- 1
- A no ka tata ratou ki Hiruharama, a ka tae ki Petapaki, ki maunga Oriwa, na, tokorua nga akonga i tonoa e Ihu,
- 2
- Ka mea ia ki a raua, Haere ki te kāinga e anga mai ana ki a korua; na ka kite tonu korua i tetahi kaihe e here ana raua ko tana kuao: wetekia, ka arahi mai ki a au.
- 3
- A ki te kī mai tetahi tangata ki a korua, ka mea atu, E mea ana te Ariki ki a raua māna; na, ka tukua tonutia mai raua e ia.
- 4
- I meingatia katoatia tenei hei whakaritenga mo te kupu i korero ai te poropiti, i mea ai,
- 5
- Meinga atu ki te tamahine o Hiona, Na, tou kingi e haere mai na ki a koe, he ngakau māhaki tona, e noho ana i runga i te kaihe, i te kuao hoki i te tamaiti a te kaihe.
- 6
- Na, haere ana nga akonga, meatia ana ta Ihu i mea ai ki a raua,
- 7
- Arahina mai ana te kaihe me te kuao, a, wharikitia ana o raua kakahu ki runga ki a raua, a whakanohoia ana ia ki runga.
- 8
- A he tini whakaharahara nga tāngata ki te whariki i o ratou kakahu ki te ara; ko etahi i tapahi manga mai i nga rakau, a wharikitia ana ki te ara.
- 9
- Ko nga mano i haere i mua, me te hunga i haere i muri, kei te karanga, kei te mea, Ohana ki te Tama a Rawiri: Ka whakapaingia tenei e haere mai nei i runga i te ingoa o te Ariki; Ohana i runga rawa.
- 10
- Ano ka tapoko mai ia ki Hiruharama, ka oho katoa te pa, ka mea, Ko wai tenei?
- 11
- Ka mea te mano, Ko Ihu tenei, ko te poropiti o Nahareta o Kariri.
- 12
- A ka tomo a Ihu ki te temepara o te Atua, na, peia katoatia ana e ia te hunga e hoko mai ana, e hoko atu ana i roto i te temepara, a hurihia ake nga tepara a nga kai whakawhitiwhiti moni, me nga nohoanga o te hunga hoko kukupa,
- 13
- A ka mea ki a ratou, Kua oti te tuhituhi, Ka karangatia toku whare he whare inoi; heoi kua oti nei te mea e koutou hei ana mo nga kai pahua.
- 14
- A i haere mai ano ki a ia ki roto ki te temepara nga matapo, me nga kopa; a whakaorangia ake ratou e ia.
- 15
- A, te kitenga o nga tohunga nui me nga Karaipi i nga mea whakamiharo i meatia e ia, me nga tamariki e karanga ana i te temepara, e mea ana; Ohana ki te Tama a Rawiri; ka whakatakariri ratou,
- 16
- A ka mea ki a ia, E rongo ana koe ki ta enei e mea nei? Ka mea mai a Ihu ki a ratou, Ae ra; kiano koutou i kite noa, Pumau tonu i a koe te whakamoemiti a te waha o nga kohungahunga me nga mea ngote u?
- 17
- A ka mahue ratou i a ia, haere ana ia ki waho o te pa ki Petani; a moe ana i reira.
- 18
- Na, i te ata, i a ia e hoki ana ki te pa, ka hiakai ia.
- 19
- A, tona kitenga i tetahi piki i te taha o te ara, ka haere atu ia ki taua rakau, heoi kihai i kitea tetahi mea i runga, he rau anake; ka mea atu ia ki te rakau, Kei whai hua koe a, ake ake ake. A maroke tonu ake te piki.
- 20
- A, te kitenga o nga akonga, ka miharo, ka mea, Ano te hohoro o te maroke o te piki nei!
- 21
- Na, ka whakahokia mai e Ihu, a ka mea ki a ratou, He pono taku e mea nei ki a koutou, Me he mea he whakapono to koutou, a e kore e ruarua, na, e kore e meatia e koutou ko te penei anake ki te piki nei, engari ahakoa mea noa koutou ki tenei maunga, Kia rangā atu koe, kia whakatakā hoki ki te moana; ka meatia ano.
- 22
- A ko nga mea katoa e tono ai koutou ina inoi, ki te whakapono, ka riro mai i a koutou.
- 23
- A ka tae mai ia ki roto ki te temepara, ka haere mai nga tohunga nui me nga kaumatua o te iwi, i a ia ano e ako ana, a ka mea, Tena koa, te mana i meatia ai enei mea e koe? na wai hoki i hoatu tenei mana ki a koe?
- 24
- Na, ka whakahokia e Ihu, a ka mea ki a ratou, Maku ano hoki e ui atu ki a koutou kia kotahi kupu, ki te korerotia mai e koutou ki a au, maku hoki e korero ki a koutou te mana i mea ai ahau i enei mea.
- 25
- Te iriiringa a Hoani, no hea koia? no te rangi, no nga tāngata ranei? A ka korerorero ratou ki a ratou ano, ka mea, Ki te mea tatou, No te rangi; e mea mai ia ki a tatou, Ha, he aha koutou tē whakapono ai ki a ia?
- 26
- A, ki te mea tatou, No nga tāngata; ka wehi tatou i te mano; ki ta ratou katoa hoki he poropiti a Hoani.
- 27
- Na, ka whakahokia mai e ratou ki a Ihu, a ka mea, Kahore matou e mohio. Na, ko tana meatanga mai ki a ratou, E kore ano hoki e korerotia e ahau ki a koutou te mana i mea ai ahau i enei mea.
- 28
- Na, e pehea ana ta koutou whakaaro? Tokorua nga tamariki a tetahi tangata; a ka haere ia ki to mua, ka mea, E tama, haere ki te mahi aianei ki taku māra waina.
- 29
- Na, ka whakahokia mai e ia, a ka mea, Kahore au e pai: otira i muri iho ka puta ke tana whakaaro, a haere ana.
- 30
- A tona haerenga ki te tokorua, ka pera ano tana kupu. Na, ka whakahokia mai e tera, a ka mea, E kara, ka haere ahau: a kihai i tae.
- 31
- Ko wai o taua tokorua i mea i ta tona matua i pai ai? Ka mea mai ratou ki a ia, Ko to mua. Ka mea mai a Ihu ki a ratou, He pono taku e mea atu nei ki a koutou, Ko nga pupirikana me nga wāhine puremu e tika ana i mua i a koutou ki te rangatiratanga o te Atua.
- 32
- I haere mai hoki a Hoani ki a koutou ra te ara o te tika, a kihai koutou i whakapono ki a ia: tena ko nga pupirikana me nga wāhine puremu i whakapono ki a ia: ko koutou ia i to koutou kitenga ai, kihai i puta ke a koutou whakaaro i muri, kihai i whakapono ki a ia.
- 33
- Kia rongo ki tetahi atu kupu whakarite: Ki tetahi rangatira i whakato i te māra waina, a taiepatia ana, a taka noa, keria ana e ia te takahanga waina i roto, hangā ana tetahi whare tiketike, tukua ana e ia ki nga kai mahi, haere ana ia ki tawhiti:
- 34
- Ano ka tata te po hua, ka tonoa e ia ana pononga ki nga kai mahi, ki te tiki i nga hua o reira.
- 35
- Na, ka mau nga kai mahi ki ana pononga, whiua ana tetahi, whakamatea ana tetahi, a akina ana tetahi ki te kohatu.
- 36
- Na, ka tonoa ano e ia etahi atu pononga, he tokomaha atu i o mua: heoi i peratia ano hoki ratou.
- 37
- Na, muri rawa iho ka tono ia i tana tamaiti ki a ratou, i mea ia, E hopohopo ratou ki taku tamaiti.
- 38
- A, te kitenga o nga kai mahi i te tamaiti, ka mea ki a ratou ano, Ko te tangata tenei mona te kāinga; tena, tatou ka whakamate i a ia, ka tango i tona kāinga.
- 39
- Na, ka mau ratou ki a ia, makā ana ki waho o te māra waina, a whakamatea iho.
- 40
- Na, ka tae mai te rangatira o te māra waina, e aha ra ia ki ena kai mahi?
- 41
- Ka mea ratou ki a ia, He nanakia rawa tana whakamatenga i taua hunga nanakia; a ka tukua te māra waina ki etahi atu kai mahi, ki te hunga e tukua mai ai ki a ia nga hua i nga po hua.
- 42
- Ka mea mai a Ihu ki a ratou, Kiano koutou i kite noa i roto i nga Karaipiture, Ko te kohatu i kapea e nga kai hanga, kua meinga tenei hei upoko mo te kokonga: na te Ariki tenei, a he mea whakamiharo ki o tatou kanohi?
- 43
- Koia ahau ka mea nei ki a koutou, Ka tangohia te rangatiratanga o te Atua i a koutou, a ka hoatu ki tetahi iwi no taua rangatiratanga nei o ratou hua.
- 44
- A ki te hinga tetahi tangata ki runga ki tenei kohatu, na, mongamonga noa: ki te taka ia tenei ki runga ki tetahi tangata, na, ngotangota noa ia me he puehu.
- 45
- A ka rongo nga tohunga nui me nga Parihi ki ana kupu whakarite, ka mohio ratou mo ratou ana korero.
- 46
- Na, i a ratou e whai ana kia hopukia ia, ka wehi i te mano, ki ta ratou hoki he poropiti ia.
Address: 
Phone: 
Email: