- 1
- A ka oti te karanga e ia ana akonga tekau ma rua, ka hoatu ki a ratou he mana hei pei i nga wairua poke, hei whakaora hoki i nga mate katoa me nga turorotanga katoa.
- 2
- Na, ko nga ingoa enei o nga apotoro kotahi tekau ma rua; Te tuatahi, ko Haimona nona nei te ingoa ko Pita, raua ko tona teina ko Anaru; ko Hemi tama a Heperi, raua ko tona teina ko Hoani;
- 3
- Ko Piripi raua ko Patoromu; ko Tamati raua ko Matiu te pupirikana; ko Hemi tama a Arapiu; ko Repiu hoki, nona nei te ingoa ko Tariu;
- 4
- Ko Haimona Kananiti; ko Hura Ikariote hoki, nāna nei ia i tuku.
- 5
- Ko tenei tekau ma rua i tonoa e Ihu, a ka ako ia i a ratou, ka mea, Kaua e haere ki te huarahi o nga tauiwi, kaua ano hoki e tomo ki tetahi pa o nga Hamari:
- 6
- Engari me haere ki nga hipi ngaro o te whare o Iharaira.
- 7
- A me kauwhau haere koutou, me ki atu, Kua tata te rangatiratanga, o te rangi.
- 8
- Whakaorangia nga turoro, whakamakia nga repera, whakaarahia nga tupapaku, peia nga rewera; ka riro noa atu nei i a koutou, me hoatu noa e koutou.
- 9
- Kaua he koura ma koutou, kaua he hiriwa, kaua he parahi ki roto ki o koutou whitiki;
- 10
- Kaua ano hoki he putea mo te ara; kaua e takiruatia nga koti, kaua he hu, kaua ano hoki he tokotoko; ka ea nei hoki i te kai mahi tana kai.
- 11
- A ka tomo koutou ki tetahi pa, ki tetahi kāinga koraha ranei, uia atu, Ko wai te tangata pai o reira? a hei reira noho ai, a haere noa.
- 12
- Ano ka tomo atu koutou ki tetahi whare, me oha atu.
- 13
- A ki te pai te whare, kia tau ta koutou rangimarie ki reira; a ki te kahore e pai, kia hoki mai ta koutou rangimarie ki a koutou.
- 14
- A ki te kahore tetahi e manako ki a koutou, ki te kore e whakarongo ki ā koutou kupu, ka haere koutou ki waho o taua whare, o taua pa ranei, whakangahoroa atu te puehu o o koutou waewae.
- 15
- He pono taku e mea atu nei ki a koutou, Erangi to te whenua o Horoma raua ko Komora i te ra whakawa, e māmā i to taua pa.
- 16
- Nana, ka tonoa atu nei koutou e ahau ano he hipi ki roto ki nga wuruhi: na, kia rite ki te nakahi te mahara, kia rite ki nga kukupa te kino kore.
- 17
- Kia tupato ia i nga tāngata: e tukua atu hoki koutou e ratou ki nga runanga, a e whiua koutou i roto i o ratou whare karakia;
- 18
- A ka kawea koutou ki nga kawana, ki nga kingi, mo te whakaaro ki a au, hei mea whakaatu ki a ratou, ki nga tauiwi hoki.
- 19
- Ano ka tukua atu koutou e ratou, kaua e manukanuka ki te pehea, ki te aha, e korero ai koutou; ka hoatu hoki ki a koutou i taua wa ano ta koutou e korero ai.
- 20
- Ehara hoki i a koutou māna nga korero, engari ko te Wairua o to koutou Matua hei korero i roto i a koutou.
- 21
- Na, ka tukua te tua kana e te teina ki te mate, te tamaiti hoki e te pāpā; ka whakatika nga tamariki ki nga mātua, ka mea kia whakamatea.
- 22
- A ka kinongia koutou e nga tāngata katoa he mea hoki mo toku ingoa; ko te tangata ia e u ana a taea noatia te mutunga, ka ora ia.
- 23
- Na ka whakatoia koutou i tenei pa, rere atu ki tetahi atu: he pono hoki taku e mea atu nei ki a koutou, E kore e poto i a koutou nga pa o Iharaira te haere, ko te Tama a te tangata kua tae mai.
- 24
- Kahore e nui ake te akonga i tona kai whakaako, kahore hoki te pononga e nui ake i tona rangatira.
- 25
- Heoi ma te akonga ko ia kia rite ki tona kai whakaako, ma te pononga hoki kia rite ki tona rangatira. Ko te rangatira o te whare i karangatia e ratou ko Perehepura, tera noa ake nga tāngata o tona whare e karangatia.
- 26
- Na, kaua e wehi i a ratou: kahore hoki te mea i hipokina e mahue te hura; kahore hoki te mea i ngaro e mahue te mohio.
- 27
- Ko taku e korero nei ki a koutou i te pouri, me korero e koutou i te māramatanga: ko ta o koutou taringa e rongo ai, me kauwhau ki runga ki nga whare.
- 28
- Kaua hoki e wehingia te hunga e whakamate nei i te tinana, a e kore e ahei te whakamate i te wairua: engari ko tenei ta koutou e wehi ai, ko ia e kaha nei ki te whakangaro i te wairua raua ko te tinana ki roto ki te reinga.
- 29
- E kore ianei e hokona nga pihoihoi e rua ki te patene kotahi? a, ki te kahore to koutou Matua e mea, e kore tetahi o raua e marere ki te whenua.
- 30
- Na, ko nga makawe o o koutou mātenga kua oti katoa te tatau.
- 31
- Na, kaua e wehi; erangi ra koutou i nga pihoihoi maha.
- 32
- Na, ki te whakaae tetahi ki a au ki te aroaro o nga tāngata, ka whakaaetia hoki ia e ahau ki te aroaro o toku Matua i te rangi.
- 33
- A, ki te whakakahore tetahi ki a au ki te aroaro o nga tāngata, ka whakakahoretia hoki ia e ahau ki te aroaro o toku Matua i te rangi.
- 34
- Kei mea i haere mai ahau ki te kawe mai i te rangimarie ki te whenua: kihai ahau i haere mai ki te kawe mai i te rangimarie, engari i te hoari.
- 35
- I haere mai hoki ahau ki te mea kia whawhai te tangata ki tona pāpā, me te tamahine ki tona whaea, me te hunaonga wahine ki tona hungawai wahine.
- 36
- A ko nga hoa riri o te tāngata ko nga tāngata o tona whare ake.
- 37
- Ki te nui ake te aroha o tetahi tangata ki tona pāpā, whaea ranei, a ka iti ki a au, e kore ia e tikangatia maku; a ki te nui ake te aroha o tetahi tangata ki tona tama, tamahine ranei, a ka iti ki a au, e kore ia e tikangatia maku.
- 38
- A ki te kore tetahi e mau ki tana ripeka, e aru i muri i a au, e kore ia e tikangatia maku.
- 39
- Te tangata i whiwhi ki te ora, e mate ano ia: a ki te mate tetahi, mona i whakaaro ki a au, ka whiwhi ano ia ki te ora.
- 40
- Ki te manako tetahi ki a koutou, e manako ana ia ki a au, a ki te manako tetahi ki a au, e manako ana ia ki toku kai tono mai.
- 41
- Ki te manako tetahi ki te poropiti i runga i te ingoa o te poropiti, ka riro i a ia te utu a te poropiti; a ki te manako tetahi ki te tangata tika i runga i te ingoa o te tangata tika, e riro i a ia te utu a te tangata tika.
- 42
- A ki te whakainumia e tetahi tetahi o enei mea nonohi, ahakoa kotahi ano te pāta wai matao, i runga i te ingoa o te akonga, he pono taku e mea nei ki a koutou, E kore rawa ia e hapa i tana utu.