- 1
- A ka mutu ta Ihu whakarite korero ki ana akonga kotahi tekau ma rua, ka haere atu ia i reira ki te whakaako ki te kauwhau ki o ratou pa.
- 2
- A, te rongonga o Hoani i roto i te whare herehere ki nga mahi a te Karaiti, ka tonoa e ia etahi o ana akonga tokorua,
- 3
- Ka mea ki a ia, Ko koe ranei tera e haere mai ana, me tatari ranei tatou ki tetahi atu?
- 4
- Na, ka whakahokia mai e Ihu, a ka mea ki a raua, Haere, korerotia atu ki a Hoani nga mea e rongo nei, e kite nei korua:
- 5
- Ko nga matapo e titiro ana, ko nga kopa e haereere ana, ko nga repera e meinga ana kia ma, ko nga turi e rongo ana, ko nga tupapaku e whakaarahia ana, a e kauwhautia ana te rongo pai ki te hunga rawa-kore.
- 6
- A ka koa te tangata e kore e he ki a au.
- 7
- A i a raua e haere ana, ka timata a Ihu, a ka korerotia a Hoani ki te mano, I haere koutou ki te koraha kia kite i te aha? I te kakaho e whakangaueuetia ana e te hau?
- 8
- Ano ra i haere koutou kia kite i te aha? I te tangata he kakahu maeneene ona? na, kei nga whare o nga kingi te hunga i nga kakahu maeneene.
- 9
- Ano ra i haere koutou kia kite i te aha? I te poropiti? ae ra, ko taku kupu tenei ki a koutou, tera atu ano i te poropiti.
- 10
- Ko ia hoki tenei mona te mea i tuhituhia, Na, ka tonoa e ahau taku karere ki mua i tou aroaro, māna e whakapai tou ara ki mua i a koe.
- 11
- He pono taku e mea nei ki a koutou, Kahore ano i whakatika noa i roto i nga whanau a te wahine he rahi ake i a Hoani Kai iriiri: heoi rahi ake i a ia te iti rawa i te rangatiratanga o te rangi.
- 12
- A e tauria ana te rangatiratanga o te rangi no nga ra iho ano o Hoani Kai iriiri a mohoa noa nei, a e riro ana i te hunga taikaha.
- 13
- I poropiti hoki nga poropiti katoa me te ture taea noatia a Hoani.
- 14
- A ki te pai koutou ki te tango, ko Iraia tenei i meinga e haere mai ana.
- 15
- Ki te whai taringa tetahi hei whakarongo, kia rongo ia.
- 16
- Otiia me whakarite e ahau tenei whakatupuranga ki te aha? E rite ana ki nga tamariki e noho ana i nga kāinga hoko, a e karanga ana ki o ratou hoa,
- 17
- E mea ana, Whakatangi noa matou i te putorino ki a koutou, a kahore koutou i kanikani mai; aue noa matou ki a koutou, a kahore koutou i tangi mai.
- 18
- I haere mai hoki a Hoani, a kihai i kai, kihai i inu, heoi e mea ana ratou, He rewera tona.
- 19
- I haere mai te Tama a te tangata me te kai me te inu, ka mea ratou, Na, he tangata kakai, he tangata inu waina, he hoa no nga pupirikana me nga tāngata hara. Otira e whakatikaia ana te whakaaro nui e ana tamariki.
- 20
- Katahi ia ka anga ka tawai ki nga pa i meinga ai te maha o ana merekara, mo ratou kihai i ripeneta:
- 21
- Aue te mate mou, e Korahina! aue te mate mou, e Petahaira! me i meatia hoki ki Taira ki Hairona nga merekara kua meatia nei ki a korua, kua ripeneta ke raua, he taratara hoki te kakahu, me te noho ano i te pungarehu.
- 22
- Ko taku kupu ia tenei ki a koutou, Erangi to Taira to Hairona e māmā i te ra whakawa i to korua.
- 23
- Me koe hoki, e Kaperenauma, e tiketike ake na, a tutuki noa ki te rangi, ka whakatakā koe ki te reinga: me i meatia hoki ki Horoma nga merekara kua meatia nei ki a koe, kua tu tonu, a taea noatia tenei ra.
- 24
- Ko taku kupu ia tenei ki a koutou, Erangi to te whenua o Horoma e māmā, i tou i te ra whakawa.
- 25
- I taua wa ka oho atu a Ihu, ka mea, He whakawhetai atu taku ki a koe, e Pa, e te Ariki o te rangi o te whenua, no te mea kua hunā e koe enei mea i te hunga mātau, i te hunga mahara, a hurahia atu ana ki nga kohungahunga.
- 26
- Ae ra, e Pa; i pai hoki te penei ki tau titiro.
- 27
- Kua tukua mai nga mea katoa ki a au e toku Matua: kahore ano hoki tetahi e mātau ki te Tama, ko te Matua anake; kahore ano hoki tetahi e mātau ki te Matua, ko te Tamaiti anake, me te tangata hoki e pai ai te Tamaiti kia hurahia atu ki a ia.
- 28
- Haere mai ki ahau, e koutou katoa e mauiui ana, e taimaha ana, a maku koutou e whakaokioki.
- 29
- Tangohia taku ioka ki runga ki a koutou, kia whakaakona koutou e ahau; he ngakau māhaki hoki toku, he ngakau papaku: a e whiwhi koutou ki te okiokinga mo o koutou wairua.
- 30
- He ngawari hoki taku ioka, he māmā taku pikaunga.
Address: 
Phone: 
Email: