Matthew Chapter 22 - Paipera Tapu 1868 | Te Paipera Tapu 1868

Matthew Chapter 22 - Paipera Tapu 1868

1
A ka oho ake a Ihu, ka korero kupu whakarite mai ano ki a ratou, ka mea,
2
Ka rite te rangatiratanga o te rangi ki tetahi kingi, i whakatakoto marenatanga mo tana tama,
3
A tonoa atu ana āna pononga, hei karanga i te hunga i korerotia ki te marenatanga: heoi kihai ratou i pai kia haere atu.
4
Ka tono atu ano ia i era atu pononga, ka mea, Mea atu ki te hunga i korerotia, Na, kua rite taku tina; kua oti aku puru aku mea momona te patu, a kua rite katoa nga mea: haere mai ki te marenatanga.
5
Otira i whakaparahakotia e ratou, haere ana ko tetahi ki tana māra, ko tetahi ki tana hokohoko.
6
Na hopukina ana āna pononga e nga mea i mahue, whakatupukinotia iho ratou, a whakamatea iho.
7
Na, te rongonga o taua kingi, ka riri: a tonoa atu ana āna taua, whakangaromia ana taua hunga kohuru, a tahuna ana to ratou pa.
8
Katahi ia ka mea ki ana pononga, E rite ana te marenatanga, ko te hunga ia i karangatia kihai i pai.
9
Haere ra koutou ki nga pekanga o nga ara, a tonoa mai ki te marenatanga te hunga katoa e kite ai koutou.
10
Na, ka haere atu aua pononga ki nga ara, a huihuia katoatia mai ana te hunga i kitea e ratou, te hunga kino, te hunga pai: na, ka kikī te marenatanga i nga manuhiri.
11
A, te tapokoranga mai o te kingi kia kite i nga manuhiri, ka kitea e ia i reira he tangata kahore nei ona kakahu marena:
12
A ka mea atu ki a ia, E hoa, he aha koe i tomo mai ai ki konei kahore nei hoki ou kahu marena? Heoi kihai ia i kuihi.
13
Na, ko te meatanga atu a te kingi ki nga kai mahi, Herea ona ringaringa, ona waewae, kawea atu, makā atu ki te pouri i waho rawa; ko te wahi tera o te tangihanga me te teteatanga o nga niho.
14
He tokomaha hoki e karangatia ana, he ruarua ia e whiriwhiria.
15
Me i reira ka haere atu nga Parihi, ka runanga ki te pehea e mau ai tetahi kupu āna.
16
A ka tonoa mai ki a ia ā ratou akonga, me nga tāngata whaka-Herora, hei mea, E te Kai whakaako, e mātau ana matou he kupu pono tau, a e whakaako ana koe i te huarahi o te Atua i runga i te pono, e kore ano hoki ta te tangata e whakaaroa e koe: e kore nei hoki koe e titiro ki te kanohi tangata.
17
Tena, korerotia mai ki a matou, E pehea ana to whakaaro? He mea tika ranei te hoatu takoha ki a Hiha, auaka ranei?
18
Otiia i mohio a Ihu ki ta ratou whakaaro kino, a ka mea mai, He aha ta koutou e whakama tau tau na i a au, e te hunga tinihanga?
19
Tena koa, kia kite ahau i te moni takoha. A mauria mai ana e ratou ki a ia he pene.
20
Na, ko tana meatanga atu ki a ratou, No wai tenei ahua me te tuhituhinga?
21
Ka mea mai ratou ki a ia, No Hiha. Katahi ia ka mea ki a ratou, Hoatu ki a Hiha nga mea ā Hiha; ki te Atua ano hoki nga mea ā te Atua.
22
A ka rongo ratou, ka miharo; a mahue ake ia i a ratou, a haere ana.
23
I taua ra ano ka haere atu ki a ia nga Haruki, e mea nei kahore he aranga mai, ka ui ki a ia,
24
Ka mea, E te Kai whakaako, i mea a Mohi, Ki te mate te tangata, a kahore āna tamariki, ma tona teina e marena tana wahine, e whakatupu ake he uri mo tona tua kana.
25
Na, tokowhitu taua whanau i a matou, he tua kana he teina: te marenatanga o te tuatahi, ka mate, a hore ona uri, waiho iho tana wahine ma tona teina.
26
Me te tokorua ano hoki me te tokotoru, puta noa i te tokowhitu.
27
A, muri iho i a ratou katoa ka mate ano hoki te wahine.
28
Na, i te aranga mai, ma wai o te tokowhitu te wahine? i a ratou katoa nei hoki ia.
29
Na, ka whakahokia mai e Ihu, a ka mea ki a ratou, E hē ana koutou, tē mohio ki nga Karaipiture, ki te kaha ano hoki o te Atua.
30
I te aranga mai hoki e kore ratou e marena, e kore ano hoki e hoatu kia mare na tia, engari ka rite ki nga anahera a te Atua i te rangi.
31
Na, te aranga o te hunga mate, kahore ano koutou i kite i ta te Atua i korero ai ki a koutou, i mea ai,
32
Ko ahau te Atua o Aperahama, te Atua o Ihaka, te Atua o Hakopa? ehara te Atua i te Atua no te hunga mate, engari no te hunga ora.
33
Ano ka rongo te mano, ka miharo ki tana ako.
34
Na, te rongonga o nga Parihi, kua kopi i a ia te mangai o nga Haruki, ka whakamine tahi ratou.
35
Na, ka ui mai tetahi o ratou, he kai ako i te ture, ka whakamatautau i a ia, ka mea,
36
E te Kai whakaako, ko tehea te kupu nui o te ture?
37
Ka mea mai a Ihu ki a ia, Kia whakapaua tou ngakau, tou wairua, tou hinengaro, ki te aroha ki te Ariki ki tou Atua.
38
Ko te tuatahi tenei, ko te kupu nui.
39
E rite ana ano hoki te tuarua ki tenei, Kia aroha koe ki tou hoa tata, ano ko koe.
40
Kei runga i enei kupu e rua e iri ana te ture katoa me nga poropiti.
41
A i nga Parihi e noho huihui ana, ka ui mai a Ihu ki a ratou,
42
Ka mea, E pehea ana ā koutou whakaaro ki a te Karaiti? Na wai ia tamaiti? Ka mea ratou ki a ia, Na Rawiri.
43
Ka mea ia ki a ratou, Na te aha ra a Rawiri, i a ia e nohoia ana e te Wairua, i karanga ai i a ia he Ariki? i ki hoki ia,
44
I mea te Ariki ki toku Ariki, Hei toku ringa matau koe noho ai, kia meinga ra ano e ahau ou hoa riri hei turanga waewae mou.
45
Na, ka karangatia nei ia e Rawiri he Ariki, a na te aha i tama ai ki a ia?
46
A, hore he tangata i ahei te whakahoki kupu atu ki a ia, kihai rawa ano hoki tetahi i maia ki te ui atu ki a ia i taua ra iho ano.