- 1
- I te mutunga o te hapati i te mea meake puao te ra tuatahi o te wiki, ka haere a Meri Makarini me tera Meri atu kia kite i te tanumanga.
- 2
- Na, he nui te ru i puta mai: i heke iho hoki tetahi anahera a te Ariki i te rangi, a haere mai ana, whakatakā atu ana e ia te kohatu i te kuwaha, a noho ana i runga.
- 3
- Tona ahua me te mea he uira, ma tonu hoki tona kakahu, anō he hukarere:
- 4
- A wiri noa iho nga kai tiaki i te wehi ki a ia, whakatupu tupapaku ana.
- 5
- Na, ka oho mai te anahera, ka mea ki nga wāhine, Kei wehi korua: e mātau ana hoki ahau, e rapu ana korua i a Ihu i ripekatia.
- 6
- Kahore ia i konei: kua ara hoki, kua pera me tāna i mea ai. Haere mai kia kite i te wahi i takoto ai te Ariki.
- 7
- A, hohoro te haere, korerotia atu ki ana akonga, kua ara mai ia i te hunga mate: na tena ia te haere atu na i mua i a koutou ki Kariri; ko reira koutou kite ai i a ia: na, kua korero atu nei ahau ki a korua.
- 8
- A hohoro tonu to raua haere mai i te urupa, wehi ana, nui atu te koa, a oma ana ki te korero ki ana akonga.
- 9
- A i a raua e haere ana ki te korero ki ana akonga, na, ko Ihu kua tutaki ki a raua, kua mea, E ia ma. Na, ka haere mai raua, ka pupuri i ona waewae, a koropiko ana ki a ia.
- 10
- Katahi a Ihu ka mea ki a raua, Aua e wehi: haere, korerotia atu ki aku teina kia haere ki Kariri, ko reira hoki ratou kite ai i a au.
- 11
- A i a raua e haere ana, na, kua tae atu etahi o nga kai tiaki ki te pa, kua korero ki nga tohunga nui i nga mea katoa i meatia.
- 12
- Na, ka mine mai ratou ko nga kaumatua, ka runanga, a he nui te moni i hoatu e ratou ki nga hoia,
- 13
- I mea hoki ratou, Me kī atu e koutou, I haere mai ana akonga i te po, a tahaetia ana ia, i a matou e moe ana.
- 14
- A ki te tae te rongo o tenei ki te kawana, ma matou ia e whakamarie, a kahore he manukanuka mo koutou.
- 15
- Na, ka tango ratou i nga moni, a meinga ana nga mea i akona ai ratou: heoi e korerotia ana ano tenei e nga Hurai a taea noatia tenei ra.
- 16
- Na, ka haere atu nga akonga tekau ma tahi ki Kariri, ki te maunga i whakaritea e Ihu ki a ratou.
- 17
- A, to ratou kitenga i a ia, ka koropiko ki a ia: ko etahi ia i ruarua.
- 18
- Na, ka haere mai a Ihu, ka korero ki a ratou, ka mea, Kua tukua katoatia mai ki a au te mana o te rangi o te whenua.
- 19
- Na, haere koutou, meinga hei akonga nga iwi katoa, iriiria i runga i te ingoa o te Matua, o te Tama, o te Wairua Tapu:
- 20
- Akona ratou kia mau ki nga mea katoa, i whakahaua atu e ahau ki a koutou: na, ko au tena hei hoa mo koutou i nga ra katoa, ā te mutunga ra ano o te ao. Amine.
Address: 
Phone: 
Email: