- 1
- Te poropititanga, he kupu na Ihowa ki a Iharaira, he mea whakapuaki na Maraki.
- 2
- I aroha ahau ki a koutou, e ai ta Ihowa, heoi e mea na koutou, He arohatanga ki te aha tau ki a matou? He teka ianei he tuakana a Ehau no Hakopa? e ai ta Ihowa, heoi aroha ana ahau ki a Hakopa,
- 3
- A kinongia ana a Ehau e ahau, meinga ana e ahau ona maunga me tona kāinga tupu hei ururua mo nga tarakona o te koraha.
- 4
- Kua mea na a Eroma, Kua rawakoretia nei tatou; otiia ka hoki tatou, ka hanga i nga wahi kua tuheatia; ko te kupu tenei a Ihowa o nga mano, Ma ratou e hanga, a maku e wahi iho; ka karangatia ano aua wahi e ratou, Ko te rohe kino, ko te iwi ano i whakatakariri ai a Ihowa, a ake ake ake.
- 5
- E kite ano o koutou kanohi, a ka mea koutou, Kia whakanuia a Ihowa i runga atu i te rohe a Iharaira.
- 6
- E whakahonoretia ana te pāpā e te tamaiti, tona ariki e te pononga: ki te mea he matua ahau, kei hea toku honore? ki te mea he ariki ahau, kei hea te wehi ki a au? e ai ta Ihowa o nga mano ki a koutou, e nga tohunga e whakahawea na ki toku ingoa, e mea na, He whakahaweatanga ki te aha ta matou ki to ingoa?
- 7
- He taro poke ta koutou e tapae na i runga i toku aata, a, e mea na koutou, I whakapokea koe e matou ki te aha? I te mea ka kīa na e koutou te tepara a Ihowa, He hanga mo te whakahawea.
- 8
- Ki te tapaea hoki e koutou te matapo hei patunga tapu, ehara ianei i te mea kino? ki te tapaea ano e koutou te mea totitoti, te mea mate, ehara ianei i te kino? tena koa, hoatu ki to kawana; e pai ranei ia ki a koe? e manako ranei ia ki a koe? e ai ta Ihowa o nga mano.
- 9
- Na, tena ra, inoi atu ki te Atua kia atawhai ai ia i a tatou: na ta koutou mahi tenei: e manako ranei ia ki a koutou? e ai ta Ihowa o nga mano.
- 10
- Ko wai ano i roto i a koutou e tutaki i nga tatau, ki te kahore he utu? ehara ano hoki ta koutou whakau ahi i runga i taku aata i te mea whakautu-kore. Kahore oku ngakau ki a koutou, e ai ta Ihowa o nga mano, e kore ano ahau e manako ki te whakahere a o koutou ringaringa.
- 11
- No te mea tera e nui toku ingoa i roto i nga Tauiwi, i te whitinga o te ra, a tae noa ki tona torengitanga; ka tukua ano hoki he whakakakara ki toku ingoa i nga wahi katoa, me te whakahere poke-kore ano hoki; no te mea tera e nui toku ingoa i roto i nga Tauiwi, e ai ta Ihowa o nga mano.
- 12
- Ko koutou ia kei te whakapoke i taua ingoa, i a koutou ka ki ra, Te tepara a Ihowa he poke; ona hua ano hoki, tana kai, he hanga mo te whakahawea.
- 13
- I mea ano koutou, Nana, te whakahoha! whakatupererutia iho e koutou, e ai ta Ihowa o nga mano; a maua mai ana e koutou te mea i haehaea, te mea totitoti, te mea mate; na, kei te mau mai koutou i te whakahere: e manakohia ranei tenei mea a o koutou ringaringa? e ai ta Ihowa.
- 14
- He kanga ia mo te tangata tinihanga, he toa nei tana i roto i tana kahui, na, ka puaki tana kī taurangi, a patua ana e ia te mea hē ma te Ariki; he Kingi nui hoki ahau, e ai ta Ihowa o nga mano, he hanga whakawehi ano toku ingoa i roto i nga tauiwi.
Address: 
Phone: 
Email: