- 1
- Ko te ture ano hoki tenei mo te whakahere mo te he: he tino tapu taua mea.
- 2
- Hei te wahi e patua ai e ratou te tahunga tinana patua ai te whakahere mo te he: me tauhiuhi ano ona toto ki te aata, a, tawhio noa.
- 3
- Me whakahere ano hoki ona ngako katoa; te hiawero me te ngako e whiwhiwhiwhi ana ki nga whekau,
- 4
- Me nga whatukuhu e rua, me te ngako i aua mea, tera i te hope, me te taupa i runga i te ate, me nga whatukuhu, me tango tera e ia:
- 5
- A ma te tohunga e tahu aua mea ki runga ki te aata, hei whakahere ahi ki a Ihowa: he whakahere mo te he tena.
- 6
- Ma nga tane katoa i roto i nga tohunga e kai taua mea: me kai ki te wahi tapu: he mea tapu rawa tena.
- 7
- Ko te whakahere hara, ko te whakahere mo te he, rite tonu raua: kotahi ano te ture mo aua mea, ka riro ma te tohunga nana taua mea i mea hei whakamarietanga.
- 8
- A ko te tohunga nana i whakahere te tahunga tinana a tetahi tangata, ma taua tohunga ano te hiako o te tahunga tinana i whakaherea e ia.
- 9
- Me te whakahere toto-kore katoa, nga mea e tunua ana ki te oumu, me nga mea katoa e paraipanatia ana, e meatia ana ranei ki te paraharaha, ma te tohunga ano nana i whakahere.
- 10
- Ko nga whakahere toto-kore katoa ia i konatunatua ki te hinu, me nga mea maroke, ma nga tama katoa a Arona; kia rite te wahi ma tetahi ma tetahi.
- 11
- Ko te ture ano tenei mo te patunga o nga whakamarietanga e whakaherea ana e ia ki a Ihowa.
- 12
- Ki te whakaherea e ia hei whakawhetainga, na, me whakahere tahi me te patunga whakawhetainga nga keke rewena-kore i konatunatua ki te hinu, me etahi mea angiangi ano hoki, hei nga mea rewena-kore, nga mea i pania ki te hinu, me etahi keke paraoa i konatunatua ki te hinu, a tunua iho.
- 13
- Me whakahere ano e ia, hei tapiri mo nga keke, etahi taro rewena hei whakahere mana, i runga ano i te patunga whakawhetainga o ana whakamarietanga.
- 14
- A me whakahere e ia tetahi o aua taro i roto i te whakahere katoa, hei whakahere hapahapai ki a Ihowa, a ma te tohunga taua mea, ma te kai tauhiuhi atu o te toto o nga whakamarietanga.
- 15
- A me kai te kikokiko o te patunga o ana whakamarietanga whakawhetainga i te ra ano i whakaherea ai; kei whakatoea tetahi wahi o taua mea mo te ata.
- 16
- Ki te mea ia he kupu taurangi te patunga o tana whakahere, he whakahere noa ake ranei, me kai i te ra ano i whakaherea ai e ia tana patunga: a i te aonga ake me kai ano hoki te toenga:
- 17
- Ki te toe ia tetahi wahi o te kikokiko o te patunga ki te ra tuatoru, me tahu ki te ahi.
- 18
- A ki te kainga tetahi wahi o te kikokiko o te patunga o ana whakamarietanga i te toru o nga ra, e kore e manakohia, e kore ano hoki e kiia na te kai whakahere: ka waiho hei mea whakarihariha, a ka wahā tona kino e te tangata nana i kai.
- 19
- E kore ano hoki e kainga te kikokiko i pa ki te mea poke; me tahu ki te ahi: ko te nuinga atu ia o te kikokiko me kai e nga tangata poke-kore katoa.
- 20
- Ki te kainga ia e tetahi te kikokiko o te patunga o nga whakamarietanga a Ihowa, me te mau ano tona poke, ka hatepea atu tena tangata i roto i tona iwi.
- 21
- Me te tangata ano hoki i pa ki tetahi mea poke, ki te poke tangata, ki tetahi kararehe poke ranei, ki tetahi poke whakarihariha ranei, a ka kai i te kiko o te patunga o nga whakamarietanga a Ihowa, ka hatepea atu taua wairua i roto i tona iwi.
- 22
- A i korero mai ano a Ihowa ki a Mohi, i mea,
- 23
- Korero atu ki nga tamariki a Iharaira, mea atu, Kei kainga tetahi ngako e koutou, o te kau, o te hipi, o te koati.
- 24
- Me te ngako hoki o te mea mate rnaori, me te ngako ano hoki o te mea i haea e te kirehe, ka waiho mo nga tini meatanga ke atu: ko te kai ia, e kore e kainga e koutou.
- 25
- Ta te mea hoki ko te tangata e kai ana i te ngako o nga kararehe, e meinga nei hei whakahere ahi ma Ihowa, ina, ka hatepea atu i roto i tona iwi taua wairua nana nei i kai.
- 26
- Kaua ano hoki he toto e kainga e koutou o te manu, o te kararehe ranei, i o koutou nohoanga katoa.
- 27
- Ki te kai tetahi wairua i tetahi toto, ka hatepea atu taua wairua i roto i tona iwi.
- 28
- A i korero mai ano a Ihowa ki a Mohi, i mea,
- 29
- Korero atu ki nga tamariki a Iharaira, mea atu, Ki te whakahere tetahi i te patunga o ana whakamarietanga ki a Ihowa, me kawe mai e ia tana whakahere ki a Ihowa, he wahi ano no te patunga o ana whakamarietanga.
- 30
- Ma ona ringaringa ano e kawe mai nga whakahere ahi ma Ihowa, te ngako, me te uma, me kawe mai tena e ia kia poipoia ai te uma hei whakahere poipoi ki te aroaro o Ihowa.
- 31
- A me tahu te ngako e te tohunga ki runga ki te aata: ma Arona ia, ratou ko ana tama, te uma.
- 32
- Me hoatu ano e koutou te peke matau o nga patunga o a koutou whakamarietanga ki te tohunga, hei whakahere hapahapai.
- 33
- Me waiho te peke matau hei wahi ma te tama a Arona i whakaherea ai te toto me te ngako o nga whakamarietanga.
- 34
- Kua tangohia nei hoki e ahau i nga tamariki a Iharaira te uma e poipoia ana me te peke hapahapai, i roto i nga patunga o a ratou whakamarietanga, a kua hoatu ki te tohunga ki a Arona, ratou ko ana tama, i roto i te wahi a nga tamariki a Iharaira; hei tikanga tuku iho tuku iho ano hoki tenei.
- 35
- No te whakawahinga tenei o Arona, no te whakawahinga hoki o ana tama, he wahi no nga whakahere ahi a Ihowa, o te ra iho ano i meinga ai ratou e ia kia whakatata mai ki a Ihowa, ki te mahi tohunga;
- 36
- Nga mea hoki o nga tamariki a Iharaira i whakahaua mai e Ihowa kia homai ki a ratou i te ra i whakawahia ai ratou e ia, a meinga ana hei tikanga, a tuku iho tuku iho ki o ratou whakatupuranga.
- 37
- Ko te ture tenei mo te tahunga tinana, mo te whakahere toto-kore, mo te whakahere hara, mo te whakahere hoki mo te he, mo nga whakatohungatanga hoki, me nga patunga o nga whakamarietanga;
- 38
- Ko ta Ihowa hoki i whakahau nei i Maunga Hinai ki a Mohi, i te ra i whakahaua ai e ia nga tamariki a Iharaira kia whakaherea a ratou whakahere ki a Ihowa, i te koraha o Hinai.
Address: 
Phone: 
Email: