- 1
- A i te mano e aki mai ana ki a ia ki te whakarongo ki te kupu a te Atua, na, e tu ana ia i te taha o te roto o Kenehareta,
- 2
- Na, ka kite ia i nga kaipuke e rua e tu ana i te taha o te roto: ko nga kai hao ia kua riro mai i runga, e horoi ana i nga kupenga.
- 3
- Na, ka eke ia ki tetahi o nga kaipuke, ki to Haimona, ka mea ki a ia kia neke atu ki waho tata. Na, noho ana ia, whakaakona atu ana e ia te iwi i runga i te kaipuke.
- 4
- A ka mutu tana korero, ka mea ia ki a Haimona, Neke atu ki te wahi hohonu, ka tuku ai i ā koutou kupenga ki te hao.
- 5
- Na, ko te whakahokinga mai a Haimona, ka mea ki a ia, E kara, mahi noa matou i te po roa nei, tē mau tetahi: heoi nau na te kupu, me tuku e ahau te kupenga.
- 6
- A, ta ratou meatanga i tenei, he mano tini nga ika i mau i a ratou: a ka whakapakaru ta ratou kupenga.
- 7
- Na, ka tawhiri ratou ki o ratou hoa i tera kaipuke, kia hoe mai hei hoa mo ratou. A, to ratou taenga whakakiia ana nga kaipuke e rua, no ka whakatotohu.
- 8
- A, te kitenga o Haimona Pita, ka hinga iho ki nga turi o Ihu, ka mea atu, Mawehe atu i a au, e te Ariki; he tangata hara hoki ahau.
- 9
- Mau tonu hoki tona miharo me to ona hoa katoa, ki te haonga o nga ika i haoa nei e ratou:
- 10
- To Hemi hoki raua ko Hoani, he tamariki raua na Heperi, he hoa hoki no Haimona. Na, ka mea mai a Ihu ki a Haimona, Kaua e mataku; i enei wa e takoto ake nei ka hao tangata koe.
- 11
- A ka whakauria nga kaipuke ki uta, mahue ake nga mea katoa i a ratou, a aru ana i a ia.
- 12
- A i a ia i tetahi o nga pa, na, ko tetahi tangata e kapi ana i te repera: a, tona kitenga i a Ihu, ka takoto tapapa, ka inoi ki a ia, ka mea, E te Ariki, ki te pai koe, e taea ahau e koe te mea kia ma.
- 13
- Na, ka totoro tona ringa, ka pa ki a ia, ka mea, E pai ana ahau: kia ma koe. A mutu tonu ake tona repera.
- 14
- Na, ka whakatupato ia i a ia kia kaua e korerotia ki te tangata: Engari haere, kia kite te tohunga i a koe, kawea atu hoki mo to whakamakanga nga mea i whakaritea e Mohi, hei mea whakaatu ki a ratou.
- 15
- Heoi tino pakū atu ana tona rongo: a he tini noa atu nga tāngata i huihui mai ki te whakarongo, kia whakaorangia hoki e ia o ratou ngoi-koretanga.
- 16
- Otira i haere puku atu ia ki te koraha ki te inoi.
- 17
- A i tetahi o aua ra, e whakaako ana ia, me te noho ano nga Parihi me nga kai whakaako o te ture, i haere mai nei i nga kāinga katoa o Kariri, o Huria, o Hiruharama: a i reira ano te kaha o te Ariki hei whakaora i a ratou.
- 18
- Na, ko etahi tāngata e kawe mai ana i tetahi tangata i runga i te moenga, he pararutiki: a mea noa ratou kia kawea ia ki roto, kia whakatakotoria ki tona aroaro.
- 19
- A, tē kitea e ratou te peheatanga e kawea ai ia ki roto, i te mano hoki, ka kakea te whare, a tukua iho ana ia ra nga toetoe, me te moenga ano, ki waenganui ki te aroaro o Ihu.
- 20
- A, tona kitenga i to ratou whakapono, ka mea ia ki a ia, E hoa, ka oti ou hara te muru.
- 21
- Na, ka anga, ka korerorero nga Karaipi me nga Parihi, ka mea, Ko wai tenei nāna nga kupu kohukohu? Ko wai hei muru hara? ko te Atua anake.
- 22
- Otira i mahara a Ihu ki ā ratou whakaaroaronga, a ka oho mai, ka mea ki a ratou, He aha ta koutou e whakaaroaro na i roto i o koutou ngakau?
- 23
- Ko tehea te mea takoto noa, ko te mea, Ka oti ou hara te muru; ko te mea ranei, Whakatika, haere?
- 24
- Otiia kia mātau ai koutou he mana muru hara to te Tama a te tangata i runga i te whenua, (ka mea ia ki te pararutiki,) Ko taku kupu tenei ki a koe, Whakatika, tangohia ake tou moenga, haere ki tou whare.
- 25
- Na, whakatika tonu ake ia i to ratou aroaro, a tangohia ake ana te mea i takoto ai ia, haere ana ki tona whare, me te whakakororia i te Atua.
- 26
- A miharo katoa ana ratou, ka whakakororia i te Atua, kī tonu hoki ratou i te mataku, ka mea, Puta ke nga mea i kite nei tatou i naianei.
- 27
- A, muri iho i enei mea, ka haere atu ia, a ka kite i tetahi pupirikana, ko Riwai te ingoa, e noho ana i te whare tango moni: a ka mea ki a ia, Arumia mai ahau.
- 28
- Na, whakarerea ake e ia nga mea katoa, a whakatika ana, aru ana i a ia.
- 29
- Na, ka takā e Riwai he hākari nui māna i tona whare: a he tokomaha nga pupirikana me nga tāngata ke i noho tahi ratou.
- 30
- Na, ka amuamu o ratou Karaipi me nga Parihi ki ana akonga, ka mea, He aha koutou ka kai tahi ai ka inu tahi ai me nga pupirikana me nga tāngata hara?
- 31
- Na, ka whakahokia mai e Ihu, a ka mea ki a ratou, Kahore he aha o nga tāngata ora e meatia ai e te rata, engari o te hunga e mate ana.
- 32
- Kihai ahau i haere mai ki te karanga i te hunga tika, engari i te hunga hara, kia ripeneta.
- 33
- Na, ka mea ratou ki a ia, He aha nga akonga a Hoani ka hono ai te noho puku, ka inoi ai, me nga akonga ano hoki a nga Parihi; ko āu ia e kai ana, e inu ana?
- 34
- Na, ko tana meatanga mai ki a ratou, E taea ranei e koutou te mea kia noho puku nga tamariki o te whare marena, i te mea kei a ratou te tāne marena hou?
- 35
- Na, tera e tae mai nga ra e tangohia te tāne marena hou i a ratou, katahi ratou ka noho puku i aua ra.
- 36
- I korerotia ano hoki e ia tetahi kupu whakarite ki a ratou; E kore e makā e te tangata tetahi wahi o te kahu hou hei papaki mo te kahu tawhito; kei pakaru i te mea hou, a e kore te papaki i tangohia mai i te mea hou e u ki te mea tawhito.
- 37
- E kore hoki te tangata e riringi i te waina hou ki nga ipu tawhito; kei pakaru nga ipu i te waina hou, na, ka maringi, a kore ake nga ipu.
- 38
- Engari me riringi te waina hou ki nga ipu hou; a ora ake e rua e rua.
- 39
- Ka inu hoki te tangata i te waina tawhito, e kore ia e hiahia wawe ki te mea hou: e mea hoki ia, Erangi te mea tawhito.
Address: 
Phone: 
Email: