- 1
- Na, ka karangatia e ia ana akonga kotahi tekau ma rua, a ka hoatu ki a ratou he kaha, he mana, e peia ai nga rewera katoa, e ora ai nga mate.
- 2
- A tonoa ana ratou ki te kauwhau i te rangatiratanga o te Atua, ki te whakaora hoki i te hunga e mate ana.
- 3
- A i mea ano ia ki a ratou, Kaua tetahi mea e mauria ki te ara, kaua nga tokotoko, kaua he putea, kaua he taro, kaua he moni; kaua ano hoki e takiruatia nga koti.
- 4
- A ka tomo koutou ki tetahi whare, hei reira noho ai, a haere noa i reira.
- 5
- A ki te kahore etahi e manako ki a koutou, ka haere koutou ki waho o taua pa, na, te puehu nei ano o o koutou waewae whakangahorotia atu, hei mea whakaatu ki a ratou.
- 6
- Na, to ratou rironga atu, ka haereerea e ratou nga kāinga, ka kauwhau i te rongo pai, ka whakaora i nga wahi katoa.
- 7
- A, te rongonga o Herora tetaraki ki nga mea katoa i meinga e ia: ka pohehe, no te mea ki ta etahi kī, kua ara mai a Hoani i te hunga mate;
- 8
- Ki ta etahi, kua puta mai a Iraia; ki ta etahi, kua ara mai tetahi o nga poropiti o namata.
- 9
- Na, ka mea a Herora, Kua poutoa e ahau te mātenga o Hoani: a ko wai tenei mona nei enei korero ka rangona nei e ahau? A ka whai kia kite i a ia.
- 10
- Na, te hokinga mai o nga apotoro, ka korerotia ki a ia nga mea katoa i mea ai ratou. A ka tango ia i a ratou, ka haere ki tetahi wahi motu ke, ki tetahi koraha o te pa ko Petahaira nei te ingoa.
- 11
- Ano ka rongo te mano, ka aru i a ia: na, ka pupuri ia i a ratou, ka korerotia ki a ratou te rangatiratanga o te Atua, whakaorangia ana hoki e ia te hunga e mea ana kia rongoatia.
- 12
- Na, kua titaha haere te ra, a ka haere mai te tekau ma rua, ka mea ki a ia, Tonoa atu te mano, kia haere ai ki nga kāinga ki nga whenua i tetahi taha, i tetahi tahi, moe ai, ki te mea kai hoki ma ratou; he wahi koraha hoki tenei i a tatou nei.
- 13
- A ka mea ia ki a ratou, Ma koutou e hoatu he kai ma ratou. Ka mea ratou, Heoi ano ā matou e rima nga taro e rua nga ika; ki te kahore matou e haere ki te hoko kai ma tenei iwi katoa.
- 14
- A me te mea e rima mano nga tāne. A ka mea ia ki ana akonga, Meinga ratou kia noho, kia rima tekau ki te nohoanga.
- 15
- A pera ana ratou, meinga katoatia ana kia noho.
- 16
- Na, ka mau ia ki nga taro e rima, ki nga ika e rua, ka titiro atu ki te rangi, ka whakapai i aua mea, ka whawhati, ka hoatu ki nga akonga kia whakatakotoria atu ma te mano.
- 17
- Na, ka kai ratou, ka makona katoa: a kotahi tekau ma rua nga kete i kohia ake e ratou, he toenga na ratou no nga whatiwhatinga.
- 18
- A i a ia e inoi ana ko ia anake, kei a ia ano nga akonga: na, ka ui ia ki a ratou, ka mea, Ko wai ahau ki ta nga tāngata kī?
- 19
- Na, ka whakahokia atu e ratou, ka mea, Ko Hoani Kai iriiri; ki ta etahi, ko Iraia; na, ki ta etahi, kua ara mai tetahi o nga poropiti o namata.
- 20
- Na, ka mea mai ia ki a ratou, A ki ta koutou kī, ko wai ahau? Ka whakahokia atu e Pita, a ka mea, Ko te Karaiti a te Atua.
- 21
- Katahi ia ka whakatupato i a ratou, ka kī mai kia kaua tenei e korerotia ki te tangata;
- 22
- I mea ano ia, Kua takoto te tikanga kia maha nga mamae o te Tama a te tangata, kia whakakinoa ano hoki ia e nga kaumatua, e nga tohunga nui, e nga Karaipi, kia whakamatea, a i te toru o nga ra ka ara.
- 23
- I mea ano ia ki a ratou katoa, Ki te mea tetahi kia haere mai i muri i a au, me whakakahore e ia tāna ake, me amo tona ripeka i nga ra katoa, ka aru ai i a au.
- 24
- Ki te whai hoki tetahi kia ora, ka mate ano ia: a ki te mate tetahi, mona i whakaaro ki a au, ka ora ano ia.
- 25
- He aha hoki te painga ki te tangata, ki te riro mai i a ia te ao katoa, a ko ia ano ka ngaro, ka riro ranei i te hē?
- 26
- Ta te mea ki te whakama tetahi ki a au, me aku korero, ka whakama ano hoki te Tama a te tangata ki a ia, ina haere mai i runga i te kororia ona, o tona Matua, o nga anahera tapu.
- 27
- Na, he pono taku korero ki a koutou, Tenei ano etahi o te hunga e tu nei e kore e pangia e te mate, kia kite ra ano i te rangatiratanga o te Atua.
- 28
- A ka tata ki te waru o nga ra i muri iho i enei korero, ka mau ia ki a Pita ki a Hoani ki a Hemi, ka haere atu ki runga ki te maunga ki te inoi.
- 29
- A i tana inoinga, ka puta ke te ahua o tona mata, a ma tonu tona kakahu, kanapa tonu.
- 30
- Na, tokorua nga tāngata e korero tahi ana me ia, ko Mohi raua ko Iraia:
- 31
- I puta kororia mai nei, a i korero ki tona haerenga meake nei rite i a ia ki Hiruharama.
- 32
- A i pehia a Pita ratou ko ona hoa e te moe: a, to ratou aranga ake, ka kite i tona kororia, me nga tāngata tokorua e tu tahi ana me ia.
- 33
- A i a raua e mawehe atu ana i a ia, ka mea a Pita ki a Ihu, E kara, he mea pai kia noho tatou i konei: na, kia hangā e matou etahi wharau kia toru; kia kotahi mou, kia kotahi mo Mohi, kia kotahi mo Iraia: tē mohio ia ki tana i mea ai.
- 34
- I a ia e korero ana i enei mea, ka puta mai he kapua, a taumaru iho ana ki a ratou: a mataku ana ratou i to ratou haerenga ki roto ki te kapua.
- 35
- Na, ka puta mai he reo i te kapua, ka mea, Ko taku Tama tenei i aroha ai: whakarongo ki a ia.
- 36
- A, te mutunga o te reo, ko Ihu anake i kitea. A whakarongo kau ana ratou, kihai hoki i korerotia e ratou ki te tangata i aua ra tetahi o nga mea i kite ai ratou.
- 37
- Na, i te aonga ake o te ra, i a ratou kua tatū iho i runga i te maunga, he tini te tangata i tutaki ki a ia.
- 38
- Na, ka karanga mai tetahi tangata i roto i te mano, ka mea, Tena koa, a te Kai whakaako, titiro mai ki taku tamaiti: ko ia anake hoki tāku.
- 39
- Na, te hopukanga a te wairua i a ia, kihai i aha kua hamama; na, ka haehae i a ia me te tutū ano te huka, a marū iho ia, na, whakarere whakauaua ana i a ia.
- 40
- A, no te inoi ahau ki o akonga kia peia ia ki waho: heoi kihai i taea e ratou.
- 41
- Na, ka whakahokia mai e Ihu, a ka mea, E te uri whakapono-kore, parori kē, kia pehea te roa o aku nohoanga ki a koutou, o taku manawanuitanga ki a koutou? Kawea mai to tamaiti ki konei.
- 42
- Na, i a ia a haere mai ana, ka taia iho ia e te rewera, haehaea iho. Na, ka riria te wairua poke e Ihu, a whakaorangia ana te tamaiti, hoatu ana ki tona pāpā.
- 43
- Oho mauri katoa ana ratou ki te nui o te Atua. A, i a ratou a miharo ana ki nga mea katoa i meinga e Ihu, ka mea ia ki ana akonga,
- 44
- Rongoatia e koutou enei korero ki roto ki o koutou taringa: meake hoki tukua te Tama a te tangata ki nga ringaringa o nga tāngata.
- 45
- A kihai ratou i mohio ki tenei kupu, kua ngaro hoki, kei kitea taua mea e ratou: a ka mataku ratou ki te ui atu ki a ia ki taua kupu.
- 46
- Na, ka puta ake he korerorero i roto i a ratou, ko wai o ratou e nui rawa.
- 47
- A ka kite a Ihu i te whakaaroaronga o o ratou ngakau, ka mau ia ki tetahi tamaiti, a whakaturia ana ki tona aroaro,
- 48
- Ka mea mai ki a ratou, Ki te manako tetahi ki tenei tamaiti, na te whakaaro hoki ki toku ingoa, e manako ana ia ki a au: a ki te manako tetahi ki a au, e manako ana ia ki toku kai tono mai: na, te iti rawa i roto i a koutou katoa, ko ia hei mea nui.
- 49
- Na, ka whakahokia atu e Hoani, ka mea, E kara, i kite matou i tetahi e pei rewera ana i runga i tou ingoa; a riria iho e matou, mona kahore e haere tahi me tatou.
- 50
- A ka mea a Ihu ki a ia, Kaua e riria: ki te mea hoki ehara tetahi i te hoa whawhai no tatou, no tatou ano ia.
- 51
- Ano ka rite nga ra mo tona tangohanga ki runga, māro pu tona kanohi ki te haere ki Hiruharama:
- 52
- Na, ka tono ia i etahi karere ki mua i tona aroaro: a ka haere ratou, ka tomo ki tetahi kāinga o nga Hamari ki te mea tukunga mai mona.
- 53
- Heoi kihai era i manako ki a ia, e anga ana hoki ona kanohi ki Hiruharama.
- 54
- A, te kitenga o ana akonga o Hemi raua ko Hoani, ka mea raua, E te Ariki, e pei ana ranei koe kia korerotia e maua he kapura kia heke iho i te rangi, hei whakangaro i a ratou, hei pera me ta Iraia i mea ai?
- 55
- A ka tahuri ia, ka riri ki a raua, ka mea, Kahore korua i mātau noa no tehea wairua korua.
- 56
- Kihai hoki te Tama a te tangata i haere mai ki te whakamate tangata, engari ki te whakaora. A haere ana ratou he kāinga ke.
- 57
- A i a ratou e haere ana i te ara, ka mea tetahi ki a ia, E te Ariki, ka aru ahau i a koe ki nga wahi katoa e haere ai koe.
- 58
- Na, ko te meatanga mai a Ihu ki a ia, He rua o nga pokiha, he kohanga o nga manu o te rangi; tena ko te Tama a te tangata hore ona wahi e takoto ai tona mātenga.
- 59
- Ka mea ia ki tetahi atu, Arumia mai ahau. A ka mea ia, E te Ariki, tukua ahau kia mātua haere ki te tanu i toku pāpā.
- 60
- Na, ka mea a Ihu ki a ia, Waiho ma nga tupapaku e tanu o ratou tupapaku: ko koe ia me haere ki te kauwhau i te rangatiratanga o te Atua.
- 61
- Ka mea hoki tetahi atu, E te Ariki, ka aru ahau i a koe; otira tukua ahau kia mātua poroporoaki ki te hunga i toku whare.
- 62
- Na, ka mea a Ihu ki a ia, Ki te pa te ringaringa o tetahi ki te parau, a ka titiro ki muri, e kore ia e tau mo te rangatiratanga o te Atua.
Address: 
Phone: 
Email: