- 1
- Na, inaianei, he whakahau tenei mo koutou, e nga tohunga.
- 2
- Ki te kore koutou e whakarongo, ki te kore e takoto i roto i o koutou ngakau kia homai he kororia ki toku ingoa, e ai ta Ihowa o nga mano, ina ka tukua atu e ahau he kanga ki a koutou, ka kangā ano e ahau o koutou manaakitanga: kua oti ano i a au te kanga, no te mea kihai i takoto i roto i o koutou ngakau.
- 3
- Nana, ka riria e ahau ta koutou purapura, ka akiritia ano e ahau he paru kararehe ki o koutou mata, te paru o a koutou hakari, a ka riro ngatahi koutou me taua mea.
- 4
- A ka mohio koutou naku tenei whakahau i unga atu ki a koutou, kia mau ai taku kawenata ki a Riwai, e ai ta Ihowa o nga mano.
- 5
- I a ia taku kawenata mo te ora, mo te rongo mau; he mea hoatu ano naku ki a ia mo te wehi i wehi ai ia i a au, mona hoki i hopohopo ki toku ingoa.
- 6
- I roto i tona mangai te ture o te pono, kihai ano hoki te he i kitea i roto i ona ngutu: i haere tahi ia i a au i runga i te rongo mau, i runga i te tika, he tokomaha ano hoki i whakatahuritia mai e ia i te kino.
- 7
- Ko ta nga ngutu hoki o te tohunga he tiaki matauranga, ka rapua ano te ture i roto i tona mangai: ko te karere hoki ia a Ihowa o nga mano.
- 8
- Ko koutou ia kua peka atu i te ara, kua meinga na e koutou te ture hei tūtukitanga waewae mo etahi, he tokomaha; hē iho i a koutou te kawenata ki a Riwai, e ai ta Ihowa o nga mano.
- 9
- Na, kua meinga na koutou e ahau kia whakahaweatia, kia iti, i te aroaro o nga tangata katoa, kua rite ki ta koutou kihai na i tiaki i oku ara, a i nga mea o te ture he whakapai tangata ta koutou.
- 10
- He teka ianei kotahi ano te pāpā o tatou katoa? he teka ianei kotahi ano te Atua nana tatou i hanga? he aha tatou i tinihanga ai, te tuakana ki te teina, i whakanoa ai i te kawenata ki o tatou mātua?
- 11
- Kua tinihanga a Hura, e mahia ana hoki te mea whakarihariha i roto i a Iharaira, i Hiruharama; kua noa hoki i a Hura te tapu o Ihowa, tana hoki i aroha ai, a marenatia ana mana te tamahine a te atua ke.
- 12
- Ka hatepea atu e Ihowa te tangata nana tenei mahi, te kai whakaako, te akonga i roto i nga teneti o Hakopa, ratou ano ko te kai tapae i te whakahere ki a Ihowa o nga mano.
- 13
- Na, ko ta koutou mahi tuarua tenei, ara, te hipokinga i te aata o Ihowa ki nga roimata, ki te tangihanga, ki te aue; a kore tonu ake āna tahuritanga mai ki te whakahere, kore ake āna tango, āna manako ki ta to koutou ringaringa.
- 14
- Heoi e mea na koutou, Na te aha? No te mea e whakaatu ana a Ihowa i tāu ki te wahine o to taitamarikitanga i tinihangatia ra e koe: ko to hoa ano ia, ko te wahine ano o to kawenata.
- 15
- Na, he teka ianei kotahi tana i hanga ai? I a ia ano hoki te toenga iho o te wairua. A na te aha i kotahi ai? Kia rapua ai e ia he uri atua. Na, tiakina to koutou wairua, kaua hoki e tinihanga ki te wahine o to taitamarikitanga.
- 16
- No te mea e ki ana a Ihowa Atua o Iharaira, e kino ana ia ki te whakarere: e hipokina ana hoki e tetahi te tutū ki tona kakahu, e ai ta Ihowa o nga mano: na, tiakina to koutou wairua; kaua hoki e tinihanga.
- 17
- Kua whakahohatia e koutou a Ihowa ki ā koutou kupu. A e mea na koutou, I whakahohatia ia e matou ki te aha? I a koutou ka ki na, He pai ki te titiro a Ihowa nga tangata katoa e mahi kino ana, e manako ana hoki ia ki a ratou; Kei hea oti te Atua o te whakarite whakawa?
Address: 
Phone: 
Email: