- 1
- Ko te timatanga o te rongo pai o Ihu Karaiti, Tama a te Atua;
- 2
- Ko te mea hoki ia i tuhituhia i roto i nga poropiti, Na ka tonoa e ahau taku karere i mua i tou aroaro, māna e whakapai tou ara ki mua i a koe.
- 3
- He reo no tetahi i te koraha e karanga ana, Whakapaia te huarahi o te Ariki, whakatikaia ona ara.
- 4
- I te koraha a Hoani e iriiri ana, e kauwhau ana i te iriiringa ripeneta hei murunga hara.
- 5
- Na, ka haere atu ki a ia te whenua katoa o Huria, me nga tāngata o Hiruharama, a iriiria katoatia ana e ia ki te awa o Horano, me te whāki ano i o ratou hara.
- 6
- Na, te kakahu o Hoani, he huruhuru kamera, he hiako hoki te whitiki o tona hope; a tana kai, he mawhitiwhiti, he honi koraha;
- 7
- A i kauwhau ano ia, i mea, Tenei te haere mai nei i muri i a au tetahi e kaha rawa ana i a au, e kore ahau e tau ki te piko iho wewete ai i te here o ona hu.
- 8
- Ko au nei, he iriiri taku i a koutou ki te wai: māna ia koutou e iriiri ki te Wairua Tapu.
- 9
- A i aua ra, ka haere mai a Ihu i Nahareta o Kariri, a ka iriiria e Hoani ki Horano.
- 10
- A, i reira tonu iho, i a ia e haere ake ana i te wai, ka kite ia i nga rangi e tuwhera ana, me te Wairua, ano he kukupa, e heke iho ana ki a ia:
- 11
- A ka puta mai he reo no te rangi, e mea ana, Ko koe taku Tama i aroha ai, taku i ahuareka atu ai.
- 12
- A i reira pu ano ka tonoa ia e te Wairua ki te koraha.
- 13
- A e wha tekau ona ra i reira i te koraha e whakamatautauria ana e Hatana; i roto ano i nga kararehe mohoao; a ko nga anahera hei kai mahi māna.
- 14
- Na, i muri iho i a Hoani i tukua ki te herehere, ka haere a Ihu ki Kariri, ki te kauwhau i te rongo pai o te rangatiratanga o te Atua,
- 15
- A ka mea, Kua rite te taima, kua tata hoki te rangatiratanga o te Atua: ripeneta, whakaponohia te rongo pai.
- 16
- Na, i a ia e haere ana i te taha o te moana o Kariri, ka kite i a Haimona raua ko Anaru tona teina e maka ana i te kupenga ki te moana: he kai hao hoki raua.
- 17
- Na, ka mea a Ihu ki a raua, Haere mai i muri i a au, a maku korua e mea hei kai hao tangata.
- 18
- A mahue tonu ake i a raua nga kupenga, aru ana i a ia.
- 19
- A haere tata atu ana i reira, ka kite ia i a Hemi tama a Heperi, raua ko Hoani tona teina, i te kaipuke ano raua e ta ana i nga korenga o a ratou kupenga.
- 20
- Na, karanga tonu atu ia i a raua: a mahue ake i a raua to raua matua a Heperi i te kaipuke me nga kai mahi, a haere ana i muri i a ia.
- 21
- A ka tomo atu ratou ki Kaperenauma; na, haere tonu atu ia i te hapati ki te whare karakia, ka whakaako.
- 22
- A miharo ana ratou ki tana ako: i rite hoki tana ako i a ratou ki ta te tangata whai mana, kihai hoki i rite ki ta nga Karaipi.
- 23
- A i to ratou whare karakia tetahi tangata, he wairua poke tona; a ka karanga ia,
- 24
- Ka mea, Kāti ra, he aha matou nāu, e Ihu o Nahareta? kua tae mai koe ki te whakangaro i a matou? e mātau ana ahau ki a koe, ko te Mea Tapu a te Atua.
- 25
- A riria iho ia e Ihu, ka mea ia, Kāti te korero, puta mai hoki i roto i a ia.
- 26
- Na, ka haehae te wairua kino i a ia, nui atu hoki tona reo ki te karanga, a puta mai ana i roto i a ia.
- 27
- A miharo noa ratou katoa, uiui ana ki a ratou ano, mea ana, He aha tenei? he aha tenei whakaakoranga hou? mana tonu nei hoki tana tono i nga wairua poke, a rongo rawa ki a ia.
- 28
- Na, pakū tonu atu tona rongo ki nga wahi katoa e tata ana ki Kariri.
- 29
- A, to ratou putanga mai i te whare karakia, na, tomo tonu atu ratou ko Hemi ko Hoani ki te whare o Haimona raua ko Anaru.
- 30
- A i te takoto te hungawai wahine o Haimona, he kiri ka, a korerotia tonutia ana e ratou ki a ia.
- 31
- Na, tona taenga atu, ka mau ki tona ringaringa, whakaarahia ana ia; mutu ake tona kiri ka, takā ana e ia he mea ma ratou.
- 32
- Na, i te ahiahi, i te toenetanga o te ra, ka mauria mai e ratou ki a ia nga turoro katoa, me te hunga e nohoia ana e nga rewera.
- 33
- A huihui katoa mai ana te pa ki te kuwaha.
- 34
- A he tokomaha te hunga e ngaua ana e te tini o nga mate i whakaorangia e ia, he maha hoki nga rewera i peia; kihai ano hoki i tukua nga rewera kia korero, no te mea i mātau ratou ki a ia.
- 35
- Na, i te atatu, i te mea e tino pouri ana, ka ara ia, ka puta atu ki waho, ka haere ki te wahi koraha, ki reira inoi ai.
- 36
- Na, ka whai a Haimona ratou ko ona hoa i a ia.
- 37
- A ka kitea ia, ka mea ki a ia, E rapu ana nga tāngata katoa i a koe.
- 38
- Katahi ia ka mea ki a ratou, Tatou ka haere ki nga kāinga tata, ki reira ano hoki ahau kauwhau ai: ko taku hoki tena i haere mai ai.
- 39
- Na, ka kauwhau ia i roto i o ratou whare karakia, puta noa i Kariri, ka pei hoki i nga rewera ki waho.
- 40
- A ka haere atu ki a ia tetahi repera, ka inoi ki a ia, te tukunga iho o nga turi ki a ia, ka mea ki a ia, Ki te pai koe, e taea ahau e koe te mea kia ma.
- 41
- Na, ka aroha a Ihu, a ka totoro mai tona ringa, ka pa ki a ia, ka mea ki a ia, E pai ana ahau; kia ma koe.
- 42
- A puaki kau mai tona reo, kua kore tona repera, na, kua ma.
- 43
- Na, ka whakatupato ia i a ia, a tonoa tonutia atu ana;
- 44
- I mea hoki ki a ia, Kei korerotia tetahi mea ki te tangata: engari haere, kia kite te tohunga i a koe, a mauria atu mo tou whakamakanga nga mea i whakaritea e Mohi, hei mea whakaatu ki a ratou.
- 45
- Heoi, tona putanga atu, ka anga ka korero nui atu, ka whakapuakina taua mea, a, kihai a Ihu i ahei te haere nui atu ki roto ki te pa i muri iho, heoi noho ana ia i waho i nga wahi koraha: a haere mai ana ratou ki a ia i nga wahi katoa.
Address: 
Phone: 
Email: