Mark Chapter 2 - Paipera Tapu 1868 | Te Paipera Tapu 1868

Mark Chapter 2 - Paipera Tapu 1868

1
A muri iho i etahi ra, ka tomo atu ano ia ki Kaperenauma; a ka rangona kei te whare ia.
2
Na, huihui tonu mai ana, he tini te tangata, a kahore noa iho he wahi e o ai ratou, hore rawa i te taha o te kuwaha: a ka korerotia e ia te kupu ki a ratou.
3
A ka haere mai etahi ki a ia, me te kawe mai i tetahi pararutiki, tokowha ki te kauhoa mai.
4
A, tē taea e ratou te whakatata mai ki a ia i te mano hoki, ka pokaia te tuanui o te wahi i noho ai ia: a ka oti te wawahi, tukua iho ana te moenga i takoto ai te pararutiki.
5
A, te kitenga o Ihu i to ratou whakapono, ka mea ia ki te pararutiki, E tama, ka oti ou hara te muru.
6
Na, i reira etahi o nga Karaipi e noho ana, e whakaaroaro ana i o ratou ngakau,
7
Na te aha enei kupu kohukohu a tenei tangata? ko wai hei muru hara? Ko te Atua anake.
8
Na, mohio tonu mai a Ihu i roto i tona wairua, e penei ana ā ratou whakaaro i roto i a ratou, ka mea ia ki a ratou, He aha koutou ka whakaaroaro ai i enei mea i roto i o koutou ngakau?
9
Ko tehea te mea takoto noa, ko te mea ki te pararutiki, Ka oti ou hara te muru; ko te mea ranei, Whakatika, tangohia ake tou moenga, haere?
10
Otira kia mātau ai koutou he mana muru hara to te Tama a te tangata i runga i te whenua, (ka mea ia ki te pararutiki,)
11
Ko taku kupu tenei ki a koe, Whakatika, tangohia ake tou moenga, haere ki tou whare.
12
Na, whakatika tonu ake ia, a tangohia ake ana tona moenga, haere atu ana i te aroaro o ratou katoa: no ka miharo ratou katoa, ka whakakororia i te Atua, ka mea, Kahore ano tatou i kite noa i te penei.
13
A puta mai ana ia haere ana ano i te taha o te moana; na, ka tae mai te mano katoa ki a ia, a ka whakaakona ratou e ia.
14
A i a ia e haere atu ana, ka kite ia i a Riwai tama a Arapiu e noho ana i te whare tango moni, a ka mea ki a ia, Arumia mai ahau. Na, whakatika ana ia, a aru ana i a ia.
15
A i a ia e noho ana i tona whare, he tokomaha nga pupirikana me nga tāngata hara e noho tahi ana ki a Ihu ratou ko ana akonga: he tokomaha hoki ratou, a i aru i a ia.
16
A, te kitenga o nga Karaipi ratou ko nga Parihi i a ia e kai tahi ana me nga pupirikana me nga tāngata hara, ka mea ki ana akonga, He aha ia ka kai tahi ai, ka inu tahi ai, me nga pupirikana me nga tāngata hara?
17
Otira, ka rongo a Ihu, ka mea ki a ratou, Kahore he aha o nga tāngata ora e meatia ai e te rata, engari o te hunga e mate ana: kihai hoki ahau i haere mai ki te karanga i te hunga tika, engari i te hunga hara, kia ripeneta.
18
A kei te noho puku nga akonga a Hoani, ratou ko ā nga Parihi: a ka haere mai ratou, ka mea ki a ia, He aha nga akonga a Hoani me ā nga Parihi ka noho puku ai, tena ko āu akonga kahore e noho puku?
19
Na, ko te meatanga atu a Ihu ki a ratou, E ahei ranei nga tamariki o te whare marena te noho puku, i te mea kei a ratou te tāne marena hou? e kore ratou e ahei te noho puku, i nga wa kei a ratou nei te tāne marena hou.
20
Na, tera e tae mai nga ra e tangohia ai te tāne marena hou i a ratou, katahi ratou ka noho puku i aua ra.
21
E kore e tuia e te tangata tetahi wahi o te kahu hou, hei papaki mo te kahu tawhito; kei riro tetahi wahi o te kahu tawhito i tona whakakapi hou, a ka nui rawa te pakaru.
22
E kore ano hoki e ringihia e te tangata te waina hou ki roto ki nga ipu tawhito: kei pakaru nga ipu i te waina hou, a ka maringi te waina, kore ake nga ipu: engari me riringi te waina hou ki nga ipu hou.
23
A i a ia e haere ana i waenga witi i te hapati, ka anga ana akonga ka kakato haere i nga puku witi.
24
Na, ka mea nga Parihi ki a ia, Na, he aha ratou ka mea ai i te mea e kore e tika i te hapati?
25
A ka mea ia ki a ratou, Kahore ano koutou i kite noa i to Rawiri i mea ai, i a ia e ngaua ana e te hiakai, ratou ko ona hoa?
26
I tana tomokanga ki te whare o te Atua i nga ra o Apiata tohunga nui, kainga ana e ia nga taro aroaro, nga mea kihai nei i tika kia kainga, ma nga tohunga anake, a hoatu ana e ia ki ona hoa?
27
A i mea ano ia ki a ratou, Hei mea mo te tangata te hapati, ehara i te mea ko te tangata mo te hapati:
28
Whaihoki ko te Tama a te tangata te Ariki o te hapati.