Luke Chapter 6 - Paipera Tapu 1868 | Te Paipera Tapu 1868

Luke Chapter 6 - Paipera Tapu 1868

1
Na, i te hapati tuatahi i muri iho i te ra tuarua, ka haere ia ra waenga witi; a katohia ana e ana akonga nga puku witi, kainga ake, he mea komukumuku ki nga ringaringa.
2
Ka mea etahi o nga Parihi ki a ratou, He aha koutou ka mea ai i te mea e kore e tika kia meatia i te hapati?
3
Na, ka whakahokia mai e Ihu, a ka mea ki a ratou, Kahore ianei koutou i kite i ta Rawiri i mea ai, i a ia e mate ana i te hiakai, ratou ko ona hoa;
4
I tana tomokanga atu ki te whare o te Atua, a tangohia ana e ia nga taro aroaro, na, kainga ana e ia, hoatu ana hoki ki ona hoa; nga mea kihai nei i tika kia kainga, engari ma nga tohunga anake?
5
I mea ano ia ki a ratou, Ko te Tama a te tangata te Ariki ano hoki o te hapati.
6
A i tetahi atu hapati, ka tomo ia ki te whare karakia, ka whakaako: a kei reira tetahi tangata, ko tona ringaringa matau kua memenge.
7
A ka titiro pu nga Karaipi me nga Parihi ki a ia, me kore ia e whakaora i te hapati; kia ai hei whakawakanga mona.
8
Na, ka mahara ia ki ā ratou whakaaro, a ka mea ki te tangata i te ringaringa memenge, Whakatika, e tu ki waenganui. A whakatika ana ia, tu ana.
9
Katahi ka mea a Ihu ki a ratou, Maku e ui atu ki a koutou tetahi mea; He mea tika ranei te mahi pai i te hapati, te mahi kino ranei? te whakaora, te whakamate ranei?
10
Na, ka tirotiro ia ki a ratou katoa, a ka mea ki taua tangata, Torona mai to ringa. A pera ana ia: na, kua ora ano tona ringa, kua pera me tetahi.
11
Na, kī tonu ratou i te haurangi; a ka korerorero ki a ratou ano, me aha ranei a Ihu e ratou.
12
A i aua ra ka haere atu ia ki te maunga ki te inoi, a he inoi tonu tāna i te roa o te po ki te Atua.
13
A ka ao te ra, ka karangatia e ia ana akonga: a kotahi tekau ma rua o ratou āna i whiriwhiri ai, a huaina ana e ia hei apotoro;
14
Ko Haimona, (i huaina ano hoki ia ko Pita,) ko Anaru tona teina, ko Hemi raua ko Hoani, ko Piripi raua ko Patoromu,
15
Ko Matiu raua ko Tamati, ko Hemi tama a Arapiu, ko Haimona e karangatia nei ko Heroti,
16
Ko Hura teina o Hemi, ko Hura Ikariote hoki, ko ia ano hoki te kai tuku.
17
Na, ka heke iho ngatahi ratou, a tu ana ki te wahi raorao, ratou ko te ropu o ana akonga, me te huihuinga nui o te iwi i Huria katoa, i Hiruharama, i te taha hoki o te moana o Taira o Hairona, i haere mai nei ki te whakarongo ki a ia, kia whakaorangia hoki o ratou mate;
18
Me te hunga ano hoki e whakatoia ana e nga wairua poke: a whakaorangia ana ratou.
19
A i tohe te mano katoa kia pa atu ki a ia: i puta mai hoki he kaha i a ia, a whakaorangia ana ratou katoa.
20
Na, ka titiro atu ona kanohi ki ana akonga, a ka mea ia, Ka koa koutou nga rawa-kore: mo koutou hoki te rangatiratanga o te Atua.
21
Ka koa koutou e hiakai nei i naianei: ka makona hoki koutou. Ka koa koutou e tangi nei i naianei: e kata hoki koutou.
22
Ka koa koutou, ina kinongia e nga tāngata, ina wehewehea mai i roto i a ratou, ina tawaia, ina rukea atu to koutou ingoa, ano he mea kino, mo te whakaaro hoki ki te Tama a te tangata.
23
Kia hari koutou i taua ra, kia tupekepeke: ina hoki e nui to koutou utu i te rangi: i peneitia hoki nga poropiti e o ratou mātua.
24
Otira aue te mate mo koutou mo te hunga taonga! kua riro mai hoki i a koutou to koutou whakamarietanga.
25
Aue te mate mo koutou mo te hunga e makona ana! e mate hoki koutou i te hiakai. Aue te mate mo koutou mo te hunga e kata ana i naianei! ka aue hoki koutou, ka tangi.
26
Aue te mate mo koutou ua korerotia paitia koutou e nga tāngata katoa! i penei hoki o ratou mātua ki nga poropiti teka.
27
Na, ko taku kupu tenei ki a koutou e whakarongo mai nei, Arohaina atu o koutou hoa whawhai; kia pai te mahi ki te hunga e kino ana ki a koutou;
28
Manaakitia te hunga e kanga ana i a koutou, me inoi mo te hunga e whakawhiu ana i a koutou.
29
Na, ki te pakia tou paparinga e tetahi, tahuri atu hoki tetahi; a ki te tangohia tau ngeri e tetahi, kaua e kaiponuhia tou koti.
30
Hoatu ki nga tāngata katoa e inoi ana ki a koe; kaua ano hoki e tonoa o mea ki te tangohia e te tangata.
31
Ko ta koutou e pai ai kia meatia mai e nga tāngata ki a koutou, meatia ano hoki e koutou ki a ratou.
32
A ki te aroha koutou ki te hunga e aroha ana ki a koutou, kei hea he whakawhetai ki a koutou? e aroha ana hoki te hunga hara ki te hunga e aroha mai ana ki a ratou.
33
A ki te atawhai koutou i te hunga e atawhai ana i a koutou, kei hea he whakawhetai ki a koutou? e pena ana ano hoki te hunga hara.
34
Ki te tuku moni hoki koutou ki te hunga e mea ai koutou ka utua mai e ratou, kei hea he whakawhetai ki a koutou? e tuku moni ana hoki te hunga hara ki te hunga hara, mo te pera kia whakahokia mai ki a ratou.
35
Engari kia aroha ki o koutou hoa whawhai, atawhaitia hoki, tukua atu te moni, kaua ano hoki e whakaaro kia utua mai ta koutou; a e rahi te utu ki a koutou, ka whakatupu tamariki ano hoki koutou ki a te Runga rawa: e atawhai ana hoki ia i te hunga e kore e whakawhetai, i te hunga kino.
36
Kia ngawari rapea koutou, kia pera me to koutou Matua e ngawari ana.
37
Kaua e whakawa, a e kore koutou e whakawakia: kaua e whakahe, a e kore koutou e whakahekia: houhia te rongo, a e houhia ano te rongo ki a koutou:
38
Hoatu, a ka homai ki a koutou; he mehua pai, pehi rawa, oioi rawa, purena tonu ta ratou e homai ai ki te kokorutanga o o koutou kakahu. Ko te mehua hoki e mehua ai koutou, hei mehua ano tena ki a koutou.
39
A ka puaki tana kupu whakarite ki a ratou, E ahei ranei te matapo te arahi i te matapo? e kore ranei e taka tokorua ki te waikeri?
40
E kore te akonga e rahi ake i tona kai whakaako: engari ka rite ano ki o ratou kai whakaako nga tāngata katoa kua tino pukengatia.
41
He aha tāu e titiro ki te otaota i roto i te kanohi o to teina, tē kite i te kurupae i tou ake kanohi?
42
E pehea ranei to korero ki to teina, E taku teina, iaua, kia kapea atu e ahau te otaota i roto i tou kanohi, tē kite i te kurupae i roto i tou kanohi? E te tangata tinihanga, kia mātua kapea atu e koe te kurupae i roto i tou kanohi, katahi koe ka mārama ki te kape i te otaota i roto i tou kanohi o tou teina.
43
E kore hoki te rakau ataahua e hua i te hua kino; e kore ano hoki te rakau kino e hua i te hua ataahua.
44
Ma ona hua ake nei hoki ka mohiotia ai tenei rakau tenei rakau. E kore hoki e kohia nga piki i runga i nga tataramoa, e kore ano hoki e whakiia te karepe i runga i te tumatakuru.
45
He tangata pai, he pai tana e whakaputa mai ai i roto i te taonga pai a tona ngakau; he tangata kino, he kino tana e whakaputa mai ai i roto i nga taonga kino o tona ngakau: he purenatanga hoki no te ngakau nga kupu a te mangai.
46
He aha koutou ka karanga ai ki a au, E te Ariki, e te Ariki, tē mahi i aku korero?
47
Na, te tangata e haere mai ana ki a au, e rongo ana ki aku kupu, a e mahi ana, maku e whakaatu ki a koutou he ritenga aha tona:
48
Ka rite ia ki te tangata i hangā e ia tetahi whare, i keri, i whakahohonu, a whakatakoto ana i te turanga ki runga ki te kamaka: a, te putanga mai o te waipuke, ka pakaru te roma ki taua whare, heoi kihai i taea te whakangaueue: no te mea i hangā ki runga ki te kamaka.
49
Tena ko te tangata i rongo, a kihai i mahi, ka rite ia ki te tangata i hanga i tetahi whare ki runga ki te oneone, a kahore he turanga: te pakarutanga mai o te roma, na, hinga tonu iho; a nui atu te pakarutanga a taua whare.