ki runga ki te aata hei kakara reka, hei whakamaharatanga mo taua mea, hei mea ki a Ihowa.
16
A ma Arona ratou ko ana tama e kai te toenga o taua mea; me kai taua mea ki te wahi tapu, me te taro rewena-kore hei kinaki; hei te marae o te tapenakara o te whakaminenga ratou kai ai.
17
E kore e tunua rewenatia. Kua hoatu e ahau taua mea hei wahi ma ratou i roto i aku whakahere ahi. He tino tapu tena, rite tonu ano ki te whakahere hara, ki te whakahere mo te he.
18
Hei kai taua mea ma nga tane katoa o nga tamariki a Arona. Hei tikanga pumau tenei ma o koutou whakatupuranga mo nga whakahere ahi a Ihowa: ka tapu nga tangata katoa e pa ana ki aua mea.
19
A i korero mai ano a Ihowa ki a Mohi, i mea,
20
Ko te whakahere tenei ma Arona ratou ko ana tama, ta ratou e whakahere ai ki a Ihowa i te ra e whakawahia ai ia; ko te wahi whakatekau o te epa paraoa hei whakahere toto-kore, hei mea mau tonu, ko tetahi wahi o taua mea i te ata, ko tetahi wahi i te ahiahi.
21
Me hanga taua mea ki te hinu ki runga i te paraharaha, a ka oti te tunu, me kawe ki roto; a ka whakaherea atu e koe nga wahi i tunua o te whakahere toto-kore, hei kakara reka ki a Ihowa.
22
Ma te tohunga hoki i whakawahia i roto i ana tama hei whakakapi mona e mahi taua mea: he tikanga pumau tenei na Ihowa; me tahu katoa.
23
Me tahu katoa hoki nga whakahere toto-kore katoa a te tohunga: e kore e kainga.
24
A i korero ano a Ihowa ki a Mohi, i mea,
25
Korero atu ki a Arona ratou ko ana tama, ka mea atu, Ko te ture tenei mo te whakahere hara: Te wahi e patua ai te tahunga tinana, ko reira patu ai i te whakahere hara, ki te aroaro o Ihowa: he tino tapu tena.
26
Te tohunga nana i whakahere taua mea mo te hara, mana e kai: me kai taua mea ki te wahi tapu, ki te marae o te tapenakara o te whakaminenga.
27
Ki te pa tetahi ki te kikokiko o taua mea, ka tapu: a ki te maringi tetahi wahi o te toto o taua mea ki tetahi kakahu, me horoi e koe ki te wahi tapu te mea i maringi nei taua toto ki runga.
28
Me wahi ia te oko oneone i kohuatia ai taua mea: a ki te mea i kohuatia ki te oko parahi, na me mukumuku ka horoi ai ki te wai.
29
Ma nga tane katoa i roto i nga tohunga e kai taua mea; he mea tino tapu.
30
E kore ano hoki e kainga tetahi whakahere hara, ka kawea nei tetahi wahi o nga toto ki roto ki te tapenakara o te whakaminenga hei whakamarietanga ki te wahi tapu: me tahu ki te ahi.